AKP ភ្នំពេញ ថ្ងៃទី០៩ ខែមេសា ឆ្នាំ២០២៥–សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី០៩ ខែមេសាឆ្នាំ២០២៥នេះ អញ្ជើញជាអធិបតី ក្នុងពិធីប្រកាសដាក់ឱ្យអនុវត្តជាផ្លូវការ នូវ «កម្មវិធីពិសេសជំរុញ ការវិនិយោគក្នុងខេត្តទាំងបួននៅភូមិភាគឦសាននៃ ព្រះរាជាណាចក្រកម្ពុជា ឆ្នាំ ២០២៥-២០២៨» នៅសណ្ឋាគារសុខាភ្នំពេញ។

រាជរដ្ឋាភិបាល សម្រាប់នីតិកាលទី ៧ នៃរដ្ឋសភា, ក្រោមការដឹកនាំដ៏ត្រឹមត្រូវ, ស្វាហាប់, ឈ្លាសវៃ និង ប៉ិនប្រសប់ របស់ សម្តេចមហាបវរធិបតី ហ៊ុន ម៉ាណែត, នាយករដ្ឋមន្ត្រី នៃព្រះរាជាណាចក្រកម្ពុជា, បានដាក់ចេញនូវ យុទ្ធសាស្ត្របញ្ចកោណ- ដំណាក់កាលទី ១ ដើម្បី កំណើន, ការងារ, សមធម៌, ប្រសិទ្ធភាព និង ចីរភាព ដោយ កំណត់យកនូវ អាទិភាពគន្លឹះ ចំនួន ៥ គឺ៖ មនុស្ស, ផ្លូវ, ទឹក, ភ្លើង និង បច្ចេកវិទ្យា, ជាពិសេស បច្ចេកវិទ្យាឌីជីថល ដើម្បីលើកកម្ពស់ផលិតភាពសេដ្ឋកិច្ចជាតិ និង ជំរុញ បរិវត្តកម្មឌីជីថលនៃសេដ្ឋកិច្ច និង សង្គមកម្ពុជា ដែលជាគ្រឹះ និង ជាមធ្យោបាយដ៏ សំខាន់ ក្នុងការសម្រេចបាន នូវ ចក្ខុវិស័យកម្ពុជា ឆ្នាំ ២០៥០ ។ ក្នុងនោះ, បញ្ចកោណទី ២ បានគូសរំលេចពីសារៈសំខាន់នៃ «ការធ្វើពិពិធកម្មសេដ្ឋកិច្ច និង ការបង្កើនភាពប្រកួតប្រជែង», ហើយ មុំទី ១ បានផ្តោតការយកចិត្តទុកដាក់លើ «ការអភិវឌ្ឍវិស័យគន្លឹះ និង ប្រភពថ្មីនៃកំណើនសេដ្ឋកិច្ច» ដែលជាមូលដ្ឋានយុទ្ធសាស្ត្រ សម្រាប់ «កម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាន នៃ ព្រះរាជាណាចក្រកម្ពុជា ឆ្នាំ ២០២៥-២០២៨», ដែលហៅកាត់ថា «កម្មវិធីពិសេស» ។

ក្នុង «ពិធីសំណេះសំណាល និង ពិសាភោជនាហារសាមគ្គី នៃមហាគ្រួសារ សមាគមឧកញ៉ាកម្ពុជា និង សមាគមអ្នកអភិវឌ្ឍន៍លំនៅឋាននៅកម្ពុជា» កាលពីថ្ងៃទី ២ ខែ សីហា ឆ្នាំ ២០២៤ និង ក្នុងសេចក្តីថ្លែងការណ៍ពិសេស ស្តីពី «សមិទ្ធផល ១ ឆ្នាំ របស់រាជរដ្ឋាភិបាល នីតិកាលទី ៧ នៃរដ្ឋសភា» កាលពីថ្ងៃទី ២៤ ខែ សីហា ឆ្នាំ ២០២៤, សម្តេចមហាបវរធិបតី នាយករដ្ឋមន្ត្រី បានផ្តល់ការណែនាំ និង ការចង្អុលបង្ហាញដ៏ខ្ពង់ខ្ពស់ ដល់គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ (គ.ស.ហ.) ឱ្យពិនិត្យ និង រៀបចំ «កម្មវិធីពិសេស» នេះ ដើម្បីសិក្សា និង រៀបចំគោលនយោបាយលើកទឹកចិត្តពិសេស ក្នុងគោលដៅជំរុញវិនិយោគឯកជន ឆ្ពោះ ទៅភូមិភាគឦសាននៃព្រះរាជាណាចក្រកម្ពុជា ។ បន្ទាប់ពីទទួលបាននូវអនុសាសន៍ ដ៏ខ្ពង់ខ្ពស់នេះរួចមក, ក្រុមការងារអន្តរក្រសួងមួយ, ដែលមានសមាសភាពពីក្រសួង- ស្ថាប័នពាក់ព័ន្ធ និង រដ្ឋបាលខេត្តទាំងបួន, ត្រូវបានបង្កើតឡើង និង បានចាប់ផ្តើមចុះ ធ្វើការសិក្សាពីកត្តាភូមិសាស្ត្រ, ប្រជាសាស្ត្រ, សង្គម-សេដ្ឋកិច្ច និង លក្ខខណ្ឌសំខាន់ ផ្សេងទៀត នៃបណ្តាខេត្តទាំងបួន រួមមាន៖ ខេត្តក្រចេះ, ខេត្តស្ទឹងត្រែង, ខេត្តរតនគិរី និង ខេត្តមណ្ឌលគិរី, ដើម្បីដាក់ចេញនូវកម្មវិធីពិសេសជំរុញការវិនិយោគឱ្យចំគោលដៅ, គ្រប់ជ្រុងជ្រោយ និង អាចអនុវត្តបានដោយរលូន, ស្របតាមបំណងប្រាថ្នា របស់ ប្រមុខរាជរដ្ឋាភិបាល។

