AKP ភ្នំពេញ ថ្ងៃទី១២ ខែមេសា ឆ្នាំ២០២៥--

ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរដែលនឹងប្រារព្ធឡើងនៅថ្ងៃទី១៤ ដល់ ថ្ងៃទី១៦ ខែមេសា ឆ្នាំ២០២៥ ខាងមុខនេះ ប្រជាពលរដ្ឋ កម្មករ កម្មការិនី និងមន្រ្ដីរាជការ បានចាប់ផ្ដើមធ្វើដំណើរចាកចេញ​ពី​រាជធានី​ភ្នំពេញ​ទៅលេងស្រុកកំណើតជាបណ្ដើរៗ និងជាបន្ដបន្ទាប់រហូតដល់ថ្ងៃបុណ្យចូលឆ្នាំតែម្ដង។

ស្របពេលដែលពិធីបុណ្យចូលឆ្នាំថ្មីនឹងឈានមកដល់នោះ រាជរដ្ឋាភិបាលតាមរយៈសាលារាជធានីភ្នំពេញ បានបញ្ចេញរថយន្តក្រុងចំនួន៥៩៧គ្រឿង សម្រាប់ដឹកជញ្ជូនបងប្អូនប្រជាពលរដ្ឋ ធ្វើដំណើរទៅលេង​ស្រុកកំណើត ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដោយឥតគិតថ្លៃ ដោយចេញដំណើរចាប់ ពីថ្ងៃទី១២ រហូតដល់ថ្ងៃទី១៧ ខែមេសា ឆ្នាំ ២០២៥។

បងប្អូនប្រជាពលរដ្ឋដែលបានមករង់ចាំឡើងជិះរថយន្ដក្រុងធ្វើដំណើរទៅលេងស្រុកកំណើតនាថ្ងៃទី១២ ខែមេសានេះ ក៏បានសម្តែងនូវក្ដីសប្បាយរីករាយ និងថ្លែងអំណរគុណចំពោះរាជរដ្ឋាភិបាលដែល​បាន​គិតគូរ និងយកចិត្ដទុកខ្ពស់ចំពោះប្រជាពលរដ្ឋ ក្នុងការរៀបចំរថយន្ដក្រុងដឹកជញ្ជូនដោយឥតគិតថ្លៃ ធ្វើដំណើរទៅស្រុកកំណើតក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនេះ។

ដោយកំពុងឈរត្រៀមឡើងជិះរថយន្ដក្រុង និងដៃកំពុងតែកាន់វ៉ាលីជាមួយនឹងសម្ភារមួយចំនួនទៀត ដើម្បីធ្វើ​ដំណើរចាកចេញពីរាជធានីភ្នំពេញទៅកាន់ស្រុកំណើត នៅឯខេត្ដបាត់ដំបងនោះ កញ្ញា វណ្ណ កុសល់ ធ្វើ​ការងារជាកម្មកររោងចក្រ ដែលមានទីតាំងនៅក្នុងរាជធានីភ្នំពេញបានឱ្យដឹងថា កញ្ញាបានភ្ញាក់​ពីដំណេក​ទាំងពីព្រឹកព្រលឹម ហើយក៏បានរៀបចំសម្ភាររួចរាល់តាំងពីល្ងាច ដើម្បីត្រៀមមកឡើងជិះរថយន្ត​ក្រុង​ដែល​រាជរដ្ឋាភិបាលបានរៀបចំជូនប្រជាពលរដ្ឋ ដើម្បីជិះទៅស្រុកកំណើត ដោយមិនគិតថ្លៃ។ កញ្ញារូបនេះបាន​និយាយថា ការធ្វើដំណើរតាមរថយន្តក្រុងនេះមានភាពងាយស្រួល និងមានផាសុកភាព​ល្អ ​ក្នុងនោះ ក៏មានការផ្ដល់ជូនទាំងទឹក ភេជ្ជៈ សម្រាប់ហូបដោយមិនចំណាយថវិកា ផងដែរ។ កញ្ញា វណ្ណ កុសល បាននិយាយបន្ថែមថា ​នៅពេលដែលរាជរដ្ឋាភិបាលរៀបចំរថយន្ដក្រុងនេះ​ពិតជាល្អ​ណាស់​សម្រាប់ប្រជាពលរដ្ឋដែលខ្វះខាតថវិកាក្នុងការធ្វើដំណើរទៅស្រុកកំណើត ពិសេសនោះចំពោះ​កញ្ញា​វិញ​គឺបានជួយកាត់បន្ថយការចំណាយថវិកាប្រមាណជាង១០ម៉ឺនរៀលក្នុងពេលធ្វើដំណើរទៅវិញ​ទៅ​មក ក្នុងឱកាសបុណ្យចូលឆ្នាំនេះ។ កញ្ញា វណ្ណ កុសល់ បាននិយាយបញ្ជាក់ថា៖ «ខ្ញុំគិតថាការរៀប​ចំរថយន្ត​ក្រុង​របស់សាលារាជធានីភ្នំពេញនេះមានភាពល្អ ព្រោះថា​វាបាន​ជួយកាត់បន្ថយការចំណាយរបស់ប្រជា​ពល​រដ្ឋ នៅក្នុងរដូវបុណ្យទានធំៗ។ ចំពោះរថយន្តឈ្នួល​វិញនៅថ្ងៃបុណ្យទានធំៗអីចឹង គាត់បានដំឡើង​ថ្លៃឈ្នួលធ្វើដំណើរ ហើយពេលខ្លះរកឡានជិះមិនបានក៏មានដែរ»។

