AKP កំពង់ធំ ថ្ងៃទី១៣ ខែមេសា ឆ្នាំ២០២៥-- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នាព្រឹកថ្ងៃទី១៣ ខែមេសា ឆ្នាំ២០២៥ បានដឹកនាំកិច្ចប្រជុំប្រកាសសមាសភាពបែងចែកវេនប្រចាំការ ប្រចាំបញ្ជា និងរៀបចំកងកម្លាំងសម្រាប់ត្រៀមចល័តអន្តរាគមន៍ដោះស្រាយជាយថាហេតុផ្សេងៗ ដែលអាចកើតមានឡើងនៅក្នុងភូមិសាស្ត្រខេត្តក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដោយកិច្ចប្រជុំនេះប្រព្រឹត្តទៅនៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទិ៤។
 
លោក វរសេនីយ៍ទោ ស៊ុន សាម៉ុន នាយការិយាល័យទី១នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងអានសេចក្តីសម្រេចស្ដីពីការរៀបចំបែងចែកសមាសភាពតាមវេនប្រចាំការ ប្រចាំបញ្ជាតាមថ្ងៃនីមួយៗ និងប្រកាសសមាសភាពកងកម្លាំងអន្តរាគមន៍ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឆ្នាំម្សាញ់ សប្តស័ក ព.ស២៥៦៩ ដែលនឹងឈានចូលមកដល់នៅថ្ងៃទី១៤-១៦ខែមេសា ឆ្នាំ២០២៥។

ឧត្តមសេនីយ៍ទោ សោម ស៊ុន បានសុំនូវការយោគយល់ និងអធ្យាស្រ័យចំពោះក្រុមគ្រួសារ ក៏ដូចជាយោធិនដែលមានឈ្មោះត្រូវចំវេនប្រចាំការ ប្រចាំបញ្ជា និងត្រៀមអន្តរាគមន៍នៅចំថ្ងៃបុណ្យចូលឆ្នាំថ្មីប្រពៃណីជាតិហើយមិនបានឈប់សម្រាកជួបជុំក្រុមគ្រួសារ ព្រោះនេះជាភារកិច្ចរបស់កងកម្លាំងប្រដាប់អាវុធ ក្នុងពេលដែលប្រជាជនសប្បាយរីករាយយើងត្រូវមានភារកិច្ចការពារ និងបម្រើប្រជាជនឱ្យទទួលបានសេចក្តីសុខ និងសេចក្តីសប្បាយរីករាយជូនប្រជាជនយើងព្រោះកងទ័ពជាកូនជាចៅរបស់ប្រជាជនអ្វីៗដើម្បីប្រជាជន។

ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ក៏បានណែនាំដល់មេបញ្ជាការគ្រប់បណ្ដាលកងឯកភាព និងបណ្ដាស្ថាប័នដែលមានការពាក់ព័ន្ធ ត្រូវទទួលខុសត្រូវខ្ពស់ក្នុងកិច្ចសហប្រតិបត្តិការ ជាមួយកងកម្លាំងប្រដាប់អាវុធទាំងបី និងអាជ្ញាធរដែនដីដោយស្មារតីទទួលខុសត្រូវខ្ពស់ក្នុងការ ការពារសន្តិសុខ សុវត្ថិភាពនៅតំបន់ទីប្រជុំជន នឹងតំបន់រមណីយដ្ឋាននានា ដែលប្រជាជនកំពុងជួបជុំសប្បាយរីករាយ ក្នុងឱកាសបុណ្យចូលឆ្នាំថ្មីឱ្យទទួលបាននូវសុវត្ថិភាពនិងជោគជ័យក្នុងភារកិច្ចការពារបម្រើប្រជាជន។

ក្នុងឱកាសនោះ ឧត្តមសេនីយ៍ទោ សោម ស៊ុន បានប្រគល់គុយទាវកញ្ចប់ និងភេសជ្ជៈមួយចំនួន ដែលជាអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវ តាមរយៈឯកឧត្តមនាយឧត្តមសេនីយ៍ ម៉ៅ សុផាន់ ជូនដល់កងកម្លាំងដែលមានភារកិច្ចប្រចាំការ ប្រចាំបញ្ជា នៅក្នុងទីបញ្ជាការតំបន់ប្រតិបត្តិការសឹករងកំពង់ធំ ក្នុងឱកាសបុណ្យចូលឆ្នាំថ្មី សម្រាប់ការហូបចុកក្នុងថ្ងៃតាមវេននីមួយៗផងដែរ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)