AKP សៀមរាប ថ្ងៃទី១៤ ខែមេសា ឆ្នាំ២០២៥-រយៈពេលពីរថ្ងៃចាប់ពីថ្ងៃទី១៣និងទី១៤ ខែមេសា ឆ្នាំ ២០២៥ នេះ អាជ្ញាធរជាតិប្រយុទ្ធប្រឆាំងគ្រឿងញៀនសហការជាមួយនឹងក្រសួងទេសចរណ៍ ក្រសួងពាណិជ្ជកម្ម  គណៈកម្មាធិការត្រួតពិនិត្យគ្រឿងញៀនខេត្តសៀមរាប រួមជាមួយនឹងវិស័យឯកជនបានសកម្មភាពផ្សព្វផ្សាយពីបញ្ហាគ្រឿងញៀនក៏ដូចជាការទាញយក App NoDrug  មកប្រើប្រាស់ដើម្បីទទួលបានចំណេះដឹងពីការងារប្រយុទ្ធប្រឆាំងគ្រឿងញៀន។

ឯកឧតនតម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈនៃអាជ្ញាធរជាតិប្រយុទ្ធប្រឆាំងគ្រឿងញៀនបានបញ្ជាក់ថាក្នុងរយៈពេល២ថ្ងៃនេះគឺមហាជនដែលចូលរួមទស្សនាខេត្តសៀមរាបក៏ដូចជាចូលរួមព្រឹត្តិការណ៍អង្គរសង្ក្រាន្ត ឆ្នាំម្សាញ់ សប្តស័ក ព.ស. ២៥៦៩ នេះគឺមានប្រជាពលរដ្ឋយ៉ាងច្រើនកុះករនិងសម្ដែងនូវចំណាប់អារម្មណ៍ខ្លាំងចំពោះការតាំងពីពណ៌របស់អាជ្ញាធរជាតិប្រយុទ្ធប្រឆាំងគ្រឿងញៀនទាំងនៅតំបន់អង្គរក៏ដូចជានៅមាត់ស្ទឹងសៀមរាបពួកគាត់ឆ្លៀតពេលចូលស្វែងយល់ក៏ដូចជាទទួលយកនូវបទពិសោធន៍ថ្មីៗពាក់ព័ន្ធនឹងការងារគ្រឿងញៀនក៏ដូចជា App NoDrug :https://nodrugsnacd.com/download_kh ដែលជាប្រព័ន្ធបច្ចេកវិទ្យាក្នុងការផ្ដល់ចំណេះដឹងកាន់តែរហ័សនិងរាយការណ៍យកបញ្ហាគ្រឿងញៀនចេញពីសហគមន៍។

ក្នុងឱកាសនោះ លោក ឡោ សុវិជ្ជា អគ្គនាយករង តំណាងឱ្យក្រុមការងារប្រយុទ្ធប្រឆាំងគ្រឿងញៀនក្រសួងទេសចរណ៍បានបញ្ជាក់ឱ្យដឹងថា កម្ពុជាគឺជាគោលដៅទេសចរណ៍វបែបវប្បធម៌ បែបវប្បធម៌ប្រវត្តិសាស្ត្រ និងទេសចរណ៍ធម្មជាតិដោយគ្មានគ្រឿងញៀន។
ជាមួយគ្នានេះ ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀនបានមានប្រសាសន៍ដោយពាំនាំនូវការថ្លែងអំណរគុណពីឯកឧត្តមសន្តិបណ្ឌិតនេតសាវឿនឧបនាយករដ្ឋមន្ត្រីប្រធានអាជ្ញាធរជាតិប្រយុទ្ធប្រឆាំងគ្រឿង ញៀនដល់ក្រសួងទេសចរណ៍ ក្រសួងពាណិជ្ជកម្ម គណៈកម្មាធិការត្រួតគ្រឿងញៀនខេត្តសៀមរាប គ្រឹះស្ថានមីក្រូហិរញ្ញវត្ថុអិលអូអិលស៊ី  ខេមបូឌា ក្រុមហ៊ុនទេសចរណ៍ឆាយផល ក្រុមហ៊ុនទឹកសុទ្ធហាយតិច  ដែលបានផ្ដល់នូវកិច្ចសហការចូលរួមរៀបចំការតាំងពិពណ៌នេះទទួលបានការចាប់អារម្មណ៍ពីមហាជនទូទៅហើយការងារនេះអាជ្ញាធរជាតិប្រយុទ្ធប្រឆាំងគ្រឿងញៀនតែងធ្វើការសហការជាមួយដៃគូពាក់ព័ន្ធទាំងអស់សំដៅកៀរគរការចូលរួមធ្វើឲ្យសកម្មភាពប្រព្រឹត្តទៅជាលក្ខណៈពហុវិស័យនិងជាចលនាជាតិរួមមួយ៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន