AKP បន្ទាយមានជ័យ ថ្ងៃទី២៥ ខែមីនា ឆ្នាំ២០២៥ -- ឯកឧត្តម ផាន់ ចាន់ធុល រដ្ឋលេខាធិការ ក្រសួងមហាផ្ទៃ នៅថ្ងៃអង្គារ ទី២៥ ខែមីនា ឆ្នាំ២០២៥ បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព” ប្រចាំត្រីមាសទី១ ឆ្នាំ២០២៥ នៅសាល(ក)សាលាខេត្តបន្ទាយមានជ័យ ដោយមានការចូលរួមពី ឯកឧត្តម ប្លែក វ៉ារី ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលនៃគណៈអភិបាលខេត្ត កងកម្លាំងប្រដាប់អាវុធ និងមន្ទីរនានាជុំវិញខេត្ត។

ក្នុងឱកាសនោះ ឯកឧត្តម ផាន់ ចាន់ធុល បានកោតសរសើរចំពោះកិច្ចខិតខំប្រឹងប្រែងរបស់អាជ្ញាធរខេត្ត កងកម្លាំងប្រដាប់អាវុធ និងមន្ទីរពាក់ព័ន្ធទាំងអស់ ដែលបានសហការគ្នាអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព” ប្រកបដោយប្រសិទ្ធភាព និងបានលើកឡើងថា គោលនយោបាយនេះមានសារៈសំខាន់ក្នុងការលើកកម្ពស់សន្តិសុខ សុវត្ថិភាព និងសណ្តាប់ធ្នាប់សាធារណៈនៅតាមមូលដ្ឋាន ជាពិសេសការទប់ស្កាត់ និងបង្ក្រាបបទល្មើសផ្សេងៗ ការដោះស្រាយវិវាទក្រៅប្រព័ន្ធតុលាការ និងការផ្តល់សេវាសាធារណៈជូនប្រជាពលរដ្ឋ។

ជាមួយគ្នានោះដែរ ឯកឧត្តមរដ្ឋលេខាធិការបានសង្កត់ធ្ងន់លើចំណុចសំខាន់ៗមួយចំនួន ដើម្បីពង្រឹងការអនុវត្តគោលនយោបាយនេះ ដោយជំរុញដល់អាជ្ញាធរសមត្ថកិច្ចពាក់ព័ន្ធត្រូវបន្តពង្រឹងកិច្ចសហប្រតិបត្តិការរវាងអាជ្ញាធរ កងកម្លាំងប្រដាប់អាវុធ និងប្រជាពលរដ្ឋ បង្កើនការផ្សព្វផ្សាយ និងអប់រំអំពីគោលនយោបាយនេះ ដល់ប្រជាពលរដ្ឋឱ្យបានទូលំទូលាយ ត្រូវលើកកម្ពស់សមត្ថភាពមន្ត្រីអនុវត្តច្បាប់ និងអាជ្ញាធរមូលដ្ឋានដោយ ការប្រើប្រាស់បច្ចេកវិទ្យាព័ត៌មានក្នុងការគ្រប់គ្រងសន្តិសុខ និងសណ្តាប់ធ្នាប់សាធារណៈ ដោះស្រាយបញ្ហាប្រឈមនានាដែលកើតមាននៅតាមមូលដ្ឋាន។

ទន្ទឹមនឹងនោះ ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានគូសបញ្ជាក់ពីការប្តេជ្ញាចិត្តរបស់អាជ្ញាធរខេត្តក្នុងការអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព” ឱ្យទទួលបានលទ្ធផលល្អប្រសើរ និងបានលើកឡើងពីលទ្ធផលសំខាន់ៗដែលខេត្តសម្រេចបានក្នុងត្រីមាសទី១ ឆ្នាំ២០២៥ ដូចជាការកាត់បន្ថយបទល្មើសផ្សេងៗ ការដោះស្រាយវិវាទក្រៅប្រព័ន្ធតុលាការបានមួយចំនួនធំ ការផ្តល់សេវាសាធារណៈជូនប្រជាពលរដ្ឋបានកាន់តែប្រសើរឡើង ព្រមទាំងបានអំពាវនាវដល់ប្រជាពលរដ្ឋទាំងអស់ ចូលរួមសហការជាមួយអាជ្ញាធរ និងកងកម្លាំងប្រដាប់អាវុធ ដើម្បីរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈនៅតាមមូលដ្ឋានឱ្យកាន់តែល្អប្រសើរថែមទៀត៕

ដោយ ឈុន សារ៉ាត