EN 
FR 
AR
CNបទយកការណ៍៖ ព្រះរាជពិធីបួងសួងចម្រើនសេចក្តីសុខជូនព្រះរាជាណាចក្រកម្ពុជា ជាព្រឹត្តិការណ៍ប្រវត្តិសាស្រ្តសម្រាប់ប្រជាជាតិខ្មែរ
AKP ភ្នំពេញ ថ្ងៃទី១៤ ខែមេសា ឆ្នាំ២០២៥--ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នាព្រឹកថ្ងៃទី១៤ ខែមេសា ឆ្នាំ២០២៥ ព្រះអង្គបានយាងជាព្រះរាជាធិបតីភាពដ៏ខ្ពង់ខ្ពស់បំផុត ក្នុងព្រះរាជពិធីបួងសួងចម្រើនសេចក្តីសុខសម្រាប់ព្រះរាជាណាចក្រកម្ពុជា ដែលជាព្រឹត្តិការណ៍ប្រវត្តិសាស្រ្តសម្រាប់ប្រជាជាតិខ្មែរ។ ព្រឹត្តិការណ៍នៃពិធីសាសនាដ៏ធំនេះ ធ្វើឡើងក្នុងគោលបំណងដើម្បីនាំមកនូវសេចក្តីសុខចម្រើន និងបញ្ចៀសអពមង្គលផ្សេងៗក្នុងព្រះរាជាណាចក្រកម្ពុជា ព្រមទាំងថ្វាយព្រះសព្ទសាធុការពរចំពោះ ព្រះករុណា ព្រះមហាក្សត្រ និងសម្ដេចព្រះមហាក្សត្រី ព្រះវររាជមាតាជាតិខ្មែរ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ។ ហើយនេះជាព្រឹត្តិការណ៍ប្រវត្តិសាស្ត្រមានតម្លៃខាងអរិយធម៌ដែលបន្សល់ទុកមកនៅក្នុងសង្គមកម្ពុជាតាំងពីយូរយារណាស់មកហើយដើម្បីបង្ហាញនូវកម្លាំងសាមគ្គីភាពជាតិ។
នៅក្នុងព្រឹត្តិការណ៍ជាប្រវត្តិសាស្ត្រនេះ គេសង្កេតឃើញវត្តមាន សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ឥស្សរជនជាថ្នាក់ដឹកនាំព្រឹទ្ធសភា រដ្ឋសភា រាជរដ្ឋាភិបាល និងបណ្តាអង្គទូត ថ្នាក់ដឹកនាំ និងមន្ត្រីសង្ឃ មន្ត្រីអ្នកមុខអ្នកការ ព្រមទាំងប្រជាពលរដ្ឋបានចូលរួមយ៉ាងច្រើនកុះករ។
នៅវេលាម៉ោង៨ព្រឹក ព្រះករុណា ព្រះមហាក្សត្រ ស្តេចយាងដល់ និងយាងថ្វាយគ្រឿងសក្ការបូជា ជាមួយសម្លេងភ្លេងពិណពាទ្យប្រគំឡើង បន្ទាប់មកព្រះមហាក្សត្រ ស្តេចយាងគង់ប្រថាប់លើព្រះទីនាំងកៅអី។ ព្រះរាជពិធីចាប់ផ្តើម សម្តេចព្រះមហាសង្ឃរាជ សម្តេចព្រះសង្ឃនាយករងទី១ សម្តេចព្រះសង្ឃក្នុងឋានានុក្រម ព្រះរាជាគណៈ និងព្រះមន្ត្រីសង្ឃចំនួន ៧៩ ព្រះអង្គស្វាធ្យាយជយន្តោ។ បន្ទាប់មក