AKP កំពង់ចាម ថ្ងៃទី០១ ខែមេសា ឆ្នាំ២០២៥ -- នៅសាលសន្និសីទសាលាខេត្តកំពង់ចាម នាព្រឹកថ្ងៃទី០១ ខែមេសា ឆ្នាំ២០២៥ សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ និងក្រុមចលនាស្ត្រី ខេត្តកំពង់ចាម បើកកិច្ចប្រជុំបូកសរុបលទ្ធផលការងារប្រចាំឆ្នាំ២០២៤ និងលើកទិសដៅបន្ត ក្រោមអធិបតីភាពរបស់ឯកឧត្តម ខ្លូត ផន ប្រធានក្រុមប្រឹក្សាខេត្ត ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត និងជំទាវ ញូង ចរិយា អ៊ុន ចាន់ដា ប្រធានកិត្តិយស សាខា សមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្ត និងលោក សួស ឡា ប្រធានសាលាដំបូងខេត្ត ដោយមានការចូលរួមពីលោកជំទាវ លោកស្រីជាថ្នាក់ដឹកនាំ និងសមាជិកាគណៈកម្មាធិការសាខាសមាគមនារីដើម្បីសន្តិភាព និងអភិវឌ្ឍន៍ខេត្ត លោក លោកស្រី ប្រធានមន្ទីរ អង្គភាពជុំវិញខេត្តលោកស្រីប្រធាន អនុប្រធាន សមាជិកាអនុសាខាសមាគមនារីកម្ពុជាដើម្បីសន្តិភា អភិវឌ្ឍន៍ មន្ទីរអង្គភាព ក្រុង/ស្រុក ឃុំ ផងដែរ។

ក្នុងឱកាសនោះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត បានកោតសរសើរចំពោះការខិតខំប្រឹងប្រែងរបស់សាខាសមាគមនារី និងក្រុមចលនាស្ត្រី ដែលបានរៀបចំពង្រឹង និងពង្រីករចនាសម្ពន្ធ័ បណ្តាញសមាគមនារី ឱ្យកាន់តែមានភាពរឹងមាំ និងទូលំទូលាយ ដើម្បីរួមចំណែក ក្នុងការលើកកម្ពស់ស្ថានភាព ជីវភាពស្ត្រី ជាពិសេសអំពីតួនាទី ឋានៈ ចំណេះដឹងជំនាញ ក៏ដូចចូលរួមដោះស្រាយនូវក្តីកង្វល់ បញ្ហាប្រឈម និងតម្រូវការរបស់ស្ត្រីនិងកុមារ ទូទាំងខេត្តកាន់តែ មានភាពរឹងមាំ។ ក្នុងនីតិកាលទី៧នៃរដ្ឋសភា ក្រោមការដឹកនាំដ៏ប៉ិនប្រសប់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ច កោណ ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីវភាព ដោយកំណត់ យកអាទិភាពគន្លឹះចំនួន៥ រួមមាន៖ មនុស្ស ផ្លូវ ទឹក ភ្លើង និងបច្ចេកវិទ្យា ព្រមទាំងបានកំណត់ សមភាពយេនឌ័រ និងការបង្កើនភាពអង់អាចដល់ស្ត្រី និងក្មេងស្រីជាអាទិភាពផងដែរ។ តាមរយៈ ការពង្រឹងភាពជាពលរដ្ឋក្នុងសង្គម ដែលមានអារ្យធម៌ខ្ពស់ ប្រកបដោយសីលធម៌ សមធម៌ និង បរិយាបន្ន ដែលក្នុងនោះស្ត្រី គឺជាស្នូល ដែលផ្តល់ឱកាសបន្ថែមទៀតសម្រាប់ការចូលរួមរបស់ស្ត្រី ក្នុងការកំណត់ជោគវាសនារបស់ប្រទេសជាតិ។ រាជរដ្ឋាភិបាលកម្ពុជា ក៏បាននិងកំពុងជំរុញការលើកកម្ពស់គុណតម្លៃស្ត្រី តាមរយៈការពង្រឹង សមត្ថភាពស្ត្រីឱ្យក្លាយជាអ្នកដឹកនាំតាមក្រសួង ស្ថាប័នរបស់ជាតិ រួមមាន ស្ថាប័នរដ្ឋសភា ព្រឹទ្ធ សភា និងរាជរដ្ឋាភិបាល ព្រមទាំងបង្កើនការយកចិត្តទុកដាក់អភិវឌ្ឍធនធានស្ត្រី ក្នុងវិស័យ នយោបាយ វិស័យសេដ្ឋកិច្ច និងវិស័យសង្គមកិច្ចជាដើម សំដៅធានា និងឆ្លើយតបទៅនឹងសាកល ភាវូបនីយកម្ម ទាំងក្នុងក្របខណ្ឌតំបន់ និងពិភពលោក។ កម្ពុជាក្រោមសុខសន្តិភាពរយៈកាលជាង៤០ឆ្នាំក្រោមការដឹកនាំរបស់ សម្តេចតេជោ ហ៊ុន សែន មិនត្រឹមតែទទួលបានការអភិវឌ្ឍសុខដុមរមនីយកម្មនៃគ្រួសារខ្មែ តែមួយប៉ុណ្ណោះទេ ប៉ុន្តែការលើកតម្កើងសិទ្ធសេរីភាពសម្រាប់ស្រ្តី យុវតី គឺមានភាពសំខាន់ ដូចគ្នានិងស្មើភាពគ្នារវាងបុរស និងស្រ្តី ពិសេសគឺការផ្តល់ជូននូវឱកាសការងារសម្រាប់ស្រ្តីលើគ្រប់វិស័យ។

ឯកឧត្តម អ៊ុន ចាន់ដា បានផ្តាំផ្ញើដល់បងប្អូននារីថ្នាក់ខេត្ត ស្រុក ក្រុង មន្ទីរអង្គភាព និងថ្នាក់មូលដ្ឋាន ត្រូវចូលរួមអនុវត្តយុទ្ធសាស្ត្របញ្ចកោណ ដំណាក់កាលទី១ ពង្រឹងរចនាសម្ព័ន្ធសមាគមនារី និងគណៈចលនាស្ត្រីឆ្នាំ២០២៥ តាមរយៈការបណ្តុះបណ្តាលជំនាញ ជាពិសេសការប្រើប្រាស់ប្រព័ន្ធព័ត៌មានវិទ្យា ក្នុងយុគសម័យឌីជីថល និងពង្រឹងកិច្ចសហប្រតិបត្តិការ ជាមួយបណ្តានារី ទាំងថ្នាក់ជាតិ ទាំងថ្នាក់ក្រោមជាតិ ស្ថាប័នពាក់ព័ន្ធ សប្បុរសជនទាំងក្នុង និងក្រៅប្រទេស ព្រមទាំងធ្វើការផ្សព្វផ្សាយបានយល់ដឹងអំពីលក្ខន្តិកៈសមាគមនារី ត្រូវចេះគ្រប់គ្រង ដឹកនាំស្វែងរកមូលនិធិ សម្រាប់ទ្រទ្រង់សកម្មភាព អនុសាខា និងជួយទៅដល់ជនងាយរងគ្រោះ ដោយប្រការផ្សេងៗ បានទាន់ពេលវេលា និងចំគោលដៅ ប្រកបដោយប្រសិទ្ធភាពខ្ពស់៕

ដោយ ឆាយ ម៉ុត