AKP កំពង់ធំ ថ្ងៃទី០៤ ខែមេសា ឆ្នាំ២០២៥ -- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងខេត្តកំពង់ធំ និងជាអនុប្រធានអចិន្ត្រៃយ៍នៃគណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ អមដំណើរដោយលោកវរសេនីយ៍ឯក សោម សុភាវុធ មេបញ្ជាការររងនាយសេនាធិការ កាលពីថ្ងៃទី០៣ ខែមេសា ឆ្នាំ២០២៥ បានដឹកនាំកងកម្លាំងត្រួតពិនិត្យភូមិសាស្ត្រតំបន់ឡូតិ៍អភិរក្សពូជត្រីចំនួន ៥កន្លែងនៅក្នុងភូមិសាស្ត្រឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ ដេីម្បីដាក់ផែនការការប្រេីប្រាស់កងកម្លាំងការពារក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ។

ឧត្តមសេនីយ៍ទោ សោម ស៊ុន បានបញ្ជាក់ថា នេះជាការអនុវត្តតាមបទបញ្ជារបស់គណៈបញ្ជាការឯកភាពដឹកនាំបង្ក្រាបបទល្មើសនេសាទខុសច្បាប់នៅក្នុងភូមិសាស្ត្រខេត្តទាំង០៥ (រួមមានខេត្តបាត់ដំបង ពោធិ៍សាត់ សៀមរាប កំពង់ឆ្នាំង និងខេត្តកំពង់ធំ) ក្នុងតំបន់បឹងទន្លេសាបស្ដីពី វិធានការយ៉ាងមុឺងម៉ាត់ក្នុងការការពារតំបន់ឡូតិ៍អភិរក្សពូជត្រី ការគ្រប់គ្រងការហ៊ុំព័ទ្ធសម្រាស់យកត្រីដែលប្រព្រឹត្តដោយឧបករណ៍នេសាទខុសច្បាប់ និងកិច្ចសហប្រតិបត្តិការការពារសន្តិសុខ សុវត្ថិភាពជូនភ្ញៀវទេសចរណ៍ជាតិ និងអន្តរជាតិ ដែលមានគោលបំណងមកទស្សនាកម្សាន្តក្នុងបឹងទន្លេសាបក្នុងឱកាសបុណ្យចូលឆ្នាំថ្មីនេះឱ្យទទួលបានសន្តិសុខ និងសុវត្ថិភាពល្អ។

ការចុះត្រួតពិនិត្យតាមតំបន់ឡូតិ៍អភិរក្សពូជត្រីទាំង៥ នោះរួមមាន ទី១.តំបន់ឡូត៍អភិរក្សព្រែកខ្សាច់ទី២.តំបន់ឡូត៍អភិរក្សព្រែកធ្លក ទី៣.តំបន់ឡូត៍អភិរក្សព្រែកតាប៉ា ទី៤.តំបន់ឡូត៍អភិរក្សព្រែកបា និងទី៥.តំបន់ឡូត៍អភិរក្សលេខពីរស្ទួន ដែលត្រូវរៀបចំកងកម្លាំងសហការជាមួយស្ថាប័នជំនាញ និងអាជ្ញាធរដែនដីដើម្បីគ្រប់គ្រង និងការពារឱ្យបាន មិនឱ្យមានការកេីតឡេីងនូវសកម្មភាពលួចឆក់ត្រី ឬសកម្មភាពនេសាទគ្រប់ប្រភេទនៅក្នុងតំបន់ហាមឃាត់នេះក្នុងរដូវបុណ្យចូលឆ្នាំដែលជាថ្ងៃឈប់សម្រាកជាដាច់ខាត។

នៅក្នុងឱកាសនោះដែរ ឧត្តមសេនីយ៍ទោ សោម ស៊ុនបានជួបណែនាំប្រជាពលរដ្ឋចំនួន ៥គ្រួសារដែលជាជនចំណាកស្រុកមកពីខេត្តកំពង់ឆ្នាំងដែលបានមកបោះទីជម្រកស្នាក់នៅបណ្ដោះអាសន្ន ប្រកបមុខរបរធ្វើចំការនៅក្នុងតំបន់ឡូត៍អភិរក្សនេះ ដោយមិនអនុញ្ញាតឱ្យធ្វើសកម្មភាពនេសាទទេ បើទោះបីជាក្នុងរូបភាពណាក៏ដោយ ហើយបានសំណូមពរដល់អាជ្ញាធរដែនដី និងស្ថាប័នជំនាញមានវិធានការចំពោះពួកគាត់ដើម្បីធ្វើការរុះរើចាកចេញពីតំបន់ហាមឃាត់នេះតាមច្បាប់ស្ដីពី ជលផល។

ឧត្តមសេនីយ៍ទោ សោម ស៊ុន បានប្រគល់ភារកិច្ចជូនកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ត្រូវចាត់តាំងកងកម្លាំងយាមល្បាតប្រចាំការ ២៤ម៉ោងលើ ២៤ម៉ោង នៅក្នុងតំបន់ឡូត៍អភិរក្សទាំង៥ ខាងលើនេះនៅក្នុងឱកាសថ្ងៃឈប់សម្រាកបុណ្យចូលឆ្នាំថ្មីប្រពៃណីជាតិខ្មែរឱ្យមានប្រសិទ្ធភាពនិងទទួលបានជោគជ័យដើម្បីបុព្វហេតុជាតិ និងប្រជាជន៕

ដោយ ស៊ុម វណ្ណា (ប្រភពតំបន់សឹករងកំពង់ធំ)