ក្នុងកិច្ចដំណើរការនៃការសិក្សា និង ការរៀបចំ «កម្មវិធីពិសេស» នេះ, ក្រុមការងារ បានប្រមូលព័ត៌មាន និង ទិន្នន័យ ព្រមទាំងបានពិគ្រោះយោបល់ ជាមួយ ភាគីពាក់ព័ន្ធជាច្រើន តាមរយៈការចុះបំពេញបេសកកម្ម; ការរៀបចំជំនួបដោយផ្ទាល់ ជាមួយភាគីពាក់ព័ន្ធ មានជាអាទិ៍៖ រដ្ឋបាលនៃខេត្តទាំងបួន, មន្ទីរជំនាញពាក់ព័ន្ធ, តំណាងវិស័យឯកជននៅមូលដ្ឋាន, និង សហគមន៍ទេសចរណ៍; ក៏ដូចជា ការចុះ ពិនិត្យទីតាំងសំខាន់ៗ ដើម្បីស្វែងយល់ពីសក្តានុពល, បញ្ហាប្រឈម និង ស្ថានភាព អភិវឌ្ឍន៍ជាក់ស្តែង ។ បន្ទាប់មក, ក្រុមការងារ បានរៀបចំកិច្ចប្រជុំកម្រិតបច្ចេកទេស ជាបន្តបន្ទាប់ ដើម្បីពិភាក្សា និង ប្រមូលធាតុចូលបន្ថែម ឱ្យបានស៊ីជម្រៅ និង គ្រប់ ជ្រុងជ្រោយ មុននឹងដាក់ជូនគណៈកម្មាធិការគោលនយោបាយសេដ្ឋកិច្ច និង ហិរញ្ញវត្ថុ ពិនិត្យ និង សម្រេចលើសេចក្តីព្រាង «កម្មវិធីពិសេស» នេះ ។ បន្ទាប់មក, នាថ្ងៃទី ២៤ ខែ មករា ឆ្នាំ ២០២៥, សម្តេចមហាបវរធិបតី នាយករដ្ឋមន្ត្រី បានពិនិត្យ សម្រេច និង ផ្តល់ការអនុម័តដ៏ខ្ពង់ខ្ពស់ លើខ្លឹមសារនៃ «កម្មវិធីពិសេស» នេះ និង បានចេញសេចក្តីសម្រេចរបស់រាជរដ្ឋាភិបាល លេខ ២៨ សសរ ចុះថ្ងៃទី ២៧ ខែ កុម្ភៈ ឆ្នាំ ២០២៥ ដើម្បីដាក់ឱ្យអនុវត្តនូវ «កម្មវិធីពិសេស» នេះ ។ការគិតគូររៀបចំនូវ «កម្មវិធីពិសេសរបស់រាជរដ្ឋាភិបាល» នេះ កើតចេញពី មហិច្ឆតា ចង់ជំរុញបង្កើននូវសកម្មភាពសេដ្ឋកិច្ច ដល់បណ្តាខេត្តដែលស្ថិតនៅឆ្ងាយពី មជ្ឈមណ្ឌលកំណើន ក៏ដូចជា ដើម្បីធ្វើពិពិធកម្មសេដ្ឋកិច្ច តាមតំបន់ និង តាមវិស័យ ។ ក្នុងការរៀបចំ «កម្មវិធីពិសេស» នេះ, រាជរដ្ឋាភិបាល មានគោលបំណងបង្កើនការងារ និង សកម្មភាពធុរកិច្ច ស្របតាម គំរូនៃការអភិវឌ្ឍសេដ្ឋកិច្ចនៅនឹងកន្លែង និង គំរូនៃ កំណើនសេដ្ឋកិច្ច ដឹកនាំដោយវិស័យឯកជន (Private Sector-led Growth Model) ។ ក្នុងន័យនេះ, ការដាក់ទិសដៅអាទិភាព ដើម្បីទាក់ទាញវិនិយោគឯកជន ឆ្ពោះទៅទិស ឦសាន ត្រូវមានលក្ខណៈជាយុទ្ធសាស្ត្រ, ពោលគឺ ត្រូវកំណត់នូវលក្ខខណ្ឌ និង វិធានការលើកទឹកចិត្ត ដែលអាចឈានទៅពង្រីកមូលដ្ឋានសេដ្ឋកិច្ច ដែលមានស្រាប់ ក្នុងខេត្តនីមួយៗផង, ជំរុញឱ្យមានការតភ្ជាប់ខ្សែច្រវាក់ផលិតកម្ម ពីខេត្តមួយទៅខេត្ត មួយផង, និង អភិវឌ្ឍវិស័យគន្លឹះ និង ប្រភពថ្មីនៃកំណើនសេដ្ឋកិច្ចជាតិទាំងមូលផង, ស្របតាមបំណងប្រាថ្នា របស់រាជរដ្ឋាភិបាល ដូចត្រូវបានចង្អុលបង្ហាញក្នុង យុទ្ធសាស្ត្របញ្ចកោណ-ដំណាក់កាលទី ១ ។

