AKP ភ្នំពេញ ថ្ងៃទី០៩ ខែមេសា ឆ្នាំ ២០២៥-- មន្រ្តីកសិកម្មថ្មីចំនួន២០ឃុំ ក្នុងស្រុកស្វាយអន្ទរ ខេត្តព្រៃវែង បានចុះទៅជួបអាជ្ញាធរភូមិ ដើម្បីណែនាំខ្លួន និងតួនាទីភារកិច្ចទៅកាន់លោកមេភូមិ ដើម្បីស្នើសុំកិច្ចការសហការ និងស្នើសុំទិន្នន័យបន្ថែមទាក់ទងនឹងការងារកសិកម្មក្នុងភូមិ ដូចជាចំនួនគ្រួសារធ្វើកសិកម្ម ផ្ទៃដីធ្វើកសិកម្មក្នុងភូមិ ផ្ទៃដីដាំដុះ ដំណាំ ប្រភេទពូជស្រូវ និងបញ្ហាប្រឈមរបស់កសិករជួបប្រទះ នាពេលកន្លងមក។ នេះបើតាមការឱ្យដឹងពីនាយកដ្ឋានផ្សព្វផ្សាយកសិកម្ម នៅថ្ងៃទី០៩ ខែមេសា ឆ្នាំ២០២៥។

ក្រោយពីបានទទួលព័ត៌មានតាមបណ្តាភូមិរួចមក មន្ត្រីកសិកម្មឃុំទាំងអស់បានរៀបចំកិច្ចប្រជុំផ្សព្វផ្សាយស្ដីពីគោលការណ៍ដាំដុះ ការធ្វើស្រែល្អ ដូចជាការប្រើប្រាស់ពូជសុទ្ធ ការពង្រាបដី ការប្រើប្រាស់ជីសរីរាង្គ អត្ថប្រយោជន៍នៃការភ្ជួរលប់គល់ជញ្រ្ជាំង ការប្រើប្រាស់ពូជសុទ្ធ និងបានណែនាំពីតួនាទីភារកិច្ចរបស់មន្រ្តីកសិកម្មឃុំ ការកែលម្អបច្ចេកទេសលើប្រព័ន្ធផលិតកម្មដំណាំស្រូវតាមរយៈការបង្ហាញពីពូជមានសក្ដានុពល គឺពូជសុទ្ធផ្ការំដួល និងពូជសុទ្ធសែនក្រអូប ដើម្បីផ្សារភ្ជាប់ជាមួយទីផ្សារ  បានផ្សព្វផ្សាយពីអត្ថប្រយោជន៍ការកសាងក្រុមសមកាលកម្ម និងសហគមន៍កសិកម្មទំនើប ជាដើម  និងបានពិភាក្សាអំពីបញ្ហាប្រឈម និងវិធីសាស្ត្រកាត់បន្ថយថ្លៃដើមផលិត និងកសិករសហការតម្រូវការពូជសុទ្ធពូជផ្ការំដួល។

សូមបញ្ជាក់ថា មន្រ្តីឃុំទាំង២០ចុះផ្សព្វផ្សាយកសិកម្ម រួមមាន ឃុំដូនកឹង ឃុំប្ញស្សីសាញ់  ឃុំព្រៃទទឹង ឃុំជីផុច ឃុំធាយ ឃុំឈើកាច់ ឃុំពានរោង ឃុំស្វាយអន្ទរ ឃុំបឹងព្រះ ឃុំស្ពឺ ក ឃុំស្ពឺ ខ ឃុំព្រៃខ្លា ឃុំរក្សជ័យ ឃុំរោងដំរី ឃុំជាខ្លាង ឃុំពពឹស ឃុំជ្រៃ ឃុំស្វាយជ្រំ ឃុំអំពិលក្រៅ និង ឃុំព្រែកជ្រៃ៕

ដោយ ណយ នឿន