AKP កំពង់ធំ ថ្ងៃទី១៤ ខែមេសា ឆ្នាំ២០២៥-- នៅស្នាក់ការគណបក្សប្រជាជនកម្ពុជាខេត្តកំពង់ធំ កាលពីរសៀលថ្ងៃទី១៣ ខែមេសា ឆ្នាំ២០២៥ បាននិមន្តព្រះសង្ឃ សូត្រមន្ត ប្រោះព្រំលើករាសី ដល់ថ្នាក់ដឹកនាំមន្ត្រីរាជការគណបក្សជួបតែសេចក្ដីសុខសេចក្ដីចម្រើនទទួលបានជោគជ័យ គ្រប់ភារកិច្ចរបស់ខ្លួនបន្ថែមទៀតសម្រាប់ឆ្នាំថ្មីឆ្នាំម្សាញ់ សប្តស័កព.ស២៥៦៩ ដោយមានការចេញចូលរួមពីឯកឧត្តម នួន ផារ័ត្ន ប្រធានគណបក្សប្រជាជនកម្ពុជាខេត្តកំពង់ធំ និងថ្នាក់ដឹកនាំមន្រ្តីគណបក្សគ្រប់លំដាប់ថ្នាក់។

ពិធីសូត្រមន្ត ប្រោះព្រំលើករាសីទទួលអំណរសាទរទេវតាឆ្នាំថ្មីប្រព្រឹត្តទៅតាមគន្លង ប្រពៃណីព្រះពុទ្ធសាសនា ដោយបាននិមន្តព្រះសង្ឃចំនួន០៧ព្រះអង្គ សូត្រមន្តចម្រើនព្រះបរិត្ត ជយន្តោសុំសិរីសួស្តីកើតមានដល់ថ្នាក់ដឹកនាំ មន្រ្តីគណបក្សគ្រប់លំដាប់ថ្នាក់នៅក្នុងកិច្ចការឆ្នាំថ្មីទទួលបានជោគជ័យ។

ឯកឧត្តម នួន ផារ័ត្ន បានគូសបញ្ជាក់ថា ក្នុងរយៈពេលមួយឆ្នាំកន្លងមកនេះ គណបក្សប្រជាជនកម្ពុជាខេត្តកំពង់ធំ ទទួលបានជោគជ័យ និងមានសមិទ្ធផលថ្មីៗជាបន្តបន្ទាប់ ក្នុងការដឹកនាំគ្រប់គ្រងលើកិច្ចការងារជំនាញរបស់ខ្លួនគួរឱ្យកត់សម្គាល់។ ជោគជ័យដែលជាផ្លែផ្ការបស់គណបក្សនាពេលនេះ គឺដោយសារការចូលរួមរបស់ក្រុមការងារគ្រប់លំដាប់ថ្នាក់ដែលជាមន្រ្តីជំនាញក្នុងអង្គភាពបានខិតខំយកចិត្តទុកដាក់ ក្នុងការអនុវត្តបានតាមផែនការនានា។

ប្រធានគណបក្សប្រជាជនកម្ពុជាខេត្តកំពង់ធំ ឯកឧត្តម នួន ផារ័ត្ន បានបញ្ជាក់ទៀតថានការចូលរួមពីមន្រ្តីគណបក្សនាថ្ងៃនេះដើម្បីបានជួបជុំគ្នា និងបានធ្វើបុណ្យឧទ្ទិសកុសលផលបុណ្យជូនដល់វិញ្ញាណក្ខន្ធ ជីដូនជីតា បុព្វការីជន ដែលបានចែកឋានទៅហើយនោះមកទទួលយកមនុញ្ញផល និង ប្រោះព្រំប្រសិទ្ធិពរជ័យ សិរីមង្គល បវរសួស្តី វិបុលសុខគ្រប់ប្រការកើតមានដល់ក្រុមគ្រួសារមន្រ្តីរាជការ ទទួលបានជោគជ័យថ្មីៗសម្រាប់ឆ្នាំបន្តទៀតដោយរួមគ្នាអនុវត្តឱ្យបាននូវផែនការថ្មីៗជាបន្តទៀត៕

ដោយ ស៊ុម វណ្ណា