ខេត្តទាំងបួននៅភូមិភាគឦសាន ជាខេត្តមានកត្តាទាយជ្ជទាន ដែលអំណោយផល ដល់វិស័យកសិកម្ម, កសិ-ឧស្សាហកម្ម និង ទេសចរណ៍ ។ ដំណាំកសិកម្ម និង កសិ-ឧស្សាហកម្ម ក្នុងខេត្តទាំងបួន រួមមាន៖ កៅស៊ូ, ស្វាយចន្ទី, ដំឡូងមី, ម្រេច និង ចេកអំបូងលឿង ជាដើម, សុទ្ធសឹងជាកសិផលយុទ្ធសាស្ត្រ ប្រកបដោយសក្តានុពល, ទាំងសម្រាប់ទីផ្សារខាងក្រៅ និង ទីផ្សារក្នុងស្រុក ។ ជាក់ស្តែង, ក្នុងឆ្នាំ ២០២៤, បរិមាណផលនៃប្រភេទដំណាំទាំងនេះ ក្នុងខេត្តទាំងបួន មានទំហំប្រមាណ ២០ ទៅ ៦០ ភាគរយ នៃបរិមាណផលសរុបទូទាំងប្រទេស។ តួលេខនេះ សបញ្ជាក់ច្បាស់ពីផលិតភាព និង ភាពអំណោយផលខ្ពស់ នៃស្ថានភាពដី, កត្តាភូមិសាស្ត្រ និង អាកាសធាតុ ក្នុងតំបន់ភូមិភាគឦសាន ចំពោះដំណាំទាំងអស់នេះ ។ ជាមួយគ្នានេះ, ភាពសម្បូរបែប នៃសម្បត្តិធម្មជាតិ រួមមាន៖ អាកាសធាតុត្រជាក់, ខ្យល់បរិសុទ្ធ, ធនធានធម្មជាតិចម្រុះ, ព្រៃឈើ និង ដែនជម្រកសត្វព្រៃ ជាដើម បានធ្វើឱ្យខេត្តទាំងបួន ក្លាយជាតំបន់ដែល មានសក្តានុពលទេសចរណ៍ធម្មជាតិ និង អេកូទេសចរណ៍, ជាពិសេស ទេសចរណ៍ អត្តសញ្ញាណពិសេស (Unique Identity Tourism) ដែលសំដៅលើផលិតផល ទេសចរណ៍វប្បធម៌, ធម្មជាតិ និង ប្រវត្តិសាស្ត្រ ដែលមានលក្ខណៈពិសេសដោយឡែក សម្រាប់ខេត្ត និង តំបន់ភូមិភាគឦសាននៃប្រទេស តែប៉ុណ្ណោះ៕

ដោយ៖ គង់ សិរីរ័ត្ន