AKP ព្រះសីហនុ ថ្ងៃទី១២ ខែមេសា ឆ្នាំ២០២៥-- ឯកឧត្តម ម៉ាង ស៊ីណេត ប្រធានសិស្ស និស្សិតអាហារូបករណ៍សម្តេចតេជោ (អ.ម.ត) និងជាអភិបាលនៃគណ:អភិបាលខេត្តព្រះសីហនុ និងលោកជំទាវ បានអញ្ជើញដឹកនាំលោកឧកញ៉ា លោក លោកស្រីជាអភិបាលរងខេត្ត ប្រធានមន្ទីរ អង្គភាព ចូលរួមកម្មវិធីសង្ក្រាន្តសិស្ស និស្សិតអាហារូបករណ៍ (អ.ម.ត) សាខាខេត្តព្រះសីហនុ នៅសង្កាត់លេខ៣ ក្រុងព្រះសីហនុ ព្រឹកថ្ងៃសៅរ៍ទី១២ ខែមេសា ឆ្នាំ២០២៥។

ឯកឧត្តមបានមានប្រសាសន៍ថា សង្ក្រាន្តសិស្ស និស្សិតអាហារូបករណ៍សម្តេចតេជោ អ.ម.ត សាខាខេត្តព្រះសីហនុ គឺដើម្បីបង្កលក្ខណៈឱ្យប្អូនៗសិស្ស និស្សិតទាំងអស់បានចូលរួមលេងល្បែងប្រជាប្រិយសប្បាយរីករាយ ជាពិសេសថែមទៀតនោះ ជាការបង្កើតព្រឹត្តិការណ៍ស្និទ្ធស្នាលជាមួយគ្នាបន្ថែមទៀតក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ព.ស ២៥៦៩ ត្រូវនឹងថ្ងៃទី១៤ ដល់១៦ ខែមេសា ឆ្នាំ២០២៥។

សង្ក្រាន្តសិស្ស និស្សិតអាហារូបករណ៍សម្តេចតេជោ នាថ្ងៃទី១២ ខែមេសា ឆ្នាំ២០២៥ ចាប់ពីវេលាម៉ោង១០ព្រឹក ដោយមានកម្មវិធីកម្សាន្តសប្បាយជាច្រើនផ្សេងទៀតរួមមានដូចជា៖ ទី១. ការរាំលេងកម្សាន្ត ទី២. លេងល្បែងប្រជាប្រិយមានដូចជា ញាំប៉ិគក់ វាយក្អម និងមានកម្មវិធីជាច្រើនទៀត ហើយអ្នកដែលចូលរួមប្រកួតដណ្តើមបានជ័យជំនះ ក៏ទទួលបានរង្វាន់លើកទឹកចិត្តបង្កើនភាពសប្បាយរីករាយក្នុងកម្មវិធីសង្ក្រាន្តនេះផងដែរ។

ក្នុងឱកាសចូលរួមសង្ក្រាន្តសិស្ស និស្សិតអាហារូបករណ៍សម្តេចតេជោ (អ.ម.ត) ឯកឧត្តមបានធ្វើការអំពាវនាវដល់បងប្អូនប្រជាពលរដ្ឋ ក៏ដូចជាភ្ញៀវទេសចរជាតិ អន្តរជាតិ និងអ្នកវិនិយោគសូមចូលរួមលេងសប្បាយរីករាយក្នុងសង្ក្រាននៅតាមទីតាំងនានា ដែលរដ្ឋបាលខេត្តព្រះសីហនុ បានរៀបចំបង្កើតកម្មវិធីសប្បាយៗជូនដល់សាធារណជនចូលរួមលេងកម្សានសប្បាយរីករាយឱ្យបានច្រើនកុះករ និងសូមអំពាវនាវបើកបរគោរពច្បាប់ចរាណ៍ឱ្យបានគ្រប់គ្នា ដើម្បីចៀសផុតពីគ្រោះថ្នាក់ចរាចរណ៍។

សូមបញ្ជាក់ថា សង្ក្រាន្តសិស្ស និស្សិតអាហារូបករណ៍សម្តេចតេជោ អ.ម.ត ត្រូវបានរៀបចំធ្វើឡើងជារៀងរាល់ឆ្នាំដោយ ឯកឧត្តម ម៉ាង ស៊ីណេត ប្រធានសិស្ស និស្សិតអាហារូបករណ៍សម្តេចតេជោ អ.ម.ត សាខាខេត្តព្រះសីហនុ និងលោកជំទាវ ហើយឆ្នាំនេះការរៀបចំសង្ក្រានចូលឆ្នាំខ្មែរ បានប្រព្រឹត្តទៅដោយមានភាពសប្បាយរីករាយក្រៃលែង ដែលមានសិស្ស និស្សិតអាហារូបករណ៍បានចូលរួមលេងកម្សាន្តយ៉ាងសប្បាយរីករាយ ជាមួយនឹងលោកឧកញ៉ា លោក លោកស្រី និងភ្ញៀវកិត្តិយសយ៉ាងច្រើនកុះករ។

ទន្ទឹមនឹងនោះ ឯកឧត្តម ម៉ាង ស៊ីណេត បានប្រកាសថា សិស្ស និស្សិតអាហារូបករណ៍សម្តេចតេជោ នឹងចូលរួមសង្ក្រាន្តនៅដើមឈើចាំស្នេហ៍ និងសង្ក្រាន្តព្រះថោងនាងនាគ ក្នុងឱកាសបុណ្យចូលឆ្នាំថ្មីប្រពៃណីខ្មែរថ្ងៃទី១៤-១៦ ខែមេសា ឆ្នាំ២០២៥ខាងមុខនេះ៕

ដោយ ងូ សុមុនី