AKP ភ្នំពេញ ថ្ងៃទី១៤ ខែមីនា ឆ្នាំ២០២៥ -- ឯកឧត្តម នេត្រ ភក្រ្ដា រដ្ឋមន្រ្ដីក្រសួងព័ត៌មានបានជំរុញលើកទឹកចិត្តបន្ថែមដល់អង្គភាពព័ត៌មាន ខេមបូ ថាមស៍ និងអ្នកប្រកបអាជីពក្នុងវិស័យព័ត៌មានទាំងអស់ឱ្យបន្តផ្តោតការយកចិត្តទុកដាក់ខ្ពស់ក្នុងការគោរពក្រមសីលធម៌វិជ្ជាជីវៈសារព័ត៌មាន ឱ្យបានខ្ជាប់ខ្ជួន ដើម្បីការពារខ្លួន និងធានាការអនុវត្តតួនាទីដោយស្របច្បាប់ រួមចំណែកលើកកម្ពស់តម្លៃវិជ្ជាជីវៈ និងសណ្ដាប់ធ្នាប់សារព័ត៌មានកម្ពុជា។ ការលើកឡើងរបស់ឯកឧត្ដមរដ្ឋមន្ត្រីក្រសួងព័ត៌មានបែបនេះ ក្នុងឱកាសទទួលជួបពិភាក្សាការងារជាមួយ ឧកញ៉ា នូ សូលីដា តំណាងអង្គភាពសារព័ត៌មាន ខេមបូ ថាមស៍ Cambo Times នាព្រឹកថ្ងៃទី១៤ ខែមីនា ឆ្នាំ២០២៥ នៅទីស្តីការក្រសួងព័ត៌មាន។

ឯកឧត្តម នេត្រ ភក្ត្រា មានប្រសាសន៍ថា ការប្រកបការងារប្រចាំថ្ងៃរបស់អ្នកសារព័ត៌មាន គឺចាំបាច់ណាស់ត្រូវតែធ្វើការពង្រឹងសមត្ថភាពខ្លួនឯង និងដុសខាត់ជំនាញក្នុងការសរសេរព័ត៌មានឱ្យបានល្អ ផលិត និងផ្សព្វផ្សាយ ដោយត្រូវធ្វើទំនើបកម្មការងារឱ្យស្របទៅនឹងភាពរីកចម្រើននៃសង្គមឌីជីថល និងការវិវត្តនៃបច្ចេកវិទ្យា ដើម្បីជំរុញភាពប្រកួតប្រជែង និងទំនុកចិត្តរបស់ប្រជាពលរដ្ឋមកលើអ្នកសារព័ត៌មាន គុណភាពព័ត៌មាន និងការផ្សាយដែលមានប្រភពច្បាស់លាស់ ពិតប្រាកដ ប្រកបដោយសុវត្ថិភាព។ ឯកឧត្ដមរដ្ឋមន្រ្ដីបានគូសបញ្ជាក់ថា អ្នកសារព័ត៌មានភាពចាំបាច់ត្រូវយល់ឱ្យបានច្បាស់ពីព្រំដែន នៃការអនុវត្តការងារប្រកបទៅដោយវិជ្ជាជីវៈ ប្រកាន់ខ្ជាប់ការប្រើប្រាស់សិទ្ធិ និងតួនាទីជាអ្នកសារព័ត៌មានឱ្យបានត្រឹមត្រូវចៀសវាងកុំឱ្យការប្រើសិទ្ធិ និងសេរីភាពហួសពីដែនដែលច្បាប់បានកំណត់។