បើតាមកញ្ញា វណ្ណ កុសល ក៏បានអះអាងផងដែរថា កញ្ញាបានធ្វើដំណើរតាមរថយន្តក្រុងដែលរាជរដ្ឋាភិបា ល​រៀបចំជូនប្រជាពលរដ្ឋក្នុងឱកាសបុណ្យលចូលឆ្នាំ និងបុណ្យធំៗតាំងពីដំបូងឡើយមកម្ល៉េះ ដែលតាម​ការកត់សម្គាល់ឃើញថា រាល់ពេលការ​ធ្វើដំណើរជារៀងរាល់ឆ្នាំមកឃើញថារថយន្តទាំងអស់សុទ្ធតែ​មាន​អនាម័យ បរិស្ថានល្អ និងមានផាសុកភាពល្អ  ហើយអ្នកបើកបររថយន្ដ ក៏បើកបរគោរពច្បាប់បានល្អ ក្នុងការបើកបរ។

លោក ឃុន ដានរៈ ជាអ្នករស់នៅខេត្តពោធិ៍សាត់ បានបង្ហាញពីមូលហេតុដែលលោកមករង់ចាំឡើង​ជិះ​រថយន្តក្រុងទៅស្រុកកំណើតដែរនោះគឺដើម្បីចង់សាកមើលចំពោះការជិះរថយន្តនេះ តើការផ្ដល់ជូន​ និង​រៀបចំជូនក្នុង​ពេលធ្វើដំណើរនោះវាមានភាពងាយស្រួលដូចគេនិយាយឬអត់។ លោកបានបញ្ជាក់ឱ្យដឹង​ថា៖​ «តាមខ្ញុំ​មកដល់នៅកន្លែងឡើងរថយន្ត ខ្ញុំអាចនិយាយថាពិត មានភាពងាយស្រួល​និងរៀបចំបាន​ល្អដូចគេនិយាយមែន ដោយគ្មានភាពរញ៉េរញ៉ៃ ឬចលាចល នោះទេ។ បើខ្ញុំធ្លាប់ជិះ តាក់ស៊ីកន្លងមកគឺ​នៅរង់ចាំយូរ តែនេះរថយន្តរៀបចំរួចជាស្រេច ដល់ពេលឡើងពេញចេញដំណើរតែម្តង»។

ជាមួយគ្នានោះ​ដែរ លោក ដានរៈ ក៏បានលើកឡើងថា ឡានតាក់ស៊ី ឱ្យតែរដូវបុណ្យទានធំៗតែងតែឡើង​ថ្លៃជានិច្ច។​ លោកក៏បានសម្តែងការសប្បាយរីករាយពេលដែលបានជិះរថយន្តក្រុង​ដែលរៀបចំ​ដោយ​សាលា​រាជធានីភ្នំពេញ និងបានអរគុណដល់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងសម្តេច តេជោ ហ៊ុន សែន អតីតនាយករដ្ឋមន្ត្រី ដែលបានផ្ដល់រថយន្ដក្រុងដឹកជញ្ជូនប្រជាពលរដ្ឋ​ទៅស្រុក​កំណើតដោយមិនគិតថ្លៃ។

