AKP ភ្នំពេញ ថ្ងៃទី១៣ ខែមេសា ឆ្នាំ២០២៥ --

ពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្តស័ក ពុទ្ធសករាជ ២៥៦៩ នឹងឈានចូលមកដល់នៅវេលាម៉ោង ០៤និង៤៨នាទីទៀបភ្លឺ ថ្ងៃចន្ទ ២ រោច ខែចេត្រ ត្រូវនឹងថ្ងៃទី១៤ ខែមេសា គ្រឹស្តសករាជ ២០២៥។ នេះបើយោងទៅតាមពេលវេលាដែលបានគន់គូរ និងគូសវាសឡើងតាមក្បួនបុរាណប្រពៃណីខ្មែរ ហើយជាមួយគ្នានេះ ក្រៅពីប្រជាពលរដ្ឋខ្មែរយើង ក៏នៅមានបងប្អូននៅក្នុងតំបន់មួយចំនួនទៀតដែលមានប្រពៃណី និងជំនឿប្រហាក់ប្រហែលគ្នា ដូចជាឡាវ ថៃ និងផ្នែកខ្លះនៃប្រទេសមីយ៉ាន់ម៉ា និងចិន ក៏នឹងចូលរួមរីករាយទទួលទេវតាឆ្នំាថ្មី ផងដែរ។

សម្រាប់កម្ពុជា កាលពីឆ្នាំចាស់ ឆ្នាំរោង ឆស័ក ពុទ្ធសករាជ២៥៦៨ រាជរដ្ឋាភិបាល និងប្រជាពលរដ្ឋកម្ពុជា បានរួបរួមគ្នារក្សាបាននូវសន្តិភាព សណ្តាប់ធ្នាប់ និងកិត្យានុភាពទាំងនៅថ្នាក់ជាតិ ថ្នាក់តំបន់ និងក្នុងសហគមន៍អន្តរជាតិ។ កម្ពុជាអាចបន្តរក្សាបានឧត្តមភាពជាតិដោយស្មើមុខស្មើមាត់នឹងបណ្តាប្រទេសនានា នៅក្នុងតំបន់ ហើយអាចហែលឆ្លងនូវបញ្ហាជាច្រើនដោយរលូន សូម្បីតែបញ្ហាដ៏ក្តៅគគុកនៃការកំណត់ពន្ធបដិការរបស់សហរដ្ឋអាមេរិកមកលើកម្ពុជា ប្រទេសនៅក្នុងតំបន់ និងប្រទេសនានានៅលើពិភពលោកចំនួន ១៨០ ប្រទេស។

កាលពីឆ្នាំចាស់ សមិទ្ធផលដែលរាជរដ្ឋាភិបាលបានកសាង និងសម្រេចបានគឺមានទាំងហេដ្ឋារចនាសម្ព័ន្ធរូបវ័ន្តនានា ដូចជាស្ពាន ផ្លូវ មន្ទីរពេទ្យ។ ក្រៅពីនោះ កម្ពុជាក៏បានបន្តដំណើរការការដ្ឋានកំណែទម្រង់នានាតាមអភិក្រមរបស់ជាតិផ្ទាល់ និងអាចធានាបាននូវកំណើននៃវិស័យសំខាន់ៗ ដែលរួមទាំងកំណើននៃការបណ្តាក់ទុនវិនិយោគ កសិកម្ម ឧស្សាហកម្ម ពាណិជ្ជកម្ម និង​ទេសចរណ៍ រហូតដល់ស្ថាប័នហិរញ្ញវត្ថុនានា ជាពិសេសគឺធនាគារអភិវឌ្ឍន៍អាស៊ី ដែលទើបតែប្រកាសនាពេលថ្មីៗនេះថា នៅឆ្នាំ២០២៥នេះ កម្ពុជានឹងបន្តទទួលបានកំណើនសេដ្ឋកិច្ច ៦,១ ភាគរយ ហើយនៅឆ្នាំ២០២៦ ឡើងមួយកម្រិតទៀតគឺ ៦,២ ភាគរយ ខណៈដែលកាលពីឆ្នាំ២០២៤ អាចទទួលបានត្រឹមតែ ៦ភាគរយ។