ឯកឧត្ដម នេត្រ ភក្រ្ដា បានបញ្ជាក់ទៀតថា ការពង្រឹងសមត្ថភាព និងក្រមសីលធម៌វិជ្ជាជីវៈអ្នកសារព័ត៌មានជារឿងដ៏ចាំបាច់ដើម្បីធានាការផលិត និងផ្សព្វផ្សាយព័ត៌មានពិត មានគុណភាព និងមានសុវត្ថិភាពជូនពលរដ្ឋ ហើយក៏បានរួមចំណែកធានាលំហព័ត៌មានសម្បូរបែប ប្រកបដោយគុណភាព និងសុវត្ថិភាព ព្រមទាំងចូលរួមបន្តលើកកម្ពស់សេរីភាពខាងសារព័ត៌មាននៅកម្ពុជាឱ្យកាន់តែប្រសើរឡើងថែមទៀត។ ឯកឧត្ដមរដ្ឋមន្រ្ដីបានបន្ដថា និន្នាការបច្ចុប្បន្ននេះ អ្នកសារព័ត៌មានទាំងក្នុងប្រព័ន្ធផ្សព្វផ្សាយប្រពៃណី និងទំនើបបានចូលរួមយ៉ាងសកម្មក្នុងការផ្សព្វផ្សាយព័ត៌មានពិត និងមានសុក្រឹតត្រឹមត្រូវ ដើម្បីប្រឆាំងព័ត៌មានក្លែងក្លាយ និងរួមចំណែកដល់ការលើកកម្ពស់វិបុលភាព និងសុខដុមនីយកម្មសង្គម។  ឯកឧត្តម នេត្រ ភក្ត្រា បានជម្រាបជូនដែរថា ក្រសួងព័ត៌មានបានធ្វើបច្ចុប្បន្នភាពស្ថិតិនៃប្រព័ន្ធផ្សព្វផ្សាយនៅកម្ពុជា ដែលមានអង្គភាពសារព័ត៌មានទាំងអស់ជាង ២ ០០០ អង្គភាព ទាំងប្រព័ន្ធផ្សព្វផ្សាយប្រពៃណី និងប្រព័ន្ធផ្សព្វផ្សាយទំនើប ក្នុងនោះ ស្ថិតិនៃប្រព័ន្ធផ្សព្វផ្សាយអនឡាញមានចំនួនប្រមាណ ១ ០០០ អង្គភាពដែលកំពុងដំណើរការជាប្រចាំក្នុងការផ្សព្វផ្សាយព័ត៌មានបានដោយសេរី និងឯករាជ្យភាព។ ឯកឧត្ដមរដ្ឋមន្រ្ដីបានបន្ថែមថា សន្តិសុខព័ត៌មានត្រូវបានពង្រឹងក្នុងអាណត្តិទី៧ នៃក្រសួងព័ត៌មាន ហើយសណ្តាប់ធ្នាប់ក្នុងផ្នែកសារព័ត៌មានត្រូវបានវាយតម្លៃថាមានភាព ល្អប្រសើរ រាប់ចាប់តាំងពីថ្ងៃទី២៤ ខែសីហា ឆ្នាំ២០២៣មក ក្រសួងព័ត៌មានបានចាប់ផ្តើមអនុវត្តន៍បេសកកម្មដោយផ្តោតលើសន្តិសុខព័ត៌មាន ពោលគឺបានជំរុញសុក្រឹត្យភាព និងប្រសិទ្ធភាពការងារដើម្បីធានាសិទ្ធិទទួលព័ត៌មានរបស់ប្រជាពលរដ្ឋប្រកបដោយគុណភាព និងសុវត្ថិភាព។

ក្នុងឱកាសនោះ ឯកឧត្ដមរដ្ឋមន្រ្ដីក្រសួងព័ត៌មានបញ្ជាក់ផងដែរថា ក្រោមដំបូលនៃសុខសន្តិភាព ប្រជាពលរដ្ឋកម្ពុជា មានសិទ្ធិសេរីភាពគ្រប់បែបយ៉ាង ដើម្បីបញ្ចេញមតិ និងទទួលបានព័ត៌មានគ្រប់បែបយ៉ាង ហើយការផលិតមាតិកាព័ត៌មាន ដែលមានគុណភាព   ផ្តល់ចំណេះដឹង គឺជាចំណុចសំខាន់សម្រាប់ទាញចំណាប់អារម្មណ៍របស់ប្រជាពលរដ្ឋ។

ជាមួយគ្នានេះ ឧកញ៉ា នូ សូលីដា បានអរគុណចំពោះ ឯកឧត្តម នេត្រ ភក្ត្រា រដ្ឋមន្រ្ដីក្រសួងព័ត៌មានដែលបាន   ផ្តល់អនុសាសន៍ល្អដល់ក្រុមការងារអង្គភាពសារព័ត៌មាន ខេមបូ ថាមន៍ Cambo Times យកទៅអនុវត្តន៍ការងារឱ្យកាន់មានប្រសិទ្ធភាព ប្រកបដោយក្រមសីលធម៌ និងវិជ្ជាជីវៈត្រឹមត្រូវ។ ឧកញ៉ា នូ សូលីដា បាននាំយកនូវស្បៀងអាហារ និងភេសជ្ជៈ រួមមាន ភេសជ្ជៈកូរ៉េ ៥០កេស ទឹកសុទ្ធ ២០០ កេស និងអង្ករ ២០០ បាវ ក្នុង១បាវតូច ១០គីឡូក្រាម ជូនដល់ ឯកឧត្តម នេត្រ ភក្ត្រា ដើម្បីចូលរួមក្នុងសកម្មភាពការងារសង្គមចុះជួយមូលដ្ឋានខេត្តក្រចេះ៕

ដោយ៖ រិទ្ធី រូបថត៖ ខឹម សុវណ្ណារ៉ា