AKP កំពង់ធំ ថ្ងៃទី១៥ ខែមេសា ឆ្នាំ២០២៥-- ក្រោមការដឹកនាំរបស់ឯកឧត្តម នួន ផារ័ត្នអភិបាលខេត្តកំពង់ធំ បានតុបតែងលម្អជាច្រើនកន្លែងដើម្បីទាក់ទាញភ្ញៀវជាតិ និងអន្តរជាតិមកកម្សាន្តសប្បាយនិងថតរូបជាអនុស្សាវរីយ៍។

ស្ថានភាពភ្ញៀវទេសចរ និងបងប្អូនប្រជាពលរដ្ឋមកចូលរួមលេងកម្សាន្តក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខេត្តកំពង់ធំ នាថ្ងៃទី១៤ ខែ មេសា ឆ្នាំ២០២៥ មានចំនួនប្រមាណ១៣២៣៥៩នាក់។ តាមរបាយការណ៍របស់លោក សេង អាន ប្រធានមន្ទីរទេសចរណ៍ ខេត្តកំពង់ធំ បានឱ្យដឹងថាភ្ញៀវជាតិចំនួន ១៣២២០៨នាក់ និងភ្ញៀវបរទេសចំនួន១៥១នាក់ដែលបានទៅទស្សនានៅតាមគោលដៅទេសចរណ៍នានានៅក្នុងខេត្តកំពង់ធំប្រមាណ៣៥៧០នាក់ មកលេងសង្រ្កាន្តកំពង់ធំនៅក្រុងស្ទឹងសែនប្រមាណ៤០២០០នាក់ និងបងប្អូនប្រជាពលរដ្ឋមកលេងតាម បណ្តាវត្តអារាមប្រមាណ៨៨.៥៨៩នាក់។

សម្រាប់ថ្ងៃបុណ្យចូលឆ្នាំប្រពៃណីជាតិខ្មែរថ្ងៃទី១ ក្នុងខេត្តកំពង់ធំមានរៀបចំលេង ល្បែងប្រជាប្រិយមួយចំនួនដូចជា ÷ ប្រដាល់បិទមុខ ឡើងសសរខ្លាញ់ ទូលក្អម ទាញព្រាត់ បោះអង្គុញ បោះឈូង លាក់កន្សែងតំបន់ត្រជាក់ ការប្រគំតន្ត្រីរាំលេងកម្សាន្ត និងកម្មវិធីផ្សេងៗជាច្រើនទៀតបងប្អូនប្រជាពលរដ្ឋចូលលេងយ៉ាងសប្បាយរីករាយពុំមានបង្កអសន្តិសុខនោះឡើយ។

ចំពោះសន្តិសុខសណ្ដាប់ធ្នាប់ ដោយមានការយកចិត្តទុកដាក់ពីកម្លាំងទាំងបីទៅតាមគោលដៅរៀងៗខ្លួនដើម្បីការពារជូនបងប្អូនប្រជាពលរដ្ឋប្រកបដោយសុវត្ថិភាពពុំមានការកកស្ទះសម្រាប់ការធ្វើដំណើរ៕

ដោយ ស៊ុម វណ្ណា