ក្នុងឱកាសនោះ លោក ដានរៈ ក៏បានស្នើឱ្យប្រមុខរាជរដ្ឋាភិបាលមានការៀបចំជារថយន្តក្រុង ដឹក​ជញ្ជូន​ប្រជាពលរដ្ឋទៅស្រុកកំណើតជារៀងរាល់ឆ្នាំនៅក្នុងរដូវបុណ្យចូលឆ្នាំខ្មែរ បុណ្យភ្ជុំបិណ្ឌ និងបុណ្យផ្សេងៗ​ទៀតព្រោះ ការផ្តល់រថយន្តដឹកជញ្ជូនប្រជាពលរដ្ឋ នេះបានចូលរួមកាត់បន្ថយការ​ចំណាយ​របស់ប្រជា​ពល​រដ្ឋមួយចំនួនដែលមានការខ្វះខាតក្នុងការធ្វើដំណើរទៅជួបក្រុមគ្រួសារនៅរដូវបុណ្យទាន។

ក្នុងទឹកមុខញញឹមរីករាយពេលបានឡើងជិះរថយន្ដក្រុងនោះ អ្នកមីង ស៊ីថា ជាអ្នករស់នៅខេត្ដកំពង់ឆ្នាំង​បានសម្ដែងនូវក្ដីរីករាយ និងអរគុណដល់រាជ រដ្ឋាភិបាលដែលបានរៀបចំរថយន្តក្រុងដឹកជញ្ជូនប្រជា​ពល​រដ្ឋទៅ​ស្រុកកំណើតដោយមិនគិតថ្លៃក្នុងឱកាសបុណ្យចូលឆ្នាំថ្មីនេះ ទាំងពេលកន្លងមក និងសម្រាប់បុណ្យ​ចូ​លឆ្នាំខ្មែរក្នុងឆ្នាំនេះផងដែរ។ អ្នកមីងបានគូសបញ្ជាក់ផងដែរថា ការជិះរថយន្តក្រុងនេះបានធ្វើឱ្យអ្នកមីង​កាត់បន្ថយការចំណាយថវិកាច្រើន ហើយបើគិតទាំងក្រុមគ្រួសារក្នុងការធ្វើដំណើរទៅស្រុកម្តងៗ​ត្រូវ​ចំណាយជិត២០ម៉ឺនរៀល ខណៈពេលធ្វើដំណើរតាមរថយន្ដឈ្នួលនោះ។ អ្នកមីងបានបន្ថែមថា៖ «ជិះ​រថយន្តមិនអស់ថវិកាបានធ្វើឱ្យខ្ញុំ និងគ្រួសារសល់ប្រាក់ដើម្បីយកទៅទិញសម្ភារមួយចំនួន ដើម្បីរៀបចំ​ទទួលទេវតាឆ្នាំថ្មី និងទិញសម្ភារ និងនំចំណី​ដើម្បីយកជូនចាស់ៗនៅផ្ទះ»។

អ្នកមីង ស៊ីថា បានសើច និងនិយាយដោយត្រេកអរដោយបញ្ជាក់ឱ្យដឹង​ទៀតថា៖​«ខ្ញុំត្រេកអរ​ណាស់​ដែល​រាជរដ្ឋាភិបាលបន្តរៀបចំឱ្យមានរថយន្តក្រុងដឹកប្រជាពលរដ្ឋទៅស្រុកកំណើតនៅក្នុងឱកាសបុណ្យចូលឆ្នាំប្រពៃណីជាតិខ្មែរដោយមិនអស់ថវិកា ព្រោះថាបើខ្ញុំត្រូវជិះរថយន្ដឈ្នួល ខ្ញុំនឹងចំណាយលើថ្លៃជិះ ​ទៅ​ស្រុកទាំងទៅទាំងមកអស់ជិត ២០ម៉ឺនរៀល»។