អ្នកឧកញ៉ាភក្តីព្រះស្តេច ហេង គឹមគុណ នាយកធម្មការ-សាសនាព្រះបរមរាជវាំង បានប្រកាសបួងសួង។ ស្គរជ័យបន្លឺឡើង ការសម្តែងរបាំថ្វាយគ្រឿងសង្វោយ (តង្វាយ) និង របាំបួងសួងចាប់ផ្តើមជាមួយការសម្តែងថ្វាយដោយក្រុមរបាំព្រះរាជទ្រព្យ និងពិធីនមស្ការព្រះរតនត្រ័យសមាទានសីល។ អារាធនា យាង និមន្ត សម្តេចព្រះមហាសង្ឃរាជ សម្តេចព្រះសង្ឃនាយករងទី១ សម្តេចព្រះសង្ឃក្នុងឋានានុក្រម ព្រះរាជាគណៈ និងព្រះមន្ត្រីសង្ឃចំនួន ៧៩ ព្រះអង្គស្វាធ្យាយព្រះបរិត្ត។ ព្រះរាជពិធីវេរព្រះរាជាយុវឌ្ឍនភត្ត និងបត្តិទានគាថា យាងនិមន្ត សម្តេចព្រះមហាសង្ឃរាជ សម្តេចព្រះសង្ឃនាយករងទី១ សម្តេចព្រះសង្ឃនាយករង សម្តេចព្រះសង្ឃក្នុងឋានានុក្រម ព្រះរាជាគណៈ និងព្រះមន្ត្រីសង្ឃចំនួន ៧៩ ព្រះអង្គ គោចរបិណ្ឌបាត។
ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ស្តេចយាង ថ្វាយ ប្រគេនត្រៃលៀង និងចតុប្បច្ច័យ សម្តេចព្រះមហាសង្ឃរាជ សម្តេចព្រះសង្ឃនាយករងទី១ សម្តេចព្រះសង្ឃក្នុងឋានានុក្រម ព្រះរាជាគណៈ និងព្រះមន្ត្រីសង្ឃទាំងពីរគណៈ ៧៩ព្រះអង្គ។ បន្ទាប់មក សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងព្រះញាតិវង្សានុវង្សថ្វាយប្រគេនបន្ត។
ការរៀបចំពិធីបួងសួងចម្រើនសេចក្តីសុខនៅពេលនេះ គឺដើម្បីបួងសួងដល់អស់ទេវតាវត្ថុស័ក្តិសិទ្ធិ និងបារមីរបស់អតីតព្រះមហាក្សត្រគ្រប់ព្រះអង្គ ក្នុងតំបន់អង្គរឱ្យជួយថែរក្សាព្រះរាជាណាចក្រកម្ពុជា និងប្រជានុរាស្រ្តកម្ពុជា ឱ្យបានជួបប្រទះតែសេចក្តីសុខ សន្តិភាព សម្បូរសប្បាយរុងរឿង។ ជាពិសេសផងដែរនោះគឺដើម្បីរំដោះគ្រោះបណ្តាសាឱ្យខ្មែរ រួចចាកផុតពីគ្រោះកាចចង្រៃឈប់ឈ្លោះទាស់ទែងខ្វែងគំនិតបង្កើតសង្គ្រាម ងាកមករួមគ្នាសាងជាតិឱ្យថ្កុំថ្កើង ក្រោមការដឹកនាំប្រកបដោយទស្សនៈវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
