AKP បាត់ដំបង ថ្ងៃទី១០ ខែសីហា ឆ្នាំ២០២៦--ឯកឧត្តម សុខ លូ ប្រធានគណៈកម្មាធិ ការសាខាកាកបាទក្រហមកម្ពុជា ខេត្តបាត់ដំបង នៅថ្ងៃទី៩ ខែសីហា ឆ្នាំ២០២៦ បានចុះសួរសុខទុក្ខ និងនាំយកអំណោយមនុស្សធម៌របស់សប្បុរសជន ផ្តល់ជូនប្រជាពលរដ្ឋងាយរងគ្រោះបំផុតរួមមាន៖ ចាស់ជរាគ្មានទីពឹង ជនមានពិការភាព ស្ត្រីមេម៉ាយមានកូនច្រើន  ស្ត្រីមានផ្ទៃពោះ មានកូនតូច អ្នកជំងឺរ៉ាំរ៉ៃ អ្នកផ្ទុកមេរោគអេដស៍ និងគ្រួសារមានជីវភាពទ័លក្រសរុបចំនួន ៣០០គ្រួសារមកពី ៣ភូមិ ក្នុងសង្កាត់ស្លាកែត ក្រុងបាត់ដំបង។

ថ្លែងនាឱកាសនោះ ឯកឧត្តម សុខ លូ បានពាំនាំនូវប្រសាសន៍ផ្តាំផ្ញើសួរសុ ខទុក្ខ ក្តីនឹករលឹក និងក្តីអាណិតអាសូរដ៏ជ្រាលជ្រៅបំផុតពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែខ្វល់ខ្វាយ និងគិតគូរជាប់ជានិច្ចពីសុខទុក្ខរបស់បងប្អូនប្រជាពលរដ្ឋគ្រប់ពេលវេលា និងគ្រប់ទីកន្លែង។

បើទោះបីជាសម្តេចមិនបានអញ្ជើញមកដោយផ្ទាល់យ៉ាងណាក្តី ក៏សម្តេចតែងតែចាត់ទុកទុក្ខលំបាករបស់ប្រជាពលរដ្ឋ គឺជាទុក្ខលំបាករបស់សម្តេចផងដែរ។ ប្រជាពលរដ្ឋសូមថែរក្សាសុខភាពឱ្យបានល្អ តាមរយៈការពិសាទឹកស្អាតដាំឆ្អិន ហូបបន្លែ ផ្លែឈើ និងសាច់ក្នុងស្រុក។ 

បន្ថែមពីនេះ គួរដាំដំណាំបន្លែបង្ការជុំវិញបរិវេណផ្ទះដើម្បីបង្កើនប្រាក់ចំណូល កាត់បន្ថយការចំណាយ និងទទួលបានបន្លែធម្មជាតិសុវត្ថិភាពសម្រាប់សុខភាព។

ឯកឧត្តម ប្រធានគណៈកម្មាធិការសាខា ក៏បានក្រើនរំលឹកឱ្យប្រុងប្រយ័ត្នចំពោះជំងឺគ្រុនឈាម ដោយគូសបញ្ជាក់ថា ការប្រយុទ្ធនឹងជំងឺគ្រុនឈាមមិនមែនជាកាតព្វកិច្ចរបស់វិស័យសុខាភិបាលតែម្នាក់ឯងនោះទេ ប៉ុន្តែជាការទទួ លខុសត្រូវរួមរបស់អាជ្ញាធរមូលដ្ឋាន សហគមន៍ គ្រួសារ និងប្រជាពលរដ្ឋគ្រប់រូប ដើម្បីការពារកុមារ និងសហគមន៍ទាំងមូល។ ប្រជាពលរដ្ឋឱ្យចូលរួមជាមួយអាជ្ញាធរមូលដ្ឋាន ដើម្បីលុបបំបាត់គ្រឿងញៀន គ្រឿងស្រវឹង និងក្មេងទំនើងក្នុងភូមិ ព្រមទាំងយកចិត្តទុកដាក់លើសុវត្ថិភាពចរាចរណ៍ពេលធ្វើដំណើរ។ ពិសេសជាងនេះទៅទៀត សូមអាណាព្យាបាលទាំងអស់បញ្ជូនកូនៗទៅសាលារៀនឱ្យបានគ្រប់ៗគ្នា និងខិតខំរៀនសូត្រឱ្យបានខ្ពង់ខ្ពស់ ដើម្បីមានចំណេះដឹង និងមុខរបរច្បាស់លាស់ សម្រាប់ជួយលើកស្ទួយជីវភាពគ្រួសារទៅថ្ងៃអនាគត។

ប្រជាពលរដ្ឋងាយរងគ្រោះទាំងអស់ បានសម្តែងនូវក្តីរំភើបរីករាយជាខ្លាំង និងបានគោរពថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាប្រធានដឹកនាំមនុស្សធម៌ តែងតែគិតគូរពីសុខទុក្ខរបស់ប្រជាពលរដ្ឋគ្រប់រូប ដោយមិនប្រកាន់ពូជសាសន៍ ពណ៌សម្បុរ ឬនិន្នាការនយោបាយឡើយ ៕

ដោយ ណយ នឿន ,ប្រភព៖រដ្ឋបាលខេត្តបាត់ដំបង