AKP បន្ទាយមានជ័យ ថ្ងៃទី១៧ ខែមេសា ឆ្នាំ២០២៥ -- លោក ឃ្លោក នួយ អភិបាលរងខេត្តបន្ទាយមានជ័យ តំណាងឯកឧត្ដម អ៊ុំ រាត្រី អភិបាលនៃគណៈអភិបាលខេត្ត បានដឹកនាំក្រុមការងារចុះជួបសំណេះសំណាល និងជូនដំណើរបងប្អូនប្រជាពលរដ្ឋ និងអ្នកបើកបររថយន្តក្រុង ដែលត្រៀមវិលត្រឡប់ទៅរាជធានីភ្នំពេញវិញ បន្ទាប់ពីបានមកលេងស្រុកកំណើត និងសប្បាយរីករាយក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។

ពិធីសំណេះសំណាល និងជូនដំណើរនេះ បានប្រព្រឹត្តទៅនៅបេនឡានក្រុងសិរីសោភ័ណ ក្នុងបរិយាកាសរីករាយ និងស្និទ្ធស្នាល។ ក្នុងឱកាសនោះ លោក ឃ្លោក នួយ បានពាំនាំនូវការផ្តាំផ្ញើសាកសួរសុខទុក្ខពីសំណាក់ឯកឧត្ដមអភិបាលខេត្ត ជូនចំពោះបងប្អូនប្រជាពលរដ្ឋទាំងអស់ដែលបានធ្វើដំណើរមកកាន់ខេត្តបន្ទាយមានជ័យនាឱកាសបុណ្យចូលឆ្នាំថ្មីនេះ និងបានកោតសរសើរចំពោះការចូលរួមថែរក្សាសណ្ដាប់ធ្នាប់ និងសុវត្ថិភាពបានយ៉ាងល្អក្នុងអំឡុងពេលបុណ្យចូលឆ្នាំថ្មីកន្លងមក។

លោកអភិបាលរងខេត្ត បានមានប្រសាសន៍លើកឡើងពីការយកចិត្តទុកដាក់របស់រាជរដ្ឋាភិបាល ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលជានិច្ចកាលតែងតែគិតគូរអំពីសុខទុក្ខ និងការលំបាករបស់ប្រជាពលរដ្ឋ។ ជាក់ស្តែង ក្នុងឱកាសបុណ្យចូលឆ្នាំថ្មីនេះ រាជរដ្ឋាភិបាលបានរៀបចំរថយន្តក្រុងដោយឥតគិតថ្លៃ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋពីភ្នំពេញទៅកាន់បណ្តាខេត្តនានា និងត្រឡប់មកវិញ។

លោក ឃ្លោក នួយ បានបញ្ជាក់ថា ការរៀបចំរថយន្តក្រុងឥតគិតថ្លៃនេះ បានបង្ហាញឱ្យឃើញពីការគិតគូរយ៉ាងស៊ីជម្រៅរបស់រាជរដ្ឋាភិបាលចំពោះប្រជាពលរដ្ឋ ជាពិសេសអ្នកដែលមានជីវភាពខ្វះខាត និងជួយកាត់បន្ថយការចំណាយក្នុងការធ្វើដំណើររបស់ពួកគាត់។ លោកបានថ្លែងអំណរគុណចំពោះក្រុមការងារទាំងអស់ដែលបានខិតខំប្រឹងប្រែងក្នុងការសម្របសម្រួល និងរៀបចំការធ្វើដំណើរនេះឱ្យប្រព្រឹត្តទៅដោយរលូន និងមានសុវត្ថិភាព។

ជាមួយគ្នានោះ បងប្អូនប្រជាពលរដ្ឋដែលត្រៀមធ្វើដំណើរតាមរថយន្តក្រុងឥតគិតថ្លៃ បានបង្ហាញនូវអារម្មណ៍សប្បាយរីករាយ និងថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល ដែលបានផ្តល់នូវសេវាដឹកជញ្ជូនដ៏មានសារៈសំខាន់នេះ។

លោកស្រី ម៉ាលី ដែលជាអ្នកដំណើរម្នាក់ បានរៀបរាប់ទាំងទឹកមុខញញឹមថា "ខ្ញុំពិតជាសប្បាយចិត្តណាស់ដែលបានជិះឡានក្រុងឥតគិតថ្លៃនេះ។ វាជួយសម្រួលដល់ការធ្វើដំណើររបស់ខ្ញុំបានច្រើនណាស់ ព្រោះខ្ញុំមិនសូវមានលុយច្រើនទេ។ អរគុណរាជរដ្ឋាភិបាលខ្លាំងណាស់ដែលគិតគូរដល់ពួកខ្ញុំ"។

ចំណែក លោក សុខុម ដែលជាអ្នកបើកបររថយន្តក្រុងម្នាក់ បានឱ្យដឹងថា លោកមានមោទនភាពដែលបានចូលរួមចំណែកក្នុងការដឹកជញ្ជូនបងប្អូនប្រជាពលរដ្ឋដោយសុវត្ថិភាព និងដោយក្តីរីករាយ។ លោកបានប្តេជ្ញាថានឹងបើកបរដោយប្រុងប្រយ័ត្ន និងគោរពច្បាប់ចរាចរណ៍ ដើម្បីធានាបាននូវសុវត្ថិភាពរបស់អ្នកដំណើរទាំងអស់។

នៅចុងបញ្ចប់នៃពិធី លោក ឃ្លោក នួយ បានជូនពរបងប្អូនប្រជាពលរដ្ឋទាំងអស់ធ្វើដំណើរទៅដល់លំនៅដ្ឋានប្រកបដោយសុខសុវត្ថិភាព និងជួបតែសេចក្តីសុខចម្រើនគ្រប់ៗគ្នា។ ក្រុមការងារក៏បានបន្តសម្របសម្រួល និងជួយសម្រួលដល់ការឡើងរថយន្តរបស់បងប្អូនប្រជាពលរដ្ឋ រហូតដល់រថយន្តក្រុងចាកចេញពីបេនឡានក្រុងសិរីសោភ័ណឆ្ពោះទៅកាន់រាជធានីភ្នំពេញវិញ៕

ដោយ ឈុន សារ៉ាត