AKP ភ្នំពេញ ថ្ងៃទី២១ ខែមីនា ឆ្នាំ២០២៥-- 

លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា កាលពីថ្ងៃទី២០ ខែមីនា ឆ្នាំ២០២៥ បានទទួលជួបពិភាក្សាការងារជាមួយ ឯកឧត្តម Masato Kanda ប្រធានធនាគារអភិវឌ្ឍន៍អាស៊ី (ADB) ដែលទើបត្រូវបានតែងតាំងថ្មី ក្នុងដំណើរទស្សនកិច្ចរបស់ឯកឧត្តមមកកាន់កម្ពុជា។  

ក្នុងជំនួបនោះ លោកជំទាវទេសាភិបាលបានមានប្រសាសន៍ពីតួនាទីដ៏សំខាន់របស់ADB ក្នុងការចូលរួមចំណែកគាំទ្រដល់ការអភិវឌ្ឍសេដ្ឋកិច្ចកម្ពុជាតាំងពីទសវត្សរ៍ឆ្នាំ១៩៩០ រហូតមក តាមរយៈការផ្តល់នូវជំនួយបច្ចេកទេស និងហិរញ្ញប្បទានទៅដល់គម្រោងអភិវឌ្ឍន៍ជាច្រើន។ មិនត្រឹមតែប៉ុណ្ណោះ ADB ក៏បានរួមចំណែកយ៉ាងសំខាន់ក្នុងការអភិវឌ្ឍប្រព័ន្ធធនាគារ តាមរយៈការជួយរៀបចំបទប្បញ្ញត្តិសម្រាប់អភិវឌ្ឍវិស័យមីក្រូហិរញ្ញវត្ថុ ដែលធ្វើឱ្យកម្ពុជាក្លាយជាប្រទេសដំបូងបង្អស់លើពិភពលោកដែលមានបទប្បញ្ញត្តិលើវិស័យនេះ។

លើសពីនេះ លោកជំទាវក៏បានវាយតម្លៃខ្ពស់ចំពោះការរួមចំណែករបស់ADB ក្នុងការរៀបចំយុទ្ធសាស្រ្តអភិវឌ្ឍន៍វិស័យហិរញ្ញវត្ថុកម្ពុជាចាប់តាំងពីដើមទសវត្សរ៍ឆ្នាំ២០០០ រហូតមកទល់បច្ចុប្បន្នផងដែរ និងបានលើកឡើងពីសក្តានុពលវិស័យកសិកម្មកម្ពុជា ព្រមទាំងបានរំលេចពីការរួមចំណែកយ៉ាងសកម្មរបស់ADB ក្នុងការអភិវឌ្ឍវិស័យនេះនាពេលកន្លងមក ព្រមទាំងបានស្នើឱ្យមានការបន្តចូលរួមគាំទ្របន្ថែមទៀតទៅដល់វិស័យចម្បងសម្រាប់សេដ្ឋកិច្ចកម្ពុជាមួយនេះ។

ក្នុងឱកាសនោះ ឯកឧត្តមប្រធានបានថ្លែងអំណរគុណលោកជំទាវដែលបានឆ្លៀតឱកាសដ៏មមាញឹក ជួបពិភាក្សាការងារជាមួយឯកឧត្តម និងគណៈប្រតិភូ ហើយបានថ្លែងកោតសសើរធនាគារជាតិនៃកម្ពុជា ចំពោះវឌ្ឍនភាពនៃប្រព័ន្ធធនាគារ និងប្រព័ន្ធទូទាត់សងប្រាក់នៅកម្ពុជា ដែលបានជួយគាំទ្រការរីកចម្រើននៃសេដ្ឋកិច្ច ការធ្វើពាណិជ្ជកម្ម និងជំរុញបរិយាបន្នហិរញ្ញវត្ថុ។ ជាពិសេស ប្រព័ន្ធបាគង បានក្លាយជាគំរូជោគជ័យមួយសម្រាប់ធ្វើការសិក្សាដកយកបទពិសោធន៍ ចំពោះប្រទេសកំពុងអភិវឌ្ឍមួយចំនួនផងដែរ។ លើសពីនេះ ឯកឧត្តមក៏បានលើកឡើងថា ADB នឹងបន្តចូលរួមចំណែកយ៉ាងសកម្មក្នុងការគាំទ្រការអភិវឌ្ឍវិស័យហិរញ្ញវត្ថុ និងសេដ្ឋកិច្ច។

បន្ទាប់ពីជំនួបពិភាក្សានេះ លោកជំទាវទេសាភិបាលក៏បានអញ្ជើញ ឯកឧត្តម Masato Kanda ធ្វើទស្សនកិច្ចសារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ស.ស.រ) ដើម្បីស្វែងយល់ពីដំណើរវិវត្តន៍នៃសេដ្ឋកិច្ច និងប្រវត្តិសាស្រ្តរបស់កម្ពុជា។ ក្នុងពេលទស្សនកិច្ចនេះដែរ ឯកឧត្តមបានថ្លែងការកោតសសើរពីការរៀបចំសារមន្ទីរ ស.ស.រ. បានយ៉ាងល្អប្រសើរ ដែលបានផ្តល់ព័ត៌មានគ្រប់ជ្រុងជ្រោយ និងងាយយល់ នាំឱ្យអ្នកទស្សនាបានជ្រាបពីវឌ្ឍនភាពរបស់កម្ពុជា៕

ដោយ ៖ ពេជ្រ សំអឿន (ប្រភព៖ ធនាគារជាតិនៃកម្ពុជា)