ក្នុងឱកាសជូនដំណើរបងប្អូនប្រជាពលរដ្ឋធ្វើដំណើរតាមរថយន្ដក្រុងទៅលេងស្រុកកំណើតដោយឥតគិតថ្លៃនាព្រឹកថ្ងៃទី ១២ ខែមេសា ឆ្នាំ២០២៥ ឯកឧត្តម ឃួង ស្រេង អភិបាលរាជធានីភ្នំពេញបានលើក​ឡើងថា រាជរដ្ឋាភិបាលបានរៀបចំ​រថយន្ត​សម្រាប់ដឹកប្រជាពលរដ្ឋទៅស្រុកកំណើតនៅក្នុង​ឱកាសបុណ្យ​ចូលឆ្នាំខ្មែរនេះ ចាប់តាំងពីឆ្នាំ២០១៨រហូតដល់មកពេលនេះ ហើយ ឆ្នាំនេះប្រជាពលរដ្ឋ​មានចំនួនច្រើន​ទើបសាលារាជធានីភ្នំពេញបានបញ្ចេញ រថយន្តមានចំនួនច្រើន។ ឯកឧត្តមអភិបាលបានជម្រាបជូនថា ការដាក់រថយន្តក្រុងសម្រាប់ដឹកប្រជាពលរដ្ឋទៅស្រុកកំណើតនេះគឺជាការគិតពីសុខទុក្ខរបស់ប្រជាពលរដ្ឋពីសំណាក់ប្រមុខរាជរដ្ឋាភិបាលដែលមានសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជា​ណា​ចក្រកម្ពុជា  និងសម្តេចតេជោ ហ៊ុន សែន អតីតនាយករដ្ឋមន្រ្ដីមកម្ល៉េះ។ ឯកឧត្តមអភិបាលរាជធានី​ភ្នំពេញ​បន្ដឱ្យដឹងថា ​នៅក្នុងឆ្នាំនេះប្រជាពលរដ្ឋមានការកើនឡើងក្នុងការជិះរថយន្ត ដោយសារ​គាត់​មានការជឿរជាក់ក្នុងការធ្វើដំណើរតាមរថយន្តក្រុងនេះ ហើយ ជាងនេះបានជួយកាត់បន្ថយការចំណាយ​របស់ពួកគាត់ផងដែរ។

បើតាមឯកឧត្ដម ឃួង ស្រេង បុណ្យចូលឆ្នាំថ្មីប្រពៃណីជាតិឆ្នាំ២០២៥នេះ កំណើនប្រជាពលរដ្ឋ និង​បងប្អូនកម្មករ កម្មការិនីរោងចក្រ មកទទួលសេវាកម្មជិះរថយន្តក្រុងទៅលេងស្រុក កំណើតមានកំណើន​ច្រើន​ជាងបណ្ដា​ឆ្នាំមុនៗ ខណៈដែលនៅឆ្នាំ២០២៤ មានប្រមាណជាង៧ម៉ឺននាក់ ហើយប្រជាពលរដ្ឋ​បានចំណេ ញ​ពីការ​ដឹកជញ្ជូនដោយមិនគិតថ្លៃបានប្រមាណជាង១លាន២សែនដុល្លារអាម៉េរិក។

ឯកឧត្ដម ឃួង ស្រេង បានគូសបញ្ជាក់បន្ថែមថា៖​ «នៅក្នុងឆ្នាំ២០២៥នេះ ប្រជាពលរដ្ឋក៏ដូច ជាបងប្អូន​កម្មករ កម្មការិនីរោងចក្រ ដែលជិះរថយន្តក្រុងទៅលេងស្រុ កកំណើតជួបជុំបងប្អូនក្នុងឱកាសបុណ្យ​ចូលឆ្នាំថ្មីឆ្នាំម្សាញ់ ២០២៥នេះ មានកំណើនកើនជាងឆ្នាំមុន។ ការកើនចំនួននេះគឺដោយសារតែបងប្អូន​ប្រជា​ពលរដ្ឋ មានជំនឿជឿជាក់លើរាជរដ្ឋាភិបាល ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត ហើយម្យ៉ាងទៀត ការធ្វើដំណើរដោយរថយន្តក្រុងនេះ ពួកគាត់ទទួលបានសុវត្ថិភាពល្អ»។

ឯកឧត្ដម ឃួង ស្រេង អភិបាលរាជធានីបានឱ្យដឹងទៀតថា ក្រោមការដឹកនាំរបស់សម្ដេចបវរធិបតីហ៊ុន ម៉ាណែត អ្វីដែលជាការលំបាករបស់ប្រជាពលរដ្ឋ គឺជាការលំបាករបស់រាជរដ្ឋាភិបាល ដូច្នេះ​ហើយ​ទើប​រាជរដ្ឋាភិបាលតែងយកចិត្តទុកដាក់ជាមួយបងប្អូនប្រជាពលរដ្ឋ ។ ជាក់ស្ដែងជារៀងរាល់ឆ្នាំ រាជរដ្ឋាភិបាល តែងតែបង្កើតឱ្យមានសេវាកម្មនៃការដឹកជញ្ជូនប្រជាពលរដ្ឋ ទៅលេងស្រុកកំណើត ដោយមិនគិតថ្លៃ​នៅ​ក្នុង​ឱកាសបុណ្យជាតិធំម្តងៗ ដើម្បីជួយសម្រួលទៅដល់ជីវភាពរបស់ពួកគាត់។

