AKP ភ្នំពេញ ថ្ងៃទី១០ ខែមីនា ឆ្នាំ២០២៥--

ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា និងជាអគ្គលេខាធិការ គណៈកម្មការធិការជាតិអូឡាំពិកកម្ពុជា (NOCC) បានលើកឡើងថា មុនការពេលបង្កើតទីភ្នាក់ងារកម្ពុជាប្រឆាំងដូប៉ា (Cambodia Anti-Doping Agency-CADA) គឺរាល់ការរៀបចំអត្តពលិកកម្ពុជាចេញទៅប្រកួតលក្ខណៈអន្តរជាតិមានការលំបាកច្រើន។

នៅក្នុងឱកាសចែករំលែក ក្នុងវគ្គបណ្តុះបណ្តាលស្តីពីការប្រឆាំងសារធាតុ ដូប៉ា ក្នុងវិស័យកីឡា ដល់គ្រូបង្វឹកជម្រើសជាតិ និងមន្ត្រីសហព័ន្ធកីឡាជាតិ នៅព្រឹកថ្ងៃទី១០ ខែមីនា ឆ្នាំ២០២៥ នៅមជ្ឈមណ្ឌលជាតិហ្វឹកហ្វឺនកីឡា រាជធានីភ្នំពេញ ឯកឧត្តមអគ្គលេខាធិការ NOCC បានសង្កត់ធ្ងន់ថា មុនពេលបង្កើត CADA គឺNOCC មានបញ្ហាច្រើន ក្នុងកិច្ចសហការរៀបចំកីឡាករ កីឡាការិនីចេញទៅប្រកួតនៅក្រៅប្រទេស ហើយបញ្ហាជាច្រើនកន្លងទៅនោះបានបញ្ចប់ ក្រោយពេលដែលយើងបានបង្កើត CADA នេះឡើង។

ឯកឧត្តមអគ្គលេខាធិការ NOCC គូសបញ្ជាក់ថា ៖«ករណីដំបូងរបស់កម្ពុជា គឺនៅក្នុងព្រឹត្តិការណ៍កីឡាអាស៊ី កាលពីឆ្នាំ២០១៤ នៅសាធារណរដ្ឋកូរ៉េ គឺគេបានរកឃើញថា កីឡាការិនីសូហ្វតិន្នីសកម្ពុជាបានជាប់ក្នុងករណីដូប៉ានេះ។ ពេលនោះ យើងមានការលំបាកណាស់ ដោយយើងមិនមានអ្នកជំនាញ ក្នុងការតាមដាន ត្រួតពិនិត្យ ឬការតវ៉ាជាមួយអ្នកត្រួតពិនិត្យរបស់ក្រុមប្រឹក្សាកីឡាអូឡាំពិកអាស៊ី។ ពេលនោះ យើងក៏លំបាកឆ្លើយចំពោះអ្នកសារព័ត៌មាន ដែលបានចោទសួរមកយើង នៅពេលគេប្រកាសថា កីឡាការិនីម្នាក់របស់កម្ពុជាជាប់ពាក់ព័ន្ធក្នុងករណីនេះ។ កីឡាការិនីយើងបានប្រាប់ថា គាត់ប្រើថ្នាំបញ្ចុះទម្ងន់ ដូច្នេះថ្នាំបញ្ចុះទម្ងន់នេះហើយ ដែលជាប់ពាក់ព័ន្ធនឹងករណីដូពីងនេះខ្លាំង ដោយនេះជាករណីដំបូងគេរបស់កម្ពុជា ក្នុងការចូលរួមប្រកួតអន្តរជាតិ។

ប៉ុន្តែនៅក្នុងករណីដំបូងគេ ក្នុងចលនាអូឡាំពិក គឺតាំងពីឆ្នាំ១៩០៤មកម្ល៉េះ ក្នុងព្រឹត្តិការណ៍កីឡាអូឡាំពិក នៅសហរដ្ឋអាមេរិក ដែលអន្តរជាតិបានរកឃើញករណីប្រើប្រាស់ ដូប៉ា ដំបូងគេ។ យើងដឹងថា ភាពជឿនលឿននៃវិទ្យាសាស្ត្រ និងការផលិតថាមពលខុសពីសមត្ថភាពរបស់មនុស្សនេះ គឺចេញពីប្រទេសជឿនលឿន។ គេបានរកឃើញការផលិតសារធាតុបង្កើតថាមពលលក្ខណៈវិទ្យាសាស្ត្រនេះច្រើន ដែលពេលខ្លះទីភ្នាក់ងារប្រឆាំងដូពីងពិភពលោក (WADA) ក៏តាមអត់ទាន់ដែរ ដូច្នេះទើបបង្កើតឱ្យមាននូវកំហុសនេះ។

