AKP កំពង់ចាម ថ្ងៃទី១៦ ខែមេសា ឆ្នាំ២០២៥ -- 

ប្រជាពលរដ្ឋភ្ញៀវទេសចរជាតិ អន្តរជាតិយ៉ាងច្រើនកុះករ បាននាំគ្នាមកលេងកម្សាន្តនៅ «សង្ក្រាន្តកំពង់ចាម ឆ្នាំ២០២៥» និង នៅតាមតំបន់ទេសចរណ៍នានាទូទាំងខេត្តកំពង់ចាម ហើយរដ្ឋបាលខេត្តបានបង្កើតព្រឹត្តិការណ៍លលៀសហាលចម្ងាយ ១.០០០ម៉ែត្រ ទម្ងន់ ៣តោន នៃសង្ក្រាន្តកំពង់ចាម ដែលមានទេសចរជាតិ អន្តរជាតិ និងអ្នកដើរលេងកំសាន្តចំនួន ២.៣៦១.០៨៣នាក់ ដោយក្នុងនោះភ្ញៀវទេសចរជាតិមានចំនួន ២.៣៦០.៩៤២នាក់ និងភ្ញៀវទេសចរបរទេសមានចំនួន ១៤១នាក់។ នេះបើយោងតាមការបញ្ជាក់របស់លោក ស្រី សុភ័ក្រអភិបាលរងខេត្ត និងជាអ្នកនាំពាក្យរបស់រដ្ឋបាលខេត្តកំពង់ចាម។

លោក ស្រី សុភ័ក្រ អភិបាលរងខេត្ត និងជាអ្នកនាំ ពាក្យរបស់រដ្ឋបាលខេត្តកំពង់ចាម បានឱ្យដឹងថា នៅ ថ្ងៃទី១៥ ខែមេសា ឆ្នាំ២០២៥ ដែលជាថ្ងៃទីពីរនៃពិធីបុណ្យចូលឆ្នាំថ្មីប្រពៃណីជាតិខ្មែរ រដ្ឋបាលខេត្ត បានបង្កើតនូវកម្មវិធីជាច្រើនដើម្បីពលរដ្ឋចូលរួម កម្សាន្ត ពិសេស គឺព្រឹត្តិការណ៍លៀសហាល ៣តោន ប្រវែង ១.០០០ម  ដើម្បីប្រជាពលរដ្ឋមកពីគ្រប់ទិសទីជាភ្ញៀវទេសចរជាតិ និងអន្តរជាតិមកភ្លក់រសជាតិលៀសហាលឆ្ងាញ់កំពង់ចាម។

លោក ស្រី សុភ័ក្រ្ត បានឱ្យដឹងថា សម្រាប់ព្រឹត្តិការណ៍ សង្ក្រាន្តកំពង់ចាមឆ្នាំនេះ យើងមានការរៀបចំរក្សាសន្ដិសុខសណ្ដាប់ធ្នាប់បានយ៉ាងល្អប្រសើរគ្រប់ ទីកន្លែងប្រារព្ធពិធី ដោយកម្លាំងគណៈបញ្ជាការឯកភាពរដ្ឋបាលខេត្តកំពង់ចាមដឹកនាំដោយឯកឧត្តម អ៊ុន ចាន់ដា អភិបាលខេត្តកំពង់ចាម បានណែនាំដល់កងកម្លាំង និងសមត្ថកិច្ចគ្រប់លំដាប់ថ្នាក់ ត្រូវធ្វើយ៉ាងណាធានាឱ្យបាននូវសន្តិសុខសណ្តាប់ធ្នាប់សាធារណៈ ដើម្បីបង្កបរិយាកាសកក់ក្ដៅជូនប្រជាពលរដ្ឋមកចូលរួមកម្សាន្ដសប្បាយក្នុងឱកាសបុណ្យចូលឆ្នាំថ្មី ក្រោមម្លប់នៃសុខសន្ដិភាពរបស់ប្រទេសជាតិ ក្រោមការដឹកនាំប្រកបដោយគតិបណ្ឌិត ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕

ដោយ: ឆាយ ម៉ុត