AKP ភ្នំពេញ ថ្ងៃទី២៥ ខែមីនា ឆ្នាំ២០២៥--រដ្ឋសភានៃព្រះរាជាណាចក្រកម្ពុជាបានរៀបចំវេទិកាផ្សព្វផ្សាយ ស្តីពី វឌ្ឍនភាពនៃវិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តាមរយៈការអនុវត្តយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា។

គណៈកម្មការ សាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃរដ្ឋសភា និងព្រឹទ្ធសភា សហការជាមួយក្រសួងឧស្សហកម្ម វិទ្យាសាស្ត្រ បច្ចេកវិទ្យា នវានុវត្តន៍ នឹងរៀបចំវេទិកាផ្សព្វផ្សាយ ស្តីពី វឌ្ឍនភាពនៃវិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តាមរយៈការអនុវត្តយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ដែលនឹងប្រព្រឹត្តនៅព្រឹក ថ្ងៃទី២៥ ខែមីនា ឆ្នាំ២០២៥ នៅវិមានរដ្ឋសភា។

សម្តេចមហារដ្ឋសភាធិការធិបតី យួន សុដារី ប្រធានរដ្ឋសភានៃព្រះរាជាណាចក្រកម្ពុជាអញ្ជើញជាអធិបតីភាពដ៏ខ្ពង់ខ្ពស់បើកអង្គសិក្ខាសាលា ជាមួយនឹងវត្តមានចូលរួមពីសមាជិក សមាជិកា រដ្ឋសភា ព្រឹទ្ធសភា ក្រសួងឧស្សហកម្ម វិទ្យាសាស្ត្រ បច្ចេកវិទ្យា នវានុវត្តន៍ តំណាងក្រសួង ស្ថាប័នពាក់ព័ន្ធ សភាពាណិជ្ជកម្ម វិស័យឯកជន វិទ្យាស្ថានសិក្សាស្រាវជ្រាវ សមាគម អង្គការជាតិ និងអន្តរជាតិ ព្រមទាំងថ្នាក់ ដឹកនាំ និងមន្ត្រីរាជការនៃអគ្គលេខាធិការដ្ឋានសភាទាំងពីរ ព្រមទាំងដៃគូពាក់ព័ន្ធមួយចំនួនទៀត។

អង្គវេទិកានេះ មានកម្មវិធីសំខាន់ៗដូចជា៖

- សុន្ទរកថាស្វាគមន៍របស់ លោកជំទាវ និន សាវុន ប្រធានគណៈកម្មការទី៩ នៃរដ្ឋសភា។

សុន្ទរកថាគន្លឹះរបស់ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សហកម្ម វិទ្យាសាស្ត្រ បច្ចេក វិទ្យា និងនវានុវត្តន៍។

បទបង្ហាញអំពី៖ អាណត្តិកិច្ច សមិទ្ធផល និងទស្សនវិស័យយុទ្ធសាស្ត្រក្រសួងឧស្សហកម្ម វិទ្យា-សាស្ត្រ បច្ចេកវិទ្យា និងនវានុវត្តន៍ តាមវិស័យ ដូចជា ឧស្សាហកម្មប្រតិគមន៍, ស្អាត, ហេដ្ឋារចនាសម្ព័ន្ធ គុណភាពជាតិ និង ការងារជំរុញវិទ្យាសាស្ត្រ បច្ចេកវិទ្យា និងនវានុវត្តន៍ ជាដើម។

យោបល់ជំនាញ ដោយ ឯកឧត្តមសាស្ត្រាចារ្យបណ្ឌិត ឆែម គាតរិទ្ធី ទេសរដ្ឋមន្ត្រី និងជាប្រធាន ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ និងឯកឧត្តម ប៉ាន សូរស័ក្តិ លេខាធិការគណៈកម្មការ ទី៩ នៃរដ្ឋសភា។

- របាយការណ៍បូកសរុបរបស់ ឯកឧត្តម អ៊ុំ សារឹទ្ធ ប្រធានគណៈកម្មការទី៩នៃព្រឹទ្ធសភា។

បន្ទាប់មក ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា តំណាងដ៏ខ្ពង់ខ្ពស់ សម្តេចអគ្គ មហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា នឹងអញ្ជើញថ្លែងសុន្ទរកថា បិទអង្គវេទិកា នៅវេលារសៀល ថ្ងៃដដែល៕

ដោយ៖ ប៊ុនរិទ្ធ,រូបថត៖ ហ៊ុន យុទ្ធគុណ