AKPភ្នំពេញថ្ងៃទី៧ ខែមីនា ឆ្នាំ២០២៥ -- ឯកឧត្ដម ឡាំ ជា រដ្ឋមន្រ្ដីទទួលបន្ទុករដ្ឋលេខាធិការដ្ឋានកិច្ចការព្រំដែន បានអញ្ជើញជាអធិបតី ក្នុងពិធីអបអរសាទរខួបលើកទី១១៤ ទិវាអន្តរជាតិនារី ៨មីនា ឆ្នាំ២០២៥ ក្រោមប្រធានបទ «សិទ្ធិ សមភាព និងភាពអង់អាច ចំពោះស្រ្ដីនិងក្មេងស្រីគ្រប់រូប» ។

កម្មវិធីកាលពីថ្ងៃ ទី៧ ខែមីនា ឆ្នាំ២០២៥ នៅសាលប្រជុំធំ នៃទីស្ដីការរដ្ឋលេខាធិការដ្ឋានកិច្ចការព្រំដែនមានការអញ្ជើញចូលរួមពីសំណាក់ថ្នាក់ដឹកនាំ ឯកឧត្ដម រដ្ឋលេខាធិការប្រចាំ រដ្ឋលេខាធិការ អនុរដ្ឋលេខាធិការ និងលោក លោកស្រី នាយិការងខុទ្ទកាល័យ អគ្គនាយករង ប្រធាននាយកដ្ឋាន សមាជិកខុទ្ទកាល័យ មន្រ្ដីរាជការ និងជំនួយការនៃរដ្ឋលេខាធិការដ្ឋានកិច្ចការព្រំដែន។

ឯកឧត្ដម រដ្ឋមន្ត្រី បានមានមតិសំណេះសំណាលស្វាគមន៍យ៉ាងកក់ក្តៅចំពោះវត្តមាន ឯកឧត្តម លោកជំទាវ លោក លោកស្រីទាំងអស់ និងសូមចូលរួមអបអរសាទរខួបលើកទី១១៤ ទិវាអន្តរជាតិនារី ៨មីនា ឆ្នាំ២០២៥ និងគាំទ្រយ៉ាងពេញទំហឹងលើប្រធានបទដ៏មានសារៈសំខាន់ស្ដីពី «សិទ្ធិ សមភាព និងភាពអង់អាច ចំពោះស្រ្ដីនិងក្មេងស្រីគ្រប់រូប»។

នៅក្នុងអង្គពិធីទាំងមូល ឯកឧត្ដម រដ្ឋមន្រ្ដី បានមានប្រសាសន៍យ៉ាងច្បាស់ថា ប្រធានបទក្នុងឆ្នាំនេះ ពិតជាបានឆ្លុះបញ្ចាំងយ៉ាងច្បាស់ពីភាពចាំបាច់ក្នុងការផ្ដល់សិទ្ធអំណាចជូនចំពោះស្រ្តី និងក្មេងស្រីគ្រប់រូប ប្រកបដោយសមភាពឱ្យស័ក្ដិសមទៅនឹងកិត្តិយស សេចក្ដីថ្លៃថ្នូរ របស់នារីគ្រប់រូបស្របតាមបរិបទរបស់កម្ពុជាដែលប្រកាន់ខ្ជាប់នូវរបបមាតាធិបតេយ្យ ក្នុងការដឹកនាំរដ្ឋបាលថ្នាក់ជាតិ និងថ្នាក់ក្រោមជាតិ។ បន្ថែមពីលើនេះ ថ្នាក់ដឹកនាំ និងមន្រ្តីរាជការជាស្រ្តីគ្រប់រូបបាននិងកំពុងចូលរួមចំណែកយ៉ាងសកម្មជាមួយរាជរដ្ឋាភិបាលកម្ពុជា ដើម្បីជំរុញការសម្រេចឱ្យបាននូវគោលនយោបាយជាតិនានា ជាពិសេសយុទ្ធសាស្រ្តបញ្ចកោណដំណាក់កាលទី១។

ឯកឧត្ដម រដ្ឋមន្រ្ដីក៏ បានគូសបញ្ជាក់ពី ភាពរីកចម្រើនជាបន្ដបន្ទាប់របស់ស្រ្ដីកម្ពុជានាពេលបច្ចុប្បន្ន គឺកើតចេញពីម្លប់នៃសុខសន្ដិភាព តាមរយៈការដាក់ចេញនូវ «គោលនយោបាយ ឈ្នះ ឈ្នះ» របស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្ដី និងបច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា ស្របតាមទិសស្លោកប្រកបដោយគតិបណ្ឌិតដ៏ខ្ពង់ខ្ពស់បំផុត ពោលគឺ «ស្រ្ដីជាឆ្អឹងខ្នងនៃសង្គម និងសេដ្ឋកិច្ចជាតិ» និង «ជួយស្រ្ដីគឺជួយខ្លួនឯង»។ ទន្ទឹមនឹងនេះ រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំដ៏ប៉ិនប្រសព្វនិងប្រកបដោយគតិបណ្ឌិតខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានបន្ដកំណត់យកទិសដៅជាអាទិភាពនៃការលើកកម្ពស់សមភាពយេនឌ័រនិងការបង្កើតភាពអង់អាចរបស់ស្រ្ដីនិងក្មេងស្រីនៅគ្រប់វិស័យជាអាទិភាពនៃគោលនយោបាយនិងយុទ្ធសាស្រ្ដបញ្ចកោណ ដំណាក់កាលទី១ តាមរយៈការពង្រឹងភាពជាពលរដ្ឋក្នុងសង្គម ប្រកបដោយសីលធម៌ សមធម៌ និងបរិយាបន្ន ស្របតាមទិសស្លោក «ពិភពលោកនឹងកាន់តែសុវត្ថិភាព ស្រស់បំពង្រ កក់ក្ដៅជាងមុន ប្រសិនបើមានស្រី្ដក្លាយជាអ្នកដឹកនាំកាន់តែច្រើន»។
ជាទីបញ្ចប់ ឯកឧត្ដម រដ្ឋមន្រ្ដី បានថ្លែងអំណរគុណជាមួយនឹងការអបអរសាទរខួបលើកទី១១៤ នៃទិវាអន្ដរជាតិ ៨មីនា នាពេលនេះ និងសូមប្រសិទ្ធពរជ័យជូនដល់ ឯកឧត្តម លោកជំទាវ លោក លោកស្រីទាំងអស់ សូមជួបប្រទះតែនឹងពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

ដោយ៖ ពេជ្រ សំអឿន,ប្រភព៖ រដ្ឋលេខាធិការដ្ឋានកិច្ចការព្រំដែន