AKP ភ្នំពេញ ថ្ងៃទី០៨ ខែមេសា ឆ្នាំ២០២៥ -- ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពការងារអភិវឌ្ឍន៍ “ភូមិគំរូគន្លឹះ” ប្រចាំឆ្នាំ២០២៥ នៅក្នុងប្រទេសកម្ពុជា នាព្រឹកថ្ងៃអង្គារ ទី០៨ ខែមេសា ឆ្នាំ២០២៥ នៅទីស្ដីការក្រសួង ដោយមានការអញ្ជើញចូលរួមពីសំណាក់ឯកឧត្តមរដ្ឋលេខាធិការប្រចាំការ ឯកឧត្តមរដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង ប្រធាននាយកដ្ឋាន ថ្នាក់ដឹកនាំ ព្រមទាំងមន្ដ្រីរាជការជំនាញនៃនាយកដ្ឋានអភិវឌ្ឍន៍សហគមន៍។

ក្នុងកិច្ចប្រជុំនោះ លោក អឿន ធារិទ្ធ ប្រធាននាយកដ្ឋានអភិវឌ្ឍន៍សហគមន៍ បានធ្វើបទបង្ហាញស្ដីពីលទ្ធផលផ្ទៀងផ្ទាត់ការវាយតម្លៃលក្ខណៈសម្បត្តិ “ភូមិគំរូគន្លឹះ” ឆ្នាំ២០២៥ ដោយផ្អែកលើលក្ខណៈវិនិច្ឆ័យទាំង ៥ចំណុចដែលបានកំណត់ រួមមាន៖ សេដ្ឋកិច្ច សង្គម និងវប្បធម៌ សុខភាព និងបរិស្ថានរស់នៅ ហេដ្ឋារចនាសម្ព័ន្ធ និងអភិបាលកិច្ច។

ក្នុងឱកាសនោះ ឯកឧត្តម ឆាយ ឫទ្ធិសែន បានថ្លែងអំណរគុណចំពោះថ្នាក់ដឹកនាំ និងមន្ដ្រីជំនាញទាំងអស់ ដែលបានខិតខំបំពេញការងារឱ្យសម្រេចបានលទ្ធផលល្អប្រសើរ និងបានមានប្រសាសន៍ថា ស្របពេលដែលប្រទេសជាតិមានសុខសន្ដិភាពពេលលេញ ដែលបានមកពីការដឹកនាំរបស់ សម្តេចតេជោ ហ៊ុន សែន ជាបិតាសន្តិភាព ស្ថាបនិកមគ្គុទេសក៍ឯក និងប្រតិបត្តិករនយោបាយឈ្នះឈ្នះ និងក្រោមការបន្តវេនដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងនីតិកាលទី៧ នៃរដ្ឋសភា តំបន់ជនបទបាន និងកំពុងមានការរីកចម្រើនគួរឱ្យកត់សម្គាល់ ដែលបានកាត់បន្ថយគម្លាតរវាងតំបន់ជនបទ និងទីប្រជុំជនឱ្យនៅជិតគ្នា។ ជាមួយគ្នានេះដែរ ក្រសួងអភិវឌ្ឍន៍ជនបទបាន និងកំពុងបន្ដខិតខំជំរុញការងារអភិវឌ្ឍន៍សហគមន៍នៅតំបន់ជនបទឱ្យសម្រេចបានជោគជ័យ តាមរយៈការអភិវឌ្ឍភូមិគំរូគន្លឹះ ដែលជាភូមិមានតួនាទីសម្រាប់ផ្ដល់ផលប្រយោជន៍ដល់ភូមិដទៃទៀត។

លើសពីនេះទៀត ឯកឧត្តមរដ្ឋមន្ដ្រីបានផ្ដល់អនុសាសន៍ជូនចំពោះថ្នាក់ដឹកនាំទទួលបន្ទុក និងនាយកដ្ឋានជំនាញ ធ្វើការត្រួតពិនិត្យ និងវាយតម្លៃ អំពីផលជះជាវិជ្ជមាន ដែលទទួលបានពីការអភិវឌ្ឍភូមិគំរូ ទាំង៣០កន្លងមក លើភូមិដទៃទៀតដែលនៅជុំវិញ៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)