AKP ព្រះសីហនុ ថ្ងៃទី១៣ ខែមេសា ឆ្នាំ២០២៥-- ឯកឧត្តម ម៉ាង ស៊ីណេត អភិបាលនៃគណ:អភិបាលខេត្តព្រះសីហនុ បានអញ្ជើញសំណេះសំណាលសួរសុខទុក្ខកងកម្លាំងអង្គភាពបង្ក្រាបបទល្មើសលើផ្ទៃសមុទ្រ វរសេនាតូចនគរបាលការពារព្រំដែនទឹកលេខ២៤០ ស្នងការដ្ឋាននគរបាលខេត្ត កងរាជអាវុធហត្ថខេត្ត តំបន់ប្រតិបត្តិការសឹករងព្រះសីហនុ និងអង្គភាពប្រឆាំងភេរវកម្មប្រចាំខេត្តព្រះសីហនុ ដោយមានការចូលរួមពីលោកអភិបាលរងខេត្ត លោកនាយករដ្ឋបាលសាលាខេត្ត នៅព្រឹកថ្ងៃអាទិត្យ ទី១៣ ខែមេសា ឆ្នាំ២០២៥។

ទន្ទឹមនឹងនេះ ឯកឧត្តម ម៉ាង ស៊ីណេត បានថ្លែងអំណរគុណចំពោះអង្គភាពនៃកងកម្លាំងប្រដាប់អាវុធរបស់យើងទាំងអស់នៅក្នុងខេត្តព្រះសីហនុ ដែលបានចូលរួមជាមួយគណ:បញ្ជាការឯកភាពរដ្ឋបាលខេត្តព្រះសីហនុ បំពេញការងារតួនាទី ភារកិច្ច ពិសេសផ្តោតលើការងារសន្តិសុខក្នុងខេត្តព្រះសីហនុ ក៏ដូចជាខេត្តតំបន់ឆ្នេរទាំង៤ មានដូចជាខេត្តព្រះសីហនុ កោះកុង កំពត និងខេត្តកែប។ យើងបានធ្វើការងារជាមួយគ្នាក្នុងក្របខ័ណ្ឌការពារសន្តិសុខ សុវត្ថិភាពសង្គមជូនបងប្អូនប្រជាពលរដ្ឋ ភ្ញៀវជាតិ អន្តរជាតិ និងអ្នកវិនិយោគិន។ កងកម្លាំងរបស់យើងខ្លះ ថ្វីត្បិតបម្រើការងារផ្តោតលើផ្ទៃសមុទ្រ ក៏ប៉ុន្តែកងកម្លាំងរបស់យើងបានបំពេញការងារនៅលើគោកជាមួយរដ្ឋបាលខេត្តព្រះសីហនុបានល្អ។ ទន្ទឹមនោះកងកម្លាំងរបស់យើងបានចូលរួមការពារថ្នាក់ដឹកនាំកំពូលដែលបានមកបំពេញទស្សនកិច្ចនៅខេត្តព្រះសីហនុ ជាពិសេសការបង្ក្រាបបទល្មើសគ្រឿងញៀន ក្មេងទំនើង និងការងារភូមិ ឃុំ សង្កាត់មានសុវត្ថិភាព ការងារជួយ សង្គ្រោះគ្រោះធម្មជាតិក្នុងខេត្តព្រះសីហនុ។ យើងបន្តការងារនេះជាមួយគ្នា និងចាប់ដៃគ្នាចូលរួមបំពេញការងារប្រកបដោយការទទួលខុសត្រូវ ហើយអ្វីដែលយើងត្រូវតាមដានអនុវត្តបន្តក្នុងឆ្នាំថ្មី គឺដើម្បីការពារសន្តិសុខ សុវត្ថិភាពសង្គមជូនប្រជាពលរដ្ឋ ភ្ញៀវទេសចរជាតិ-អន្តរជាតិ និងអ្នកវិនិយោគ ដែលជាមូលដ្ឋានគ្រឹះក្នុងការគាំទ្ររាជរដ្ឋាភិបាលស្របច្បាប់ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដឹកនាំប្រទេសឈានឆ្ពោះទៅចក្ខុវិស័យ២០៥០ និងរុញច្រានប្រទេសកម្ពុជា ជាប្រទេសដែលមានចំណូលខ្ពស់។

