AKP បន្ទាយមានជ័យ ថ្ងៃទី១៣ ខែមេសា ឆ្នាំ២០២៥-- ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ ឆស័ក ព.ស. ២៥៦៩ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានបង្ហាញការយកចិត្តទុកដាក់ខ្ពស់ចំពោះកម្លាំងប្រជាការពារដែលជាកម្លាំងស្នូលក្នុងការថែរក្សាសន្តិសុខ សណ្តាប់ធ្នាប់ ក្នុងមូលដ្ឋាន។ ជាក់ស្តែងនៅព្រឹកថ្ងៃទី១៣ ខែមេសា ឆ្នាំ២០២៥នេះ ឯកឧត្តមបានអញ្ជើញជាអធិបតីភាពក្នុងពិធីសំណេះសំណាលជាមួយប្រជាការពារមកពីសង្កាត់ទាំង៧ ក្នុងក្រុងសិរីសោភ័ណ ដែលប្រព្រឹត្តទៅនៅសាលប្រជុំ ក នៃសាលាខេត្តបន្ទាយមានជ័យ។

ក្នុងឱកាសនោះ ឯកឧត្តម អ៊ុ រាត្រី បានថ្លែងអំណរគុណ និងកោតសរសើរចំពោះកិច្ចខិតខំប្រឹងប្រែងរបស់ប្រជាការពារទាំងអស់ ដែលបានលះបង់កម្លាំងកាយចិត្ត ចូលរួមយ៉ាងសកម្មក្នុងការថែរក្សាសន្តិសុខ សណ្តាប់ធ្នាប់ និងសុវត្ថិភាព ជូនប្រជាពលរដ្ឋក្នុងមូលដ្ឋាន ជាពិសេសក្នុងឱកាសបុណ្យចូលឆ្នាំថ្មីនេះ ដោយបានលើកឡើងថាការលះបង់ និងកិច្ចខិតខំប្រឹងប្រែង "បងប្អូនប្រជាការពារទាំងអស់ ពិតជាបានលះបង់កម្លាំងកាយចិត្ត ចូលរួមយ៉ាងសកម្មក្នុងការថែរក្សាសន្តិសុខ សណ្តាប់ធ្នាប់ និងសុវត្ថិភាព ជូនប្រជាពលរដ្ឋក្នុងមូលដ្ឋាន។ ការលះបង់របស់បងប្អូនពិតជាមានតម្លៃ និងគួរឱ្យកោតសរសើរ"។

ជាពិសេសក្នុងឱកាសបុណ្យចូលឆ្នាំថ្មីនេះ ការងារថែរក្សាសន្តិសុខ សណ្តាប់ធ្នាប់ និងសុវត្ថិភាព គឺមានសារៈសំខាន់ណាស់។ ឯកឧត្តមសូមលើកទឹកចិត្តបងប្អូនប្រជាការពារទាំងអស់ បន្តខិតខំប្រឹងប្រែងបំពេញភារកិច្ចឱ្យបានល្អប្រសើរ ដើម្បីឱ្យប្រជាពលរដ្ឋបានសប្បាយរីករាយក្នុងឱកាសបុណ្យចូលឆ្នាំថ្មីនេះ។

ទន្ទឹមនឹងនេះ អភិបាលខេត្តបន្ទាយមានជ័យបានបញ្ជាក់ថា រដ្ឋបាលខេត្តនឹងបន្តគាំទ្រ និងលើកទឹកចិត្តបងប្អូនប្រជាការពារទាំងអស់ ដើម្បីឱ្យបងប្អូនមានលទ្ធភាពបំពេញភារកិច្ចឱ្យបានល្អប្រសើរ។ ខ្ញុំសូមជូនពរបងប្អូនប្រជាការពារទាំងអស់ និងក្រុមគ្រួសារ ឱ្យមានសុខភាពល្អ សុភមង្គល និងជោគជ័យគ្រប់ភារកិច្ច។

ឯកឧត្តមអភិបាលខេត្តក៏បានផ្តាំផ្ញើដល់ប្រជាការពារទាំងអស់ ត្រូវបន្តសហការជាមួយកម្លាំងសមត្ថកិច្ចពាក់ព័ន្ធ ដើម្បីទប់ស្កាត់ និងបង្ក្រាបបទល្មើសផ្សេងៗ ដែលអាចកើតមានឡើងក្នុងមូលដ្ឋាន។ ឯកឧត្តមបានសង្កត់ធ្ងន់លើការចូលរួមរបស់ប្រជាពលរដ្ឋក្នុងការផ្តល់ព័ត៌មាន និងសហការជាមួយអាជ្ញាធរ ដើម្បីធានាបាននូវសន្តិសុខ សណ្តាប់ធ្នាប់ និងសុវត្ថិភាពក្នុងមូលដ្ឋាន។

ការថ្លែងសាររបស់ឯកឧត្តម អ៊ុ រាត្រី បង្ហាញពីការយកចិត្តទុកដាក់ខ្ពស់របស់រដ្ឋបាលខេត្តបន្ទាយមានជ័យ ចំពោះកិច្ចខិតខំប្រឹងប្រែងរបស់កម្លាំងប្រជាការពារ និងការប្តេជ្ញាចិត្តក្នុងការធានាបាននូវសន្តិសុខ សណ្តាប់ធ្នាប់ និងសុវត្ថិភាព ជូនប្រជាពលរដ្ឋក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ៕

ដោយ ឈុន សារ៉ាត