បើតាមមន្ត្រីជាន់ខ្ពស់ក្រសួងព្រះបរមរាជវាំងធ្លាប់បានគូសបញ្ជាក់ថា ការជ្រើសរើសមុខប្រាសាទអង្គរវត្តធ្វើជាទីតាំងសម្រាប់ប្រារព្ធព្រះរាជពិធីនេះ ដោយសារតែទីតាំងនោះមានទំនាក់ទំនងគ្នាយ៉ាងជិតស្និទ្ធរវាងកេរដំណែលប្រវត្តិសាស្ត្រ និងព្រលឹងបុព្វបុរសខ្មែរ។ អង្គរវត្តជាទឹកដីដ៏ស័ក្ដិសិទ្ធិនៃព្រលឹងបុព្វបុរសខ្មែរ និងជាទីតាំងដ៏រុងរឿងនៃប្រទេសខ្មែរកាលពីសម័យបុរាណ។ ដូច្នេះទីតាំងនៅទីនោះមានអំណោយផលល្អសម្រាប់ការប្រារព្ធព្រះរាជពិធីនេះបួងសួងចម្រើនសេចក្តីសុខជូនដល់ព្រះរាជាណាចក្រកម្ពុជា។ ព្រះរាជពិធីនេះនឹងក្លាយជាព្រឹត្តិការណ៍ប្រវត្តិសាស្ត្រមួយរបស់កម្ពុជាថែមទៀតផង។
ព្រះរាជពិធីនេះមិនត្រឹមតែឆ្លុះបញ្ចាំងអំពីសីលធម៌របស់ប្រជាជនខ្មែរដែលមានការគោរពដឹងគុណចំពោះម្ចាស់ទឹកម្ចាស់ដី ទេវតារក្សាលោកនិងបុព្វបុរសខ្មែរគ្រប់ជំនាន់ប៉ុណ្ណោះទេ ហើយវាក៏បាន ឆ្លុះបញ្ចាំងពីទំនៀមទម្លាប់និងប្រពៃណីដែលជាផ្នែកមួយនៃអត្តសញ្ញាណជាតិនិងវប្បធម៌ខ្មែរដែលប្រជាជនតែងតែប្រារព្ធធ្វើតាមស្រុកតាមភូមិនីមួយៗ ។ ការប្រារព្ធព្រះរាជពិធីនេះនៅទីនេះក៏ ជាការរួមចំណែកផ្សព្វផ្សាយពីវប្បធម៌ខ្មែរ និងសំណង់ស្ថាបត្យកម្មខ្មែរបុរាណទៅកាន់ពិភពលោកក៏ដូចជាការទាក់ទាញទេសចរជាតិនិងអន្តរជាតិមកទស្សនានៅប្រទេសកម្ពុជាផងដែរ។
លោកពូ ណម មឿន រស់នៅរាជធានីភ្នំពេញ ដែលបានអញ្ជើញមកលេងអង្គរសង្ក្រាន្ត នៅព្រឹកថ្ងៃទី១៤ ខែមេសា ឆ្នាំ២០២៥ នេះបានថ្លែងថា៖ “ខ្ញុំពិតជាសប្បាយរីករាយណាស់ ដែលបានឃើញពិធីបួងសួងចម្រើនសេចក្តីសុខជូនដល់ប្រទេសជាតិរបស់យើង ដោយព្រះមហាក្សត្រផ្ទាល់ព្រះអង្គ នៅលើទឹកដីដ៏ស័ក្តិសិទ្ធិមួយនេះ”។ លោកពូបន្តថា យើងសប្បាយរីករាយណាស់ដែលបានរស់នៅក្រោមម្លប់នៃសុខសន្តិភាព យើងពិតជាចង់ឱ្យប្រទេសរបស់យើងមានសុខសន្តិភាពណាស់ ព្រោះនៅពេលមានសុខសន្តិភាព យើងរស់នៅដោយសេចក្តីស្ងប់សុខ ប្រកបរបររកទទួលទានទៅតាមសមត្ថភាពដែលខ្លួនមាន មិនបំពានអ្នកណា នេះហើយជាអ្វីដែលប្រជាពលរដ្ឋយើង ក៏ដូចជារូបខ្ញុំចង់បាន។
