AKP ភ្នំពេញ ថ្ងៃទី១២ ខែមេសា ឆ្នាំ២០២៥-- លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី និងជាប្រធានក្រុមការងារចុះជួយមូលដ្ឋានខណ្ឌកំបូល និងឯកឧត្តម ត្រាក់ ថៃសៀង រដ្ឋលេខាធិការក្រសួងសាធារណការ និងដឹកជញ្ជូន និងជាអនុប្រធានក្រុមការងារចុះជួយមូលដ្ឋានខណ្ឌកំបូល កាលពីរសៀលថ្ងៃទី១១ ខែមេសា ឆ្នាំ២០២៥ បានអញ្ជើញចូលរួមជាអធិបតី ក្នុងពិធីបិទការប្រកួតបាល់ទាត់ពានរង្វាន់ខណ្ឌកំបូល លើកទី៤ ឆ្នាំ២០២៥ នៅបញ្ជាការដ្ឋានទ័ពពិសេស។

ក្នុងប្រសាសន៍ស្វាគមន៍បិទការប្រកួត លោកជំទាវកិត្តិបណ្ឌិតរដ្ឋមន្ត្រី បានគូសបញ្ជាក់ថា ក្រោមម្លប់នៃសុខសន្តិភាព ដែលទទួលបានតាមរយៈនយោបាយឈ្នះ-ឈ្នះរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និងជាបិតាស្ថាបនិកសន្តិភាព អគ្គមគ្គុទ្ទេសក៍ឯក បាននាំមកនូវភាពរីកចម្រើនលើគ្រប់វិស័យសម្រាប់ជាតិ និងប្រជាជនកម្ពុជា។ 

លោកជំទាវកិត្តិបណ្ឌិតរដ្ឋមន្ត្រីបានបន្ថែមទៀតថា រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំប្រកបដោយភាពវៃឆ្លាត និងប្រាកដរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដោយកំណត់អាទិភាពចំនួន៥ គឺ មនុស្ស ផ្លូវ ទឹក ភ្លើង និងបច្ចេកវិទ្យា។ ក្នុងនោះ ការពង្រឹងគុណភាពកីឡា គឺជាអាទិភាពដ៏ចម្បងមួយ ដែលនឹងរួមចំណែកក្នុងការអភិវឌ្ឍមូលធនមនុស្សសំដៅឈានឆ្ពោះទៅសម្រេចបាន នូវចក្ខុវិស័យកម្ពុជាឆ្នាំ២០៣០ និង២០៥០ ផងដែរ។

ទន្ទឹមនឹងនេះ លោកជំទាវកិត្តិបណ្ឌិតរដ្ឋមន្ត្រីបានផ្តាំផ្ញើទៅដល់ក្មួយៗ សិស្សានុសិស្សទាំងអស់ សូមខិតខំសិក្សារៀនសូត្រ បង្កើនសមត្ថភាព និងកសាងខ្លួនឱ្យក្លាយទៅជាសិស្សល្អ មិត្តល្អ កូនល្អ និងពលរដ្ឋល្អក្នុងសង្គម ឱ្យស័ក្តិសមជាទំពាំងស្នងឫស្សី ជាសសរទ្រូងដ៏រឹងមាំរបស់ប្រទេសជាតិ ហើយចៀសវាងដាច់ខាតនូវរាល់អំពើអសកម្ម ជាពិសេសសូមចៀសឱ្យឆ្ងាយពីគ្រឿងញៀន៕

ដោយ៖ ពេជ្រ សំអឿន (ប្រភព៖ ក្រសួងកិច្ចការនារី)