AKP កំពង់ធំ ថ្ងៃទី១៧ ខែមេសា ឆ្នាំ២០២៥-- លោក សេង អាន ប្រធានមន្ទីរទេសចរណ៍ខេត្តកំពង់ធំ បានឱ្យដឹងនាព្រឹកថ្ងៃទី១៧ ខែមេសា ឆ្នាំ២០២៥ថា ប្រជាពលរដ្ឋ និងភ្ញៀវទេសចរជាតិ-អន្តរជាតិមកលេងកម្សាន្តនៅខេត្តកំពង់ធំ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរសរុបប្រមាណ៥៥២៧៥៤នាក់។

ក្នុងរយៈពេល៣ថ្ងៃនៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ ព.ស២៥៦៩ គ.ស២០២៥ រដ្ឋបាលខេត្តកំពង់ធំបានរៀបចំព្រឹត្តការណ៍ «សង្ក្រាន្តកំពង់ធំ» នៅក្នុងបរិវេណសួនស្ទឹងសែនរយៈពេល៣ថ្ងៃផងដែរគឺ ចាប់ពីថ្ងៃទី១៤-១៦ ខែមេសា ឆ្នាំ២០២៥ ដោយបានរៀបចំព្រឹត្តិការណ៍សប្បាយប្លែកៗជាច្រើនដូចជាការរៀបចំតំបន់ត្រជាក់ដែលមានការដាក់រថយន្តបាញ់ទឹក ការដាក់បង្ហាញស្តង់ម្ហូបអាហារ និងផលិតផលខ្មែរ ការលេងល្បែងប្រជាប្រិយដ៏សម្បូរបែបរបស់ខ្មែររួមមាន៖ បោះអង្គញ់ ចោលឈូង ទាញព្រ័ត្រ លាក់កន្សែង វាយក្អម និងការបង្ហាញនូវផ្ទាំងទស្សនីយភាពរបាំជូនពរ របាំត្រុដិ និងចាប៉ីដងវែងឆ្លងឆ្លើយពីប្រវត្តិនៃកំណើតពិធីបុណ្យចូលឆ្នាំថ្មីប្រពៃណីជាតិខ្មែរ ព្រមទាំងមានការប្រគុំតន្ត្រី និងរាំលេងកម្សាន្តផងដែរដែលមានប្រជាពលរដ្ឋ និងភ្ញៀវទេសចរមកលេងកម្សាន្តយ៉ាងច្រើនកុះករ។

តាមរបាយការណ៍របស់លោក សេង អាន បានឱ្យដឹងថា ភ្ញៀវទេសចរ និងបងប្អូនប្រជាពលរដ្ឋមកចូលរួមលេងកម្សាន្តនៅខេត្តកំពង់ធំ ក្នុងពិធីបុណ្យចូលឆ្នាំថ្មីប្រពៃណីជាតិខ្មែរ សរុបប្រមាណ៥៥២៧៥៤នាក់ ក្នុងនោះភ្ញៀវជាតិចំនួន៥៥២៣៥០នាក់ និងភ្ញៀវបរទេសចំនួន៤០៤នាក់ រួមមានភ្ញៀវទេសចរមកទស្សនាកម្សាន្តតាមគោលដៅទេសចរណ៍នានាក្នុងខេត្តកំពង់ធំប្រមាណ១៣៥៦៥នាក់។ ភ្ញៀវទេសចរ និងបងប្អូនប្រជាពលរដ្ឋមកលេងកម្សាន្តសប្បាយសង្រ្កាន្តកំពង់ធំនៅក្រុងស្ទឹងសែនប្រមាណ២០៥២០០នាក់ និងភ្ញៀវទេសចរ និងបងប្អូនប្រជាពលរដ្ឋមកលេងតាមបណ្តាវត្តអារាមប្រមាណ៣៣៣៩៨៩នាក់៕

ដោយ ស៊ុម វណ្ណា