AKP ភ្នំពេញ ថ្ងៃទី៨ ខែមីនា ឆ្នាំ២០២៥ -- នៅព្រឹក ថ្ងៃ ទី៨ ខែមិនាឆ្នាំ២០២៥ នេះ  ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាមនិង ប្រធានគណ:កម្មាធិការសាខា  អមដំណើរដោយ លោកជំទាវ ប៉ាង ដានី អនុប្រធានអចិន្ត្រៃយ៍សាខា រួមជាមួយ លោកប្រធានកិត្តិយស លោកស្រី ប្រធានអនុសាខាក្រុង ក្រុមកាកបាទក្រហមកម្ពុជាសង្កាត់ និងអ្នកស្ម័គ្រចិត្តភូមិ បានអញ្ជើញចុះសួរសុខទុក្ខ និង នាំយកអំណោយមនុស្សធម៌ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា  ផ្តល់ជូនដល់គ្រួសាររងគ្រោះដោយអគ្គីភ័យចំនួន១៧គ្រូសារ រស់នៅភូមិទី៨ សង្កាត់កំពង់ចាម ក្រុងកំពង់ចាម ខេត្តកំពង់ចាម ដែលរងគ្រោះដោយអគ្គីភ័យដោយឆ្លង ឆ្លងចរន្តអគ្គិសនី ធ្វើ ឲ្យ ផ្ទះអាជីវកម្ម លក់ម៉ូតូ លក់កង់ លក់អាគុយ និង ប្រកបអា ជីវកម្មផ្សេងទៀតចំនួន១៧ ល្វែងជាប់ៗគ្នា ត្រូវភ្លើងឆេះទាំងស្រុង នាម៉ោងជិត១២ អាធ្រាត្រ  ថ្ងៃទី ៧ ខែមិនា ឆ្នាំ ២០២៥ កន្លងទៅ ។

ក្នុងឱកាសចុះជួបសួសុខទក្ខ ឯកឧត្តម អ៊ុន ចាន់ដា ប្រធានគណ:កម្មាធិការសាខា បានសម្តែងការសោកស្តាយជាពន់ពេក ជាមួយគ្រួសារជនរងគ្រោះ  ចំពោះ ឧបត្តិហេតុដែលកើតឡើងស្មានមិនដល់នេះ នាំអោយខូចខាតទាំងលំនៅដ្ឋាន តូបអាជីវកម្ម  បាត់បង់ទាំងសម្ភារ: កង់ ម៉ូតូ រាប់សិបគ្រឿង ក៏ត្រូវឆេះអស់គ្មានសល់ ។

ឯកឧត្តមប្រធានគណ:កម្មាធិការសាខា ក៏បាននាំយកនូវ បណ្តាំផ្ញើសួរសុខទុក្ខពីសំណក់ ឯកឧត្តមសន្តិបណ្ឌិត នេត សាវឿន ប្រធានកិត្តិយសសាខា  ជាពិសេស ពីសំណាក់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្ដេច លោកតែងតែយកចិត្តទុកដាក់គិតគូរ អំពីសុខទុក្ខរបស់ប្រជាពលរដ្ឋដែលរងគ្រោះ និងងាយរងគ្រោះបំផុត នៅគ្រប់ទីកន្លែង ដោយមិនប្រកាន់និន្នាការនយោបាយ ពូជសាសន៍ ឬ សាសនា អ្វីឡើយ ហើយ ទោះបីជា សម្តេចប្រធាន មិនបានអញ្ជើញមកដោយផ្ទាល់  ក៏ សម្តេច លោក តែងបានចាត់តំណាង ចុះអន្តរាគមន៍ នាំយកអំណោយមនុស្សធម៌ ជួយសម្រាលទុក្ខលំបាកជនរងគ្រោះ ទាន់ពេលវេលា តាមទិសស្លោក " កាកបាទក្រហមកម្ពុជាមាននៅគ្រប់ទីកន្លែង សម្រាប់គ្រប់គ្នា និងមិនទុកនរណាម្នាក់ចោល ឡើយ"និងត្រូវ យកចិត្តទុកដាក់ថែទាំសុខភាពល្អ។

អំណោយមនុស្សធម៌ ដែលបានផ្ដល់ជូនអាជីវកររងគ្រោះទាំង  ១៧គ្រួសារ ក្នុង ១គ្រួសារ ទទួលបាន ៖   អង្ករ ៥០គក្រ ទឹកត្រី ២យួរ ទឹកស៊ីអ៊ីវ ២យួរ ,មី២កេស ,តង់ធំ២ ,ឃីត ២ ( មុង ភួយ សារុង ក្រម៉ា )  , អាវយឺត ១០, សម្ភារៈដំណេក សម្ភារ ផ្ទះបាយ   និង ថវិកាចំនួន ១,០០០,០០០រៀល ។

ដោយឡែក ឯកឧត្តមសន្តិបណ្ឌិត នេត សាវឿន ប្រធានក្រុមការងាររាជរដ្ឋាភិបាលចុះជួយខេត្តកំពង់ចាម បានជួយឧបត្ថម្ភអាជីវកររងគ្រោះទាំង ១៧គ្រួសារ ក្នុង ១គ្រួសារ ជូនថវិកាបន្ថែមចំនួន ១,០០០,០០០រៀល ផងដែរ៕

ដោយ ៖ឆាយ ម៉ុត