ជាមួយនេះលោកពូក៏បានអំពាវនាវសូមបងប្អូនជនរួមជាតិទូទាំងព្រះនគរ តាំងចិត្តជ្រះថ្លាចូលរួមបួងសួង អធិដ្ឋានដល់បារមីវត្ថុស័ក្តិសិទ្ធិក្នុងលោក ទេវតាថែរក្សាទឹកដីព្រះរាជាណចក្រកម្ពុជា ដ៏មានឫទ្ធីចេស្តាគ្រប់ព្រះអង្គយាងប្រោះព្រំថែរក្សាព្រះរាជាណចក្រកម្ពុជា និងព្រះករុណាជាអម្ចាស់ជីវិតលើត្បូង ថ្នាក់ដឹកនាំជាតិ ព្រមទាំងប្រជានុរាស្ត្រគ្រប់ខេត្តខណ្ឌបូរី នូវសព្ទសាធុការពរជ័យ សិរីបវរមហាប្រសើរគ្រប់ប្រការ។
យុវជន សែម រស្មី ដែលកំពុងធ្វើការងារជាយុវជនស្ម័គ្រចិត្ត បានអរគុណសន្តិភាព និងបង្ហាញពីការចូលរួម និងអំពាវនាវឱ្យមានការចូលរួមថែរក្សាការពារសន្តិភាព ដែលបានមកដោយលំបាកនេះផងដែរ ។
យុវជន សែម រស្មី បាននិយាយដោយមោទនភាពថា៖ «ខ្ញុំស្រលាញ់សន្តិភាព ខ្ញុំចង់បានសន្តិភាព ខ្ញុំអត់ចង់បានសង្គ្រាមដូចប្រទេសដទៃទេ។ សន្តិភាព គឺសំខាន់ណាស់ បើអត់មានសន្តិភាព យើងមិនអាចមានលទ្ធភាពរៀនសូត្រ និងធ្វើការងារបានទេ។ សន្តិភាពមានតម្លៃកាត់ថ្លៃមហាសាលគ្មានអ្វីដែលអាចកាត់ថ្លៃបានទេ បើគ្មានសន្តិភាពគឺគ្មានការអភិវឌ្ឍអ្វីទាំងអស់»។
យុវជនរស្មីបន្តថា៖ «ទោះបីខ្ញុំមិនបានឆ្លងកាត់សង្គ្រាម តែតាមរយៈការមើលព័ត៌មាននៅជុំវិញពិភពលោក ដូចជាសង្គ្រាមនៅអ៊ុយក្រែន និងនៅប៉ាឡេស្ទីន ជាដើម វាធ្វើឱ្យបែកបាក់គ្រួសារ បាត់បង់បងប្អូនញាតិសន្តាន ហើយអ្វីៗគ្រប់យ៉ាងគឺត្រូវបាត់បង់ទាំងអស់។ សេចក្តីសុខកើតចេញពីសន្តិភាព មានសន្តិភាពទើបរក្សាបានសេចក្តីសុខ ខ្ញុំអរគុណសន្តិភាព រួមគ្នាការពារសន្តិភាព កុំឱ្យមានសង្គ្រាម ព្រោះសង្គ្រាមគឺវេទនាណាស់»។
នៅក្នុងព្រឹត្តិការណ៍នោះ អ្នកឧកញ៉ាភក្តីព្រះស្តេច ហេង គឹមគុណ បានប្រកាសបួងសួង ហើយលោកអាចារ្យ ក៏បានធ្វើពិធីឧទ្ទិសបួងសួងសូមព្រះបារមីដ៏ស័ក្តិសិទ្ធិ ដែលគង់ប្រថាប់ថែរក្សានៅលើទឹកដីប្រវត្តិសាស្ត្រ អង្គរដ៏បវរនៃយើង ក៏ដូចនៅក្នុងកម្ពុជរដ្ឋទាំងមូល ព្រមទាំងបារមីលោកតារាជ ព្រះអង្គគោកធ្លក ព្រះអង្គងោក