AKP ភ្នំពេញ ថ្ងៃទី១៦ ខែមេសា ឆ្នាំ២០២៥-- 

កងអនុសេនាធំកម្ទេចគ្រាប់មិនទាន់ផ្ទុះលេខ៩៨ ទី៣ ដែលកំពុងបំពេញបេសកកម្មរក្សាសន្តិភាពអង្គការសហប្រជាជាតិ (អ.ស.ប) នៅទីក្រុងបាំងហ្គី (Bangui) សាធារណរដ្ឋអាហ្រ្វិកកណ្ដាលបានប្រារព្ធពិធីសង្រ្កាន្តចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ព.ស ២៥៦៩ ដោយមានការអញ្ជើញចូលរួមពីលោកឧត្តមសេនីយ៍ត្រី  NICOLAE OROSE មេបញ្ជាការ EUTM ប្រចាំនៅសាធារណរដ្ឋអាហ្រ្វិកកណ្ដាល ព្រមទាំងនាយទាហាន នាយទាហានរង ភ្ញៀវកិត្តិយសជាតិ អន្តរជាតិ ដែលកំពុងបំពេញបេសកកម្មក្នុងតំបន់ MINUSCA នៃសាធារណរដ្ឋអាហ្រ្វិកកណ្ដាលជាច្រើនរូប។

មេបញ្ជាការកងអនុសេនាធំកម្ទេចគ្រាប់មិនទាន់ផ្ទុះលេខ៩៨ ទី៣ បានគូសបញ្ជាក់ថា នេះគឺជាការជួបជុំ ប្រារព្ធនូវពិធីបុណ្យចូលឆ្នាំថ្មីប្រពៃណីជាតិខ្មែរយ៉ាងសប្បាយរីករាយ ដោយមានការចូលរួមពីកងកម្លាំង រក្សាសន្តិភាពអង្គការសហប្រជាជាតិនៃព្រះរាជាណាចក្រកម្ពុជា និងកម្លាំងមកជាតិសាសន៍ដទៃទៀត ដែលត្រូវបានអញ្ជើញឱ្យចូលរួមក្នុងពិធីនេះ ដើម្បីបង្ហាញពីប្រពៃណី វប្បធម៌ និងទំនៀមទម្លាប់របស់ខ្មែរ នៅក្នុងឱកាសនៃពិធីបុណ្យចូលឆ្នាំថ្មីទៅកាន់ពួកគេ ហើយម្យ៉ាងវិញទៀតវាក៏បានបង្ហាញឱ្យឃើញផង ដែរនូវសាមគ្គីភាពរវាងកងកម្លាំងកម្ពុជា និងកងកម្លាំងនៃជាតិសាសន៍ផ្សេងៗទៀត ដែលកំពុងបំពេញ បេសកកម្មរក្សាសន្តិភាពអង្គការសហប្រជាជាតិ (អ.ស.ប) នៅទីក្រុងបាំងហ្គី (Bangui) សាធារណរដ្ឋអាហ្រ្វិកកណ្ដាល។

សូមជម្រាបជូនថា ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ព.ស ២៥៦៩នេះ ឯកឧត្តម ឧត្តមសេនីយ៍ទោ សែម រតនា អនុប្រធានទី១ គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព បានផ្ញើសារលិខិតជូនពរជូនដល់កងកម្លាំងកម្ពុជាដែលកំពុងបំពញបេសកកម្មរក្សាសន្តិភាពអង្គការសហប្រជាជាតិនៅឯបរទេស ដោយក្នុងខ្លឹមសារនៃសារលិខិតជូនពរនេះបានកោតសរសើរ និងវាយតម្លៃខ្ពស់ដល់គ្រប់កងកម្លាំងដែលកំពុងបំពេញបេសកកម្មរក្សាសន្តិភាពអង្គការសហប្រជាជាតិ (អ.ស.ប) ជាប្រវត្តិសាស្ត្រនៅក្នុងប្រទេសស៊ូដង់ ស៊ូដង់ខាងត្បូង លីបង់ អាហ្វ្រិកកណ្តាល កុងហ្គោ ដែលបានយកអស់កម្លាំងកាយចិត្ត ប្រាជ្ញាស្មារតី ខិតខំប្រឹងប្រែងបំពេញកាតព្វកិច្ចប្រកប ដោយស្មារតីទទួលខុសត្រូវរយៈពេលពេញមួយឆ្នាំកន្លងទៅដោយទទួលបានសមិទ្ធផល និងស្នាដៃជាច្រើនជូនមជ្ឈមណ្ឌលជាតិ ក៏ដូចជាការចូលរួមចំណែកជាមួយរាជរដ្ឋាភិបាល ដើម្បីបុព្វហេតុការពារជាតិ ការអភិវឌ្ឍសន្តិភាព កិច្ចសហប្រតិបត្តិការអន្តរជាតិ និងជាកិត្តិយសដ៏ខ្ពង់ខ្ពស់របស់យើងទាំងអស់គ្នា ដែលទទួលបាននូវទំនុកចិត្តពីប្រមុខរាជរដ្ឋាភិបាលកម្ពុជា តាមរយៈការលើកកំពស់កិត្យានុភាពព្រះរាជាណាចក្រកម្ពុជា និងកងយោធពលខេមរភូមិន្ទទាំងមូលនៅលើឆាកអន្តរជាតិ៕

ដោយ៖ ចាន់ សុភឿន (ប្រភព៖ កងអនុសេនាធំកម្ទេចគ្រាប់មិនទាន់ផ្ទុះលេខ៩៨ ទី៣)