ឯកឧត្តម វ៉ាត់ ចំរើន លើកឡើងទៀតថា កំហុសលើករណីនេះដ៏ធំជាងគេ ក្នុងពិភពលោក គឺប្រទេសរុស្ស៊ី ដែលផលិតសារធាតុលាយទឹកម្យ៉ាងឱ្យអត្តពលិកផឹកជាផ្លូវការ ដែលគណៈកម្មាធិការអូឡាំពិកអន្តរជាតិមិនអនុញ្ញាតឱ្យប្រទេសរុស្ស៊ីចូលរួមប្រកួតកីឡាអូឡាំពិកនោះទេ ពោលគឺជាប់បម្រាម ៣អូឡាំពិកហ្គេម មកហើយចាប់តាំងពីឆ្នាំ២០១៦ នៅទីក្រុងរីយ៉ូ ប្រទេសប្រេស៊ីល, ឆ្នាំ២០២០ នៅតូក្យូ  ប្រទេសជប៉ុន និងឆ្នាំ២០២៤ នៅទីក្រុងប៉ារីស ប្រទេសបារំាង ខណៈអត្តពលិករុស្ស៊ីមួយចំនួនតូចបានបដិសេដមិនប្រើប្រាស់សារធាតុនោះទេ ហើយទទួលបានការអនុញ្ញាតឱ្យចូលរួមប្រកួតកីឡាអូឡាំពិក រដូវក្តៅ ក្នុងនាមជាអត្តពលិកឯករាជ្យមិនមានប្រទេស (មិនចំណុះឱ្យអត្តពលិករុស្ស៊ីទេ) ដោយកាន់ទង់អូឡាំពិកអន្តរជាតិ។

ដូច្នេះហើយ ឯកឧត្តម វ៉ាត់ ចំរើន បានស្នើសុំយ៉ាងទទូចដល់គ្រូបង្វឹកទាំងអស់បញ្ជ្រាបការផ្សព្វផ្សាយដល់កីឡាករ កីឡាការិនីកម្ពុជាទាំងអស់ឱ្យយល់ដឹងឱ្យបានស៊ីជម្រៅ ហើយចាប់ពីឆ្នាំ២០២៥នេះតទៅ ស្របពេលដែល CADA បានកើតឡើងហើយ ដែលយើងទាំងអស់គ្នាត្រូវតែមានកាតព្វកិច្ច ក្នុងអនុវត្ត និងប្រឆាំងការប្រើប្រាស់សារធាតុ ដូប៉ា នេះ កុំឱ្យកើតឡើង។ ដោយឡែក នៅក្នុងស៊ីហ្គេម លើកទី៣៣ ឆ្នាំ២០២៣កន្លងទៅ ដែលកម្ពុជាទទួលរៀបចំធ្វើម្ចាស់ផ្ទះ ជាប្រវត្តិសាស្ត្រលើកដំបូងនោះ ក៏យើងបានរកឃើញ៤ករណីដែរ ជុំវិញករណីប្រើប្រាស់សារធាតុ ដូប៉ានេះ ប៉ុន្តែ៤ករណីនេះ មិនមានកម្ពុជាយើងទេ។ ភាពល្អរបស់កម្ពុជានេះ គឺយើងត្រូវថែរក្សាកេរ្តិ៍ឈ្មោះរបស់កម្ពុជា ក្នុងស៊ីហ្គេម លើកទី៣៣ នាខែធ្នូ ឆ្នាំ២០២៥ នៅប្រទេសថៃ។ យើងទាំងអស់គ្នា ត្រូវរួបរួមគ្នាជំរុញឱ្យអត្តពលិកកម្ពុជាមានភាពស្អាតស្អំ ដោយកុំឱ្យជាប់ពាក់ព័ន្ធនឹងការប្រើប្រាស់សារធាតុដូប៉ានេះជាដាច់ខាត៕ 

ដោយ ហេង ណាលីន