AKP កំពង់ឆ្នាំង ថ្ងៃទី២២ ខែមីនា ឆ្នាំ២០២៥-- 

ឯកឧត្តម បណ្ឌិត ម៉ុង ឫទ្ធី ប្រធានក្រុមសមាជិកព្រឹទ្ធសភា បានអញ្ជើញសួរសុខទុក្ខ និងទស្សនកិច្ចមជ្ឈមណ្ឌលអភិវឌ្ឍន៍កុលាលភាជន៍ ភូមិអណ្តូងប្ញស្សី ឃុំស្រែថ្មី ស្រុករលាប្អៀរ ខេត្តកំពង់ឆ្នាំង កាលពីថ្ងៃទី២១ ខែមីនា ឆ្នាំ២០២៥ ដោយមានការអញ្ជើញចូលរួមពីឯកឧត្តម ស៊ីវ រុន ប្រធានក្រុមប្រឹក្សាខេត្តកំពង់ឆ្នាំង ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង លោក សេង វិចិត្រ អភិបាលស្រុករលាប្អៀរ លោក លោកស្រី ម្ចាស់អាជីវកម្ម ផលិតកម្ម សិប្បកម្ម និងសេវាកម្មនៅតាមបណ្តាក្រុង-ស្រុកជាច្រើននាក់ផងដែរ។

ក្នុងឱកាសនោះ ឯកឧត្តម បណ្ឌិត ម៉ុង ឫទ្ធី បានមានប្រសាសន៍ថា ការចងក្រងសមាជិកចលនាភូមិមួយផលិតផលមួយមានសារៈប្រយោជន៍សំខាន់ដល់ការអនុវត្តគោលនយោបាយជាតិជំរុញចលនាភូមិមួយផលិតផលមួយ ព្រោះវានឹងផ្ដល់លទ្ធភាពឱ្យយើងអាចប្រមូលផ្តុំផលិតករ ប្រមូលចងក្រងនូវព័ត៌មាន និងបញ្ហានានា ដើម្បីរៀបចំផែនការ ដាក់ចេញ សកម្មភាពអន្តរាគមន៍មានប្រសិទ្ធភាពជំរុញឱ្យអ្នកពាក់ព័ន្ធក្នុងការអនុវត្តធ្វើការណែនាំពន្យល់ដល់ប្រជាពលរដ្ឋឱ្យយល់ច្បាស់អំពីប្រយោជន៍សំខាន់ៗក្នុងការងារជំរុញចលនាភូមិមួយផលិតផលមួយ។

ទន្ទឹមនឹងនេះ ឯកឧត្តមបានបន្តថា សិប្បកម្មផលិតកម្មវត្ថុធាតុដើម ផលិតផលកែច្នៃ និងផលិតកម្មសេវាកម្ម ដោយអនុវត្តវិធីសាស្ត្រអង្កេត សម្ភាសន៍ និងមានកិច្ចប្រជុំវាយតម្លៃដាក់ពិន្ទុយ៉ាងត្រឹមត្រូវ ផ្នែកផលិតកម្ម និងផ្នែកសេវាកម្ម ដើម្បីលើកសំណើទៅគណៈកម្មាធិការជាតិ ស្នើសុំចុះបញ្ជីចូលជាសមាជិកភូមិមួយផលិតផលមួយនៅខេត្តកំពង់ឆ្នាំង។ ជាលទ្ធផល ខេត្តសម្រេចបានការគាំទ្រចុះបញ្ជីផលិតផលខ្មែរដែលទទួលស្គាល់ជាផលិតផលភូមិមួយផលិតផលមួយរបស់ខេត្តពីគណៈកម្មាធិការជាតិក្នុងនោះ៖ វិស័យឧស្សាហកម្ម វិស័យសេវាកម្ម ដែលនឹងធ្វើពិធីប្រគល់វិញ្ញាបនបត្រទទួលស្គាល់ផលិតផលភូមិមួយ ផលិតផលមួយ ដល់ម្ចាស់មូលដ្ឋាននាពេលខាងមុខ។

ជាមួយគ្នានេះដែរ ឯកឧត្តមបានកោតសរសើរ ចលនាភូមិមួយ ផលិតផលមួយរបស់ខេត្តកំពង់ឆ្នាំង ដែលបានចងក្រងសមាជិកចលនាភូមិមួយផលិតផលមួយមានសារៈប្រយោជន៍សំខាន់ដល់ការអនុវត្តគោលនយោបាយជាតិជំរុញចលនាភូមិមួយ ផលិតផលមួយ ព្រោះវានឹងផ្ដល់លទ្ធភាពឱ្យយើងអាចប្រមូលផ្តុំផលិតករ ប្រមូលចងក្រងនូវព័ត៌មាន និងបញ្ហានានា ដើម្បីរៀបចំផែនការ និងដាក់ចេញ សកម្មភាពអន្តរាគមន៍មានប្រសិទ្ធភាព។

ឯកឧត្តមបានបញ្ជាក់ទៀតថា ប្រសិនបើមូលដ្ឋានយើងមានការគិតគូរ ផ្លាស់ប្តូរឥរិយាបថ មានឆន្ទៈមោះមុត អនុវត្តឱ្យបានតាមគោលការណ៍គ្រឹះសំខាន់ៗទាំងនោះ មូលដ្ឋានយើងនឹងទទួលបានផលប្រយោជន៍ជាច្រើន ដូចជា បានបង្កើនការងារនៅក្នុងសហគមន៍ ហើយធ្វើឱ្យមានការកាត់បន្ថយភាពគ្មានការងារធ្វើ និងការធ្វើចំណាកស្រុក ការបង្កើនបរិមាណផលិតផលក្នុងស្រុក ហើយគុណភាពត្រូវបានលើកកម្ពស់ ទទួលបាននូវការជឿទុកចិត្ត និងបង្កើនសេដ្ឋកិច្ចគ្រួសារឱ្យកាន់តែប្រសើរឡើង៕

ដោយ បៃ ស៊ីថុន