និងព្រះអង្គចេកព្រះអង្គចម លោកយាយទេព តាដំបងដែក ព្រះអង្គតូច ព្រះអង្គធំ គង់នៅខ្នងភ្នំគូលែន និងបារមីអរុក្ខអរក្សអ្នកតាគ្រប់ទិសទី និងទេវតាគង់ថែរក្សានៅ តាមប្រាង្គប្រាសាទនានា នៅលើទឹកដីដ៏ស័ក្តិសិទ្ធិ តាមជួយថែរក្សានូវថ្នាក់ដឹកនាំប្រទេសកម្ពុជា ប្រជាពលរដ្ឋកម្ពុជា ឱ្យជួបតែសេចក្តីសុខចម្រើន។ ពិធីសាសនាកម្មមួយនេះក៏ដើម្បីបួងសួងចម្រើនសេចក្តីសុខជូនដល់ព្រះរាជាណាចក្រកម្ពុជា និងប្រជាពលរដ្ឋគ្រប់រូប ហើយលើសពីនេះបំណងសំខាន់នៃការរៀបចំពិធីនេះក៏ដើម្បីដឹងគុណដល់បុព្វបុរសខ្មែរ ដែលបានសាងសង់ប្រាសាទអង្គរ និងប្រាង្គប្រាសាទបុរាណរាប់ពាន់ទៀតសម្រាប់ទុកជូនកូនចៅជំនាន់ក្រោយនេះ។
ព្រះរាជពិធីបួងសួងនេះនឹងក្លាយជាព្រឹត្តិការណ៍ប្រវត្តិសាស្ត្រដោយទទួលបានព្រះរាជកិត្តិយសដ៏ខ្ពង់ខ្ពស់បំផុតដែល ព្រះករុណា ព្រះមហាក្សត្រ ទ្រង់គង់ប្រថាប់ជាព្រះរាជាធិបតីក្នុងព្រះរាជពិធីដោយផ្ទាល់។ ប្រជាពលរដ្ឋខ្មែរទាំងអស់ទូទាំងប្រទេសតាំងចិត្តជ្រះថ្លា ចូលរួមបួងសួងអធិដ្ឋានដល់បារមីវត្ថុសក្តិសិទ្ធិក្នុងលោក ទេវតាថែរក្សាទឹកដីព្រះរាជាណាចក្រកម្ពុជាដ៏មានឫទ្ធិចេស្តាគ្រប់ព្រះអង្គ យាងប្រោះព្រំថែរក្សាព្រះរាជាណាចក្រកម្ពុជា និងព្រះករុណាជាអម្ចាស់ជីវិតលើត្បូង។ ការប្រារព្ធព្រះរាជពិធីនេះទៀតសោតក៏ជាការរួមចំណែកផ្សព្វផ្សាយពីវប្បធម៌ខ្មែរ និងសំណង់ស្ថាបត្យកម្មខ្មែរបុរាណទៅកាន់ពិភពលោក និងជួយទាក់ទាញទេសចរជាតិ និងអន្តរជាតិមកទស្សនានៅប្រទេសកម្ពុជា។ ម្យ៉ាងវិញទៀត ព្រះរាជពិធីនេះមិនត្រឹមតែឆ្លុះបញ្ចាំងអំពីសីលធម៌របស់ប្រជាជនខ្មែរ ដែលមានការគោរពដឹងគុណចំពោះម្ចាស់ទឹកម្ចាស់ដី ទេវតារក្សាលោក និងបុព្វបុរសខ្មែរគ្រប់ជំនាន់ប៉ុណ្ណោះទេ វាក៏បានឆ្លុះបញ្ចាំងពីទំនៀមទម្លាប់ និងប្រពៃណីដែលជាផ្នែកមួយនៃអត្តសញ្ញាណជាតិ និងវប្បធម៌ខ្មែរដ៏ល្អផូរផង់ ដែលប្រជាជនតែងតែប្រារព្ធធ្វើតាមស្រុកតាមភូមិនីមួយៗផងដែរ៕
ដោយ បាន ច័ន្ទតារារិទ្ធ
