AKP សៀមរាប ថ្ងៃទី១៥ ខែមេសា ឆ្នាំ ២០២៥ --ព្រឹត្តិការណ៍អង្គរសង្ក្រាន្ត ឆ្នាំ២០២៥ ជាមួយនឹងពិធីបុណ្យចូលឆ្នាំប្រពៃណីជាតិខ្មែរ​បងប្អូនប្រជាពលរដ្ឋ​កម្ពុជាមកពីគ្រប់ទិសទី ក៏ដូចជា ភ្ញៀវទេសចរបរទេសបាននាំគ្នាសម្រុកមកកម្សាន្តនៅក្នុងព្រឹត្តិការណ៍​ដ៏អស្ចារ្យនេះ ដែលបានរៀបចំធ្វើឡើងទឹកដីអច្ឆរិយៈក្នុងខេត្ដសៀមរាបប្រកបដោយផូរផង់របស់កម្ពុជា។

មុនថ្ងៃចាប់ផ្ដើមនៃព្រឹត្តិការណ៍អង្គរសង្រ្កាន្តមកដល់ និងក៏ដូចជាថ្ងៃទី១​នៃព្រឹត្តិការណ៍នេះគេឃើញ​បង​ប្អូន​ប្រជាពលរដ្ឋកម្ពុជា ក៏ដូចជាភ្ញៀវបរទេសជាច្រើននាក់នាំគ្នាសម្រុកធ្វើដំណើរមកកម្សាន្ត​នៃទឹកដី​ខេត្ត​សៀមរាប។ ក្នុងបរិរវេណប្រាសាទអង្គរវត្ត ក៏ដូចជាក្នុងក្រុងសៀមរាបមនុស្សរាប់ពាន់ រាប់ម៉ឺននាក់បានមក​ដល់ជាស្រេចសម្រាប់ត្រៀមចូលរួម និងកម្សាន្តសប្បាយក្នុងរយៈពេល៣ថ្ងៃ ពោលគឺចាប់ពីថ្ងៃទី១៤ ដល់ថ្ងៃទី១៦ ខែ មេសា ឆ្នាំ ២០២៥។

ដោយឡែកនៅ ថ្ងៃទី១៣ ខែមេសា ឆ្នាំ២០២៥ គឺមុនព្រឹត្តិការណ៍អង្គរសង្រ្កាន្ត មកដល់មួយថ្ងៃ និងក៏​ដូចជាថ្ងៃទី១ នៃពិធីបុណ្យចូលឆ្នាំប្រពៃណីខ្មែរ ទិដ្ឋភាពនៃបរិវេណប្រាសាទអង្គរវត្តក្រុមសិល្បៈបាននាំ​គ្នា​ហាត់សម និងក៏ដូចជាសម្តែងយ៉ាងរស់រវើកជូនដល់ភ្ញៀវទេសចរ។ ដូចគ្នានេះដែរ ក្រុមយុទ្ធគុនចម្រុះ ខ្មែរបុរាណក៏បានបង្ហាញក្បាច់គុនខ្មែរ នៅខាងមុខប្រាសាទអង្គរវត្ត ពិសេស ក្បាច់គុននីមួយៗជូន​សាធារណជនទស្សនាដូចជាក្បាច់គុនល្បុក្កតោ ក្រពើហា ខ្លាក្រាប ស្រងែពេន គុនអាវុធ ក្បាច់គុន ខ.ភ.ម. ប្រដាល់គុនខ្មែរ និងយុទ្ធក្រមខម។

យុវជន រដ្ឋា រក្សា អ្នកសម្តែងសិល្បៈមួយរូបរបស់ក្រុមយុវជនសហភាពសហព័ន្ធយុវជនកម្ពុជា (ស.ស.យ.ក) បានប្រាប់ឱ្យដឹងថា ឆ្នាំនេះរូបគាត់សប្បាយរីករាយយ៉ាងខ្លាំងដែលបានមកចូលរួម​សម្តែង​សិល្បៈនៅក្នុងព្រឹត្តិការណ៍អង្គរសង្រ្កាន្ត។ យុវជន​ រដ្ឋា បាននិយាយថា ការមកសម្តែងលើកនេះ​ដែរគឺ​មាន​រយៈពេល៥ ថ្ងៃ ចាប់ពីថ្ងៃទី១២ ដល់ថ្ងៃទី១៧ ទើបវិលត្រឡប់ទៅរាជធានីភ្នំពេញវិញ។

