AKP សៀមរាប ថ្ងៃទី២៥ ខែមីនា ឆ្នាំ២០២៥-- មូលនិធិជាតិជំនួយសង្គមសហការជាមួយរដ្ឋបាលខេត្តសៀមរាប នៅថ្ងៃទី២៥ ខែមីនា ឆ្នាំ២០២៥  បានរៀបចំវគ្គរំលឹកស្តីពីការអនុវត្តបរិយាបន្នកម្មវិធីជាតិជំនួយសង្គមក្នុងកញ្ចប់គ្រួសារសម្រាប់មន្ត្រីកម្មវិធីឃុំសង្កាត់ ក្នុងខេត្តសៀមរាប។

លោកស្រី ភា សុសាន្ត ប្រធានសាខាមូលនិធិជាតិជំនួយសង្គមខេត្តសៀមរាប បានឱ្យដឹងថា គិតត្រឹមថ្ងៃទី១៥ ខែមីនា ឆ្នាំ២០២៥នេះ គ្រួសារពលរដ្ឋមានបណ្ណសមធម៌បានចុះឈ្មោះចូលកម្មវិធីជាតិជំនួយសង្គមក្នុងកញ្ចប់គ្រួសារសរុបចំនួន ៦០ ៥៩៣គ្រួសារ និងមានសមាជិកគ្រួសារដែលមានភាពងាយរងគ្រោះ និងកំពុងទទួលផលពីកម្មវិធីសរុបចំនួន ៨០ ៤៦៦នាក់។ ជាមួយគ្នានេះ សាខាបាននឹងកំពុងប្រចាំការសម្របសម្រួល ដោះស្រាយ ពិសេសឆ្លើយតបទៅនឹងបញ្ហាផ្សេងក្នុងដែនសមត្ថកិច្ច សំដៅធានាបាននូវដំណើរការជាប្រក្រតីនៃកម្មវិធី។

លោក យឺន ហុងឆាត់ ប្រធាននាយកដ្ឋានគ្រប់គ្រងសេវា និងរបបឧបត្ថម្ភតាវកាលិក បង្ហាញថា ដើម្បីឱ្យសម្រេចបាននូវឆន្ទៈនយោបាយរបស់រាជរដ្ឋាភិបាល ទាមទារឱ្យគ្រប់ភាគីពាក់ព័ន្ធ ត្រូវអនុវត្តតួនាទីភារកិច្ចរបស់ខ្លួនប្រកបដោយការទទួលខុសត្រូវខ្ពស់ ដើម្បីធានាបាននូវប្រក្រតីភាព ប្រសិទ្ធផល ប្រសិទ្ធភាព និងភាពគ្រប់ជ្រុងជ្រោយនៃកម្មវិធី។ ហើយចំពោះរៀបចំវគ្គរំលឹកនេះឡើង គឺដើម្បីបង្កើនការយល់ដឹងពីដំណើរការអនុវត្តកម្មវិធីដល់មន្រ្តីពាក់ព័ន្ធនៅថ្នាក់ក្រោមជាតិ និងដើម្បីពង្រឹងការអនុវត្ត និងការគាំទ្រកម្មវិធីនៅថ្នាក់មូលដ្ឋាន។

លោក ឌី រ៉ាដូ អភិបាលរងខេត្ត មានប្រសាសន៍ថា កម្មវិធីជាតិជំនួយសង្គម ជាកម្មវិធីអាទិភាពមួយដែលរដ្ឋបាលខេត្ត បាននឹងកំពុងគាំទ្រ ជំរុញជាប់ជាប្រចាំដល់មន្ទីរអង្គភាព អាជ្ញាធរមូលដ្ឋាន ដើម្បីបង្កលក្ខណៈងាយស្រួលក្នុងការអនុវត្តកម្មវិធីនេះឱ្យមានកិច្ចដំណើរការល្អ។ ទន្ទឹមនោះ រដ្ឋបាលខេត្តបានធ្វើការពិនិត្យ តាមដាន និងសម្របសម្រួលដោះស្រាយបញ្ហានានា សំដៅផ្តល់អត្ថប្រយោជន៍ដល់ក្រុមគោលដៅដែលជាគ្រួសារក្រីក្រ និងងាយរងគ្រោះ ឱ្យទទួលបានការឧបត្ថម្ភគ្រប់ៗគ្រួសារ។ 

លោកអភិបាលរងខេត្ត បានជំរុញឱ្យសាខាមូលនិធិជាតិជំនួយសង្គម រដ្ឋបាលក្រុងស្រុក និងឃុំសង្កាត់ សូមអនុវត្តតួនាទីភារកិច្ចរបស់ខ្លួនឱ្យបានល្អ សំដៅធានាបាននូវប្រក្រតីភាព ប្រសិទ្ធភាព តម្លាភាព និងគណនេយ្យភាពនៃកម្មវិធី ព្រមទាំងធ្វើរាយការណ៍វឌ្ឍនភាពជាប្រចាំ ដោយប្រើប្រាស់យន្តការរាយការណ៍កន្លងមក ហើយប្រសិនបើមានភាពរាំងស្ទះត្រង់ណា លោកឱ្យស្នើសុំគោលការណ៍មករដ្ឋបាលខេត្ត ដើម្បីជួយសម្របសម្រួលបន្ថែម។ មន្ទីរអង្គភាពពាក់ព័ន្ធ សូមបន្តសហការគ្នាឱ្យបានសកម្ម ដើម្បីគាំទ្រដល់ដំណើរការកម្មវិធីនេះ៕

ដោយ ឃុត សៅ