AKP ភ្នំពេញ ថ្ងៃទី១២ ខែមីនា ឆ្នាំ២០២៥ -- ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំស្តីពី ការរៀបចំផែនការតាមដានសមិទ្ធកម្មប្រចាំឆ្នាំ២០២៥ របស់ក្រសួងអភិវឌ្ឍន៍ជនបទ នាព្រឹកថ្ងៃពុធ ទី១២ ខែមីនា ឆ្នាំ២០២៥ នៅទីស្ដីការក្រសួង ដោយមានការអញ្ជើញចូលរួមពីឯកឧត្តមរដ្ឋលេខាធិការប្រចាំការ ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក អគ្គាធិការ ព្រមទាំងថ្នាក់ដឹកនាំ និងមន្ដ្រីរាជការជំនាញជាច្រើនរូបទៀត។

ជាកិច្ចចាប់ផ្ដើម លោក ផេង សំបូរ ប្រធាននាយកដ្ឋានផែនការ និងទំនាក់ទំនងសាធារណៈ បានធ្វើបទបង្ហាញ អំពីផែការតាមដានសមិទ្ធកម្មប្រចាំឆ្នាំ២០២៥ របស់ក្រសួងអភិវឌ្ឍន៍ជនបទ ដោយមានកម្មវិធីចំនួន ៥ រួមមាន៖ ទី១. ការអភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទប្រកបដោយភាពធន់ ទី២.ការលើកកម្ពស់ការទទួលបានទឹកស្អាត និងអនាម័យជនបទ ទី៣. ការជំរុញអភិវឌ្ឍន៍សហគមន៍ជនបទ និងចលនាភូមិគំរូ ទី៤.ការលើកកម្ពស់ការធ្វើពិពិធកម្មសេដ្ឋកិច្ចជនបទ និងទី៥. ការគ្រប់គ្រងស្ថាប័ន និងសេវាគាំទ្រទូទៅ ក្នុងនោះ មានអនុកម្មវិធីចំនួន ៣១ និងចង្កោមសកម្មភាពចំនួន ២៣៤ ដោយមានថវិកាសម្រាប់អនុវត្តចំនួន ៣៧៤ ៩១១ លានរៀល មានកំណើន ៣,៩០% ធៀបនឹងថវិកាឆ្នាំ២០២៤។

បន្ទាប់ពីបទបង្ហាញ ឯកឧត្ដមរដ្ឋមន្ត្រីបានផ្ដល់ឱកាសជូនអង្គប្រជុំ ដើម្បីផ្ដល់មតិយោបល់ ដែលជាធាតុចូល សម្រាប់ការរៀបចំផែនការសមិទ្ធកម្មមានលក្ខណៈគ្រប់ជ្រុងជ្រោយ មានភាពច្បាស់លាស់ ស្របតាមច្បាប់ថវិកា និងអនុលោមតាមសារាចរណែនាំ ព្រមទាំងឱ្យមានសង្គតិភាពជាមួយនឹងកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ។

ជាមួយគ្នានោះដែរ ឯកឧត្តមរដ្ឋមន្ត្រីបានណែនាំដល់នាយកដ្ឋានជំនាញ និងអង្គភាពនានានៃក្រសួងអភិវឌ្ឍន៍ជនបទ រៀបចំប្រតិទិនការងារឱ្យបានច្បាស់លាស់ទៅតាមប្រភេទការងារ ដើម្បីតាមដាន ត្រួតពិនិត្យ និងវាយតម្លៃ លើប្រសិទ្ធភាព សមិទ្ធផលសម្រេចបាន និងល្បឿននៃការអនុវត្ត ឱ្យឈានទៅសម្រេចគោលដៅសូចនាករសមិទ្ធនៅបំណាច់ឆ្នាំដោយជោគជ័យ៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)