ឯកឧត្តមអភិបាលខេត្តព្រះសីហនុបានបញ្ជាក់ថា យើងត្រៀមខ្លួនជាស្រេចការពារសុខសុវត្ថិភាពសង្គម ជាមូលដ្ឋានគ្រឹះឆ្ពោះទៅចក្ខុវិស័យឆ្នាំ២០៥០។ ដូច្នេះយើងទាំងអស់គ្នាជាកងកម្លាំងប្រដាប់អាវុធត្រូវបំពេញតួនាទី ភារកិច្ចការពារសន្តិសុខ សុវត្ថិភាពជូនប្រជាពលរដ្ឋក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ដោយសហការជាមួយមន្ទីរ អង្គភាពនានា ដើម្បីភាពសុខសាន្តរបស់ខេត្តយើង នេះជាកិត្តិយសសម្រាប់កងកម្លាំង ជាកិត្តិយសរបស់ខេត្ត និងជាកិត្តិយសរបស់ជាតិរបស់យើងផងដែរ។

ឯកឧត្តមអភិបាលខេត្តក៏បានផ្តល់អនុសាសន៍៖ ១. ក្រោមការដឹកនាំរបស់លោកឧត្តមសេនីយមេបញ្ជាការ នៃកងកម្លាំងប្រដាប់អាវុធទាំងអស់មានស្នាដៃក្នុងការគ្រប់គ្រងអង្គភាព និងគ្រប់គ្រងសភាពការសម្រាប់សន្តិសុខខេត្តព្រះសីហនុ ជាពិសេសការក្តាប់ឱ្យបាននូវសភាពការដែលជាគោលការណ៍គ្រឹះក្នុងការថែរក្សាសុខសន្តិភាព ហើយការលះបង់កម្លាំងកាយ ប្រាជ្ញា ស្មារតីរបស់កងកម្លាំងរបស់យើងសម្រាប់បន្តវេនដែលជាបេសកកម្មក្នុងការគ្រប់គ្រងសភាពការរួម ហើយបទពិសោធន៍ទាំងនេះ យើងត្រូវយកមកអនុវត្តឪ្យមានប្រសិទ្ធិភាព ប្រសិទ្ធិផលបន្តែមទៀតសម្រាប់ប្រជាពលរដ្ឋខេត្តព្រះសីហនុ។ ២. រួមដៃគ្នាសហការជាមួយមន្ទីរ អង្គភាពនានា ឈានឆ្ពោះទៅសម្រេចចក្ខុវិស័យឆ្នាំ២០៥០កម្ពុជា ជាប្រទេសដែលមានចំណូលខ្ពស់ ដើម្បីធានាថា សេដ្ឋកិច្ចរបស់កម្ពុជាកាន់តែរីកចម្រើន យើងជាកងកម្លាំងត្រូវមានតួនាទីការពារសន្តិសុខ សុវត្ថិភាពជូនប្រជាពលរដ្ឋ ក្នុងឱកាសពិធីបុណ្យចូលឆ្នាំថ្មី ក៏ដូចជាបុណ្យជាតិផ្សេងៗទៀតដោយសហការជាមួយមន្ទីរ អង្គភាព ហើយកិច្ចសហការ ជាកិត្តិយសនៃកងកម្លាំងរបស់យើង ជាកិត្តិយសរបស់ខេត្ត ជាកិត្តិយសរបស់ជាតិយើងទាំងអស់គ្នា ព្រមទាំងជូនពរជ័យ សិរីសួស្តី មហាប្រសើដល់កងកម្លាំងប្រដាប់អាវុធ និងក្រុមគ្រួសារឱ្យមានសេចក្តីសុខចម្រុងចម្រើនគ្រប់ៗគ្នាក្នុងឱកាសពិធីបុណ្យចូលឆ្នាំថ្មី២០២៥។

បន្ទាប់មក ឯកឧត្តម ម៉ាង ស៊ីណេត ក៏បាននាំយកអំណោយរបស់សម្តេចធិបតី ហ៊ុន ម៉ាណែត និងលោកជំទាវបណ្ឌិត ឧបត្តម្ភជូនអង្គភាពបង្ក្រាបបទល្មើសលើផ្ទៃសមុទ្រ និងវរសេនាតូចនគរបាលការពារព្រំដែនទឹកលេខ២៤០ ស្នងការដ្ឋាននគរបាលខេត្ត កងរាជអាវុធហត្ថខេត្ត តំបន់ប្រតិបត្តិការសឹករងព្រះសីហនុ និងអង្គភាពប្រឆាំងភេរវកម្ម ក្នុងមួយអង្គភាពទទួលបាន ទឹកសុទ្ធ១០០កេស ស្រាបៀរស្ទឹងខៀវ ៥០កេស ស្រាបៀរគ្រុឌ ៦០កេស និងថវិកា១០លានរៀល៕

ដោយ ងូ សុមុនី