សមិទ្ធផលទាំងនេះ មិនមែនជារឿងដែលអាចនឹងសម្រេចបានដោយងាយស្រួលនោះទេ ប្រសិនបើគ្មានមគ្គុទេសភាពដ៏ត្រឹមត្រូវ ប្រកបដោយភាពបត់បែន និងរស់រវើក។

​ដូចដែលបានរៀបរាប់ខាងលើ ពិធីបុណ្យចូលឆ្នាំថ្មីប្រពៃណីជាតិខ្មែរ ដែលតាមជំនឿទេវតាឆ្នាំថ្មីព្រះនាម គោរាគទេវី នឹងយាងចុះមក នាពេលខាងមុខនេះ គឺប្រជាពលរដ្ឋខ្មែរគ្រប់ស្រទាប់វណ្ណៈនឹងឈប់សម្រាកទទួលស្វាគមន៍ព្រះនាង ដូច្នេះសូមឱ្យឱកាសនេះក្លាយជាឱកាសនៃការជួបជុំបងប្អូនសាច់ញាតិ និងមិត្តភក្តិ ក៏ដូចជាចាស់ព្រឹទ្ធាចារ្យ រីករាយសប្បាយទាំងអស់គ្នា។

នៅក្នុងរយៈពេលនៃការឈប់សម្រាកថ្នាក់ជាតិនេះ សូមជនរួមជាតិទាំងអស់រីករាយក្រោមផ្លែផ្កានៃសន្តិភាព និងឯកភាពជាតិ ក្រោមបាវចនាតែមួយគឺ ជាតិ សាសនា ព្រះមហាក្សត្រ ដែលកម្ពុជាអាចរកបានយ៉ាងលំបាក តាំងពីចុងឆ្នាំ១៩៩៨ មក។ នេះគឺជាពេលវេលារបស់បងប្អូនជនរួមជាតិទាំងអស់ ប៉ុន្តែទោះបីជាយ៉ាងណាក៏ដោយនៅពេលដែលវិលមកវិញ សូមកុំភ្លេចការងារ និងភារកិច្ចស្នូលរបស់យើង ហើយត្រូវតែខិតខំបំពេញការងារប្រកបដោយវឌ្ឍនភាព ជាពិសេសគឺកិច្ចការដែលនៅសេសសល់ពីឆ្នាំចាស់ ដែលត្រូវបន្តសម្រាប់ឆ្នាំថ្មី។

យើងម្នាក់ៗនៅមានបេសកម្ម និងភារកិច្ចជាច្រើនទៀតដែលត្រូវធ្វើ ដើម្បីបុព្វហេតុជាតិ និងអធិបតេយ្យជាតិ ដូច្នេះការប្តេជ្ញាចិត្តជារួម តស៊ូ និងជំនះរាល់ការលំបាកហែលឆ្លងជាមួយគ្នា ទាំងពេលមានសុខ​ និង ពេលមានទុក្ខ គឺជារឿងចាំបាច់បំផុត។

ឆ្លៀតឱកាសនេះ ទីភ្នាក់ងារសារព័ត៌មានកម្ពុជា សូមព្រះបរមរាជានុញ្ញាតលំឱនកាយវាចាចិត្ត និងលើកហត្ថប្រណមបួងសួងដល់គុណបុណ្យព្រះរតនត្រ័យ គុណកែវទាំងបី វត្ថុស័ក្តិសិទ្ធិទាំងឡាយក្នុងលោក និងទេវតាឆ្នាំថ្មី សូមជួយបីបាច់ថែរក្សា ប្រោសប្រទានពរជ័យ សិរីមង្គល វិបុលសុខ មហាប្រសើរថ្វាយ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល។

យើងខ្ញុំក៏សូមបួងសួងដល់វត្ថុស័ក្តិសិទ្ធិក្នុងលោក សូមតាមថែរក្សាថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ កម្មករ-កម្មការិនី និងជនរួមជាតិទាំងអស់ សូមទទួលបានសុខភាពបរិបូរណ៍ កម្លាំងមាំមួន បញ្ញាភ្លឺថ្លា អាយុយឺនយូរ និងទទួលបានជោគជ័យថ្មីៗបន្ថែមទៀត ជូនជាតិមាតុភូមិ។ សូមឱ្យការងារដែលលំបាកទៅជាងាយស្រួល ហើយអ្វីដែលជាឧបសគ្គទៅជាពរជ័យ។​ សូមជូនពរឆ្នាំថ្មី !

AKP