យុវជនរូបនេះបានប្រាប់ឱ្យដឹងបន្ថែមថា៖ «ព្រឹត្តិការណ៍អង្គរសង្រ្កាន្តពិតជាសប្បាយរីករាយ និងបានចាត់​ទុកថា​ជាព្រឹត្តការណ៍ដ៏អស្ចារ្យក្នុងការសម្តែងសិល្បៈកម្សាន្តសប្បាយរីករាយក្នុង​ពិធីបុណ្យចូលឆ្នាំថ្មី។ ខ្ញុំ​ពិត​ជា​រីករាយពេលសម្តែងដែលមានទស្សនិកជនយ៉ាងកុះករមកចោមរោមទស្សនា ពិសេសមាន​ទាំងជន​ជាតិបរទេសក៏បានមកមើលយ៉ាងច្រើន ដែលជាទីមោទនភាពពេកណាស់»។

លើកឡើងដូចគ្នានេះដែរយុវជន ហេង គឹមស៊ុន ជាអ្នកដែលបានចូលរួមសម្តែងសិល្បៈ​អង្គរសង្រ្កាន្ត​នៅ​ក្នុងឆ្នាំនេះដែរបានបញ្ជាក់ថា រូបលោករំភើបរីករាយណាស់ នៅពេលដែលបានមកចូលរួមសម្តែងសិល្បៈ​នាឆ្នាំនេះ។ យុវជន គឹមស៊ុន បានបន្ដថា ក្នុងថ្ងៃទី១ និងព្រឹកថ្ងៃទី២នេះមាន មនុស្សកុះករទស្សនា​អង្គរសង្រ្កាន្ត ដែលធ្វើឱ្យរូបលោកជាអ្នកសិល្បៈក៏សប្បាយរីករាយ និងរំភើបទៅជាមួយផងដែរ។

កំពុងតែជក់ចិត្ដដិតអារម្មណ៍ជាមួយនឹងការរៀបចំតុបតែងលម្អរូបភាពប្លែកៗក្នុងព្រឹត្ដិការណ៍អង្គរសង្ក្រាន្ដនេះដែរ កញ្ញា លី សៀកជូ ដែលមកពីរាជធានីភ្នំពេញបានមកទស្សនានៅអង្គរសង្រ្កាន្ត​បានប្រាប់ឱ្យដឹងថា នៅពេលមកដល់ទឹកដីខេត្តសៀមរាបពិសេសមកដល់បរិវេណ អង្គរវត្ត អ្វីដែលកញ្ញាបានចាប់អារម្មណ៍​នោះ​គឺការរៀបចំ តុបតែង ប្រកបដោយសោភ័ណភាព និងកន្លែងកម្សាន្តទាំងនៅតំបន់អង្គរ និងក្រុងសៀម​រាបពិតជាស្រស់ស្អាតគួរឱ្យកោតសរសើរ។

យុវសិស្សមកពីរាជធានីភ្នំពេញរូបនេះបាននិយាយ​ដោយ​បញ្ជាក់​ថា ​ទិដ្ឋភាពការសម្តែងសិល្បៈ ការសម្តែង​ក្រុម​យុទ្ធគុនចម្រុះ ខ្មែរបុរាណ ការតាំងពិព័រណ៍​ទំនិញ…​ជាព្រឹត្តិការណ៍អស្ចារ្យធ្វើឱ្យទស្សនា​មិនចេះនឿយ​ហត់ និងរួមទាំងតំបន់ទេសចរណ៍ច្រើន​រាប់មិនអស់ ធ្វើ​ឱ្យទឹកដីសៀមរាបជាទីកម្សាន្តមិនចេះរីងស្ងួត​នៃទឹក​ដីអច្ឆរិយៈមួយនេះរបស់មនុស្សគ្រប់រូប។

