AKP ភ្នំពេញ ថ្ងៃទី០៩ ខែមេសា ឆ្នាំ ២០២៥-- លោក ចាប វិបុល នាយកអង្គការ WWF-កម្ពុជា បានចូលជួបឯកឧត្តម ងិន សុវិមាន អភិបាលរងខេត្តមណ្ឌលគិរី និងថ្នាក់ដឹកនាំខេត្តសំខាន់ៗជាច្រើនរូបទៀត។ ក្រៅពីសារជូនពរគ្នាទៅវិញទៅមកក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខ មានការពិភាក្សាអំពីការងារអភិរក្ស និងតំបន់ភាគខាងកើត ក្នុងខេត្តខេត្តមណ្ឌលគិរីផងដែរ ក្នុងដំណើរទស្សនកិច្ចទៅកាន់តំបន់នោះ ។

ប្រភពពីអង្គការ WWF បានឱ្យដឹងនៅថ្ងៃទី០៨ ខែមេសា ឆ្នាំ២០២៥ថា នៅក្នុងជំនួបនេះ ក្រុមការងារបានធ្វើបច្ចុប្បន្នភាពអំពីកម្មវិធីអភិរក្ស ក៏ដូចជាបង្ហាញពីសារៈសំខាន់នៃដំណើរទស្សនកិច្ចនាពេលនេះ គឺបានជួយពង្រឹងភាពជាដៃគូចំពោះការអនុវត្តសកម្មភាពគម្រោងនៅក្នុងតំបន់ទេសភាពខ្ពង់រាបខាងកើត។ ជាមួយគ្នានេះដែរ ថ្នាក់ដឹករបស់អង្គការ WWF-កម្ពុជា ក៏បានចុះជួបពិភាក្សាការងារ ក៏ដូចស្វែងយល់បន្ថែមអំពីបញ្ហាប្រឈមនានាក្នុងកិច្ចការល្បាត និងការកសាងសមត្ថភាព ជាមួយមន្ត្រីឧទ្យានុរក្សនៅស្នាក់ការចំនួន ២ នៅក្នុងដែនជម្រកសត្វព្រៃស្រែពក។ 

ជាលទ្ធផល ថ្នាក់ដឹកនាំរបស់យើងក៏បានទៅមើលត្រពាំងដែលនៅក្បែរនោះ ដើម្បីស្វែងយល់ឱ្យកាន់តែច្បាស់អំពីទំនាក់ទំនង និងសារៈសំខាន់ទៅវិញទៅមកនៃព្រៃឈើ និងសត្វព្រៃនៅក្នុងតំបន់នេះ៕

ដោយ ណយ នឿន (ប្រភព៖ WWF)