សូមជម្រាបជូនថា រដ្ឋបាលរាជធានីភ្នំពេញ បានបញ្ចេញរថយន្តក្រុងចំនួន៥៩៧គ្រឿង សម្រាប់ដឹក​ជញ្ជូន​បងប្អូនប្រជាពលរដ្ឋ ធ្វើដំណើរទៅលេងស្រុកកំណើត ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដោយ​ឥតគិតថ្លៃ ដោយចេញដំណើរចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ ២០២៥ ទើបដឹក​ត្រឡប់​ពីស្រុកំណើតមករាជធានីភ្នំពេញវិញ។ រដ្ឋបាលរាជធានីភ្នំពេញបានយកចិត្តទុកដាក់យ៉ាងខ្លាំង ជាមួយ​ប្រជាពលរដ្ឋ ដោយបានរៀបចំរថយន្តក្រុងជាច្រើនរយគ្រឿង ដើម្បីដឹកជញ្ជូនបងប្អូនប្រជាពលរដ្ឋ ធ្វើ​ដំណើរទៅលេងស្រុកកំណើត ជួបជុំបងប្អូន ក្រុមគ្រួសារ ក្នុងពិធីបុណ្យចូលឆ្នាំថ្មី ប្រពៃណីជាតិខ្មែរ ដោយ​ឥតគិតថ្លៃ។

ជាមួយគ្នានេះដែរ ក្រសួងការងារ និងបណ្តុះបណ្តាលវិជ្ជាជីវៈ ក៏បានចេញសេចក្ដីជូនដំណឹងដោយ​បាន​ស្នើម្ចាស់ ឬនាយកសហគ្រាស គ្រឹះស្ថានអនុញ្ញាតឱ្យកម្មករនិយោជិតរបស់ខ្លួនឈប់សម្រាកថ្ងៃ​បុណ្យចូល​ឆ្នាំប្រពៃណីជាតិខ្មែរខាងមុខដោយមានប្រាក់ឈ្នួល។ ក្រសួងការងារ និងបណ្តុះបណ្តាលវិជ្ជាជីវៈ សូ​មជូន​ដំណឹងដល់ម្ចាស់ ឬនាយកសហគ្រាស គ្រឹះស្ថាន ដែលស្ថិតក្នុងដែនអនុវត្តន៍​នៃច្បាប់ស្តីពីការងារឱ្យ​បាន​ជ្រាបថា យោងតាមច្បាប់ស្តីពីការងារ និងប្រកាសលេខ២១៨/២៤ ក.ប/ប្រ.ក.អ.ធ.ក ចុះថ្ងៃទី៩ ខែតុលា ឆ្នាំ២០២៤ ស្តីពីការឈប់បុណ្យដែលមានប្រាក់ឈ្នួលប្រចាំឆ្នាំ២០២៥ សូមម្ចាស់ ឬនាយក សហគ្រាស​គ្រឹះស្ថានអនុញ្ញាតឱ្យកម្មករនិយោជិតរបស់ខ្លួនឈប់សម្រាកដោយមានប្រាក់ឈ្នួល នាឱកាសពិធីបុណ្យ​ចូលឆ្នាំថ្មី ប្រពៃណីជាតិ ឆ្នាំម្សាញ់ សប្តស័ក ព.ស.២៥៦៩ គ.ស.២០២៥ ខាងមុខនេះ រយៈពេល ៣ ថ្ងៃ គឺថ្ងៃទី១៤-១៥-១៦ ខែមេសា ឆ្នាំ២០២៥ និងត្រូវសម្របសម្រួលរៀបចំបើកប្រាក់ឈ្នួលខែមេសា ដែលកម្មករនិយោជិត ត្រូវទទួលបានលើកទី១ ឱ្យបានមុនថ្ងៃឈប់សម្រាកនេះ៕

ដោយ៖ ប៊ុនរិទ្ធ និង សួស សំរិត