ពាក់ព័ន្ធនឹងការរៀបចំព្រឹត្ដិការណ៍អង្គរសង្ក្រាន្ដនេះដែរ ឯកឧត្តម ឧបនាយករដ្ឋមន្ត្រី ហ៊ុន ម៉ានី ប្រធាន​សហភាព​សហព័ន្ធយុវជនកម្ពុជា និងជាប្រធាន​គណៈ​កម្មការរៀបចំព្រឹត្តិការណ៍អង្គរសង្ក្រាន្ដ បានគូស​បញ្ជាក់ឱ្យដឹងថា ព្រឹត្តិការណ៍ អង្គរសង្ក្រាន្ត ឆ្នាំ២០២៥ មានលក្ខណៈពិសេសជាងឆ្នាំមុនៗ ដែលបង្ហាញពី​ការជួបជុំ​គ្រួសារខ្មែរ ក្នុងសម្លៀកបំពាក់ប្រពៃណី នៅ​មុខប្រាសាទអង្គរវត្ត ខណៈសម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់ហើយថា ក្រៅពីសង្ក្រាន្តនៅតាមរាជ​ធានី-ខេត្ត គឺឱ្យមានការរៀបចំអង្គរសង្ក្រាន្ត សាជាថ្មី នៅខេត្តសៀមរាប ។

ជាមួយគ្នានេះដែរ អាជ្ញាធរជាតិអប្សក៏រាបានសំណូមពរដល់ភ្ញៀវទេសចរគ្រប់រូប ដែលនឹងទៅកម្សាន្ត​ក្នុង​ព្រឹត្តិការណ៍អង្គរសង្ក្រាន្តនាឱកាសបុណ្យចូលឆ្នាំថ្មីប្រពៃណីជាតិខ្មែរឆ្នាំនេះ ចូលរួមរក្សាអនាម័យក្នុង​រមណីយ​ដ្ឋានអង្គរ កុំពិសាគ្រឿងស្រវឹង ឬអាហារផ្សេងៗនៅក្នុងបរិវេណប្រាសាទបុរាណ។ ទន្ទឹមនេះ ការធ្វើដំណើរកម្សាន្តក្នុងតំបន់រមណីយដ្ឋានអង្គរ ត្រូវមានការយោគយល់អធ្យាស្រ័យគ្នា កុំបើកបរ​យាន​យន្ត​បញ្ច្រាសទិស និងចតនៅចំណតរក្សាសណ្តាប់រៀបរយ។ គោរពតាមក្រមប្រតិបត្តិអង្គរ ស្លៀកពាក់ឱ្យ​បានសមរម្យ ចៀសវាងការស្លៀកពាក់មិនសមរម្យ ដែលធ្វើឱ្យប៉ះពាល់ដល់តម្លៃប្រពៃណី និងវប្បធម៌របស់​ជាតិខ្មែរ។

ដោយឡែករដ្ឋបាលខេត្តសៀមរាបវិញបានឱ្យដឹងដែរថា ព្រឹត្តិការណ៍អង្គរសង្ក្រាន្ត ឆ្នាំ២០២៥ ចាប់ពី​ថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ បានរៀបចំឡើងនៅលើទីតាំងចំនួន ៦ ដោយមានកម្មវិធី​ចំនួន ៣៨ កម្មវិធី ដែលសុទ្ធសឹងជាកម្មវិធីដែលផ្ដល់ជូននូវភាពសប្បាយរីករាយដល់មហាគ្រួសារខ្មែរ ពិសេស​យុវជន បានចូលរួមឈ្វេងយល់ពីមរតកវប្បធម៌ខ្មែរជាច្រើនទម្រង់ដែលត្រូវបានលើកយក​មក​រំលេច​នៅក្នុងកម្មវិធីនីមួយៗ ក្នុងគោលដៅបំផុសស្មារតីស្រឡាញ់ និងលើកស្ទួយវប្បធម៌ជាតិ៕​

ដោយ៖ ដេប៉ូ, រូបថត៖ ឃុត សៅ