AKP ព្រះសីហនុ ថ្ងៃទី០៩ ខែមេសា ឆ្នាំ ២០២៥--រដ្ឋបាលក្រុងព្រះសីហនុបានសហការជាមួយកងកម្លាំងប្រដាប់អាវុធ និងអាជ្ញាធរសង្កាត់ រៀបចំព្រឹត្តិការណ៍សង្ក្រាន្ដឆ្មាំថ្មីនៅឆ្នេរអូរត្រេះ ស្ថិតនៅសង្កាត់លេខ៤ក្រុងព្រះសីហនុ ខេត្តព្រះសីហនុ កាលពីរសៀលថ្ងៃអង្គារ ទី០៨ ខែមេសា ឆ្នាំ២០២៥។

លោក សរ កក្កដា អភិបាលក្រុងព្រះសីហនុ បានបញ្ជាក់ឱ្យដឹងថា ឆ្នាំ២០២៥នេះក៏មិនខុសពីឆ្នាំ២០២៤ ដែលរដ្ឋបាលក្រុងព្រះសីហនុបានរៀបចំព្រឹត្តិការណ៍សង្ក្រាន្តនៅឆ្នេរអូរត្រេះ ដើម្បីអបអរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ពុទ្ធសករាជ ២៥៦៩ គឺនៅថ្ងៃទី១៤-១៦ ខែមេសា ឆ្នាំ២០២៥។ រដ្ឋបាលក្រុងបានរៀបចំសង្ក្រាន្តឆ្នេរអូរត្រេះដើម្បីបង្កើតព្រឹត្តិការណ៍សប្បាយរីករាយជូនប្រជាពលរដ្ឋ ភ្ញៀវទេសចរជាតិ និងអន្តរជាតិមកចូលរួមលេងកម្សាន្តនៅសង្ក្រាន្តឆ្នេរអូរត្រេះ ក្រុងព្រះសីហនុ។ ហើយឆ្នាំនេះ រដ្ឋបាលក្រុងព្រះសីហនុបានរៀបចំសង្ក្រាន្តនៅតាមតំបន់ឆ្នេរចំនួនពីរ៖ ទី១. រៀបចំសង្ក្រាន្តនៅឆ្នេរអូត្រេះ និងទីតាំងទី២. នៅឆ្នេរអូរឈើទាល គឺចាប់ពីថ្ងៃទី១៣-១៦ ខែមេសា ចាប់ពីពេលរសៀល។

លោកអភិបាលក្រុងព្រះសីហនុក៏បានបញ្ជាក់បន្ថែមទៀតថា ដើម្បីបង្កឱ្យមានភាពទាក់ទាញ និងសប្បាយរីករាយជួបជុំគ្នា ក្នុងឱកាសពិធីបុណ្យចូលឆ្នាំថ្មីប្រពៃណីជាតិកាន់តែមានភាពសប្បាយរីករាយបន្ថែមទៀតនោះ គឺទាមទារឱ្យប្រជាពលរដ្ឋចូលរួមថែរក្សាសុខសន្តិភាព ទើបយើងបានរៀបចំធ្វើការជួបជុំសង្ក្រាន្ដឆ្នេរអូរត្រេះនាពេលនេះ ទន្ទឹមនឹងការចូលរួមសប្បាយរីករាយនៅឆ្នេរអូរត្រេះជូនបងប្អូនប្រជាពលរដ្ឋ ជាពិសេសយុវជនរបស់យើងចូលរួមលេងកម្សាន្តប្រកបដោយរីករាយ។

ទន្ទឹមនឹងនេះ លោកអភិបាលក្រុងព្រះសីហនុក៏បានធ្វើការអំពាវនាវដល់ប្រជាពលរដ្ឋដែលបាន និងកំពុងចូលរួមសប្បាយរីករាយក្នុងឱកាសសង្ក្រាន្ដអូរត្រេះ ត្រូវរួមគ្នារក្សាភាពថ្លៃថ្នូរ រក្សាសីលធម៌ សុជីវធម៌ គោរពស្រឡាញ់គ្នាទៅវិញទៅមក ម្យ៉ាងទៀតសូមចូលរួមថែរក្សាអនាម័យ បរិស្ថាននៅតាមតំបន់ឆ្នេរក្នុងខេត្តព្រះសីហនុ។

សូមបញ្ជាក់ថា សង្ក្រាន្តឆ្នេរអូរត្រេះមានប្រជាពលរដ្ឋ ភ្ញៀវទេសចរជាតិ អន្តរជាតិចូលរួមលេងល្បែងប្រជាប្រិយ របាំប្រជាប្រិយជាច្រើន រាំកម្សាន្ត ដើម្បីលើកស្ទួយអត្តសញ្ញាណជាតិខ្មែរសម្រាប់កូនចៅជំនាន់ក្រោយ៕

ដោយ ងូ សុមុនី