AKP ភ្នំពេញ ថ្ងៃទី៨ ខែមីនា ឆ្នាំ២០២៥ -- ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ ដឹកនាំមន្ត្រីចុះពិនិត្យកសិដ្ឋានដាំដុះបន្លែ ផ្លែឈើ ហ័រ ណុង ហួយ អេកូឡូជី ខល ឯ.ក ស្ថិតនៅភូមិចាំស្រី ឃុំកំពង់សីលា ស្រុកកំពង់សីលា ខេត្តព្រះសីហនុ រសៀលថ្ងៃសុក្រទី៧ ខែមីនា ឆ្នាំ២០២៥ ។

កសិដ្ឋានដាំបន្លែ ហ័រ ណុង ហួយ អេកូឡូជី ខល ឯ.ក មានផ្ទៃដីជាង ៣ហិកតា ធ្វើការដាំដុះបន្លែ ផ្លែឈើមានដូចជា ផ្លែទំពាំងបាយជូរ ម្ទេស ប៉េងប៉ោះស៊ប៊រី ខាត់ណាស្រួយ ផ្ទី កាឆាយ ដើមជន្លង់ ត្រសក់ និងស្រះចិញ្ចឹមត្រី និងដំណាំរួមផ្សំមួយចំនួនទៀត ហើយមជ្ឍ មណ្ឌលកសិដ្ឋាននេះ បានរៀបចំចាប់ផ្តើមកាលពីខែមករា ឆ្នាំ២០២៤ ដោយផ្តោតសំខាន់ការដាំដុះបន្លែ និងផ្លែឈើធម្មជាតិគ្នានជាតិគីមី នេះជាការចាប់ផ្តើមសាកល្បងដាំដុះតែប៉ុណ្ណោះ ព្រោះនៅតំបន់នេះវាមានអំណោយផលល្អ ក្នុងការដាំដុះបន្លែ ផ្លែឈើធម្មជាតិដែលគ្នានសារធាតុគីមី ចំពោះដីវិញ យើងធ្វើដោយខ្លួនឯង គឺមានធាតុផ្សំដូចជា អាចម៌ គោ អាចម៌មាន់ អាចម៌ទា ដី និងអង្កាមយកមកលាយផ្អាប់ជាការស្រេច ។ ដោយឡែកចំពោះម្ទេស យើងអាចប្រមូលផលជាបណ្តើៗក្នុងមួយថ្ងៃចំនួន ២០០គីឡូក្រាម ហើយនៅខែមេសាខាងមុខ យើងអាចប្រមូលផលមានការកើនឡើងជិត ១ ០០០គីឡូក្រាម ហើយនេះជាការចាប់ផ្តើមសាកល្បងតែប៉ុណ្ណោះ យើងនឹងបន្តពង្រីកកសិដ្ឋានរបស់យើងបន្ថែមទៀតនៅពេលខាងមុខ ។

ឯកឧត្តម ម៉ាង ស៊ីណេត អភិបាលខេត្តព្រះសីហនុ បានថ្លែងអំណរគុណកសិដ្ឋានដាំបន្លែ ផ្លែឈើធម្មជាតិ ហ័រ ណុង ហួយ អេកូឡូជី ខល ឯ.ក ដែលបានជឿជាក់លើរាជរដ្ឋាភិ បាលកម្ពុជា ក្នុងការបោះទុនវិនិយោគលើដំណាំបន្លែផ្លែឈើធម្មជាតិនៅក្នុងស្រុកកំពង់សិលានាពេលនេះ ហើយកសិដ្ឋានជួយបង្កើនការងារជូនបងប្អូនប្រជាពលរដ្ឋអ្នកស្រុកកំពង់សិលា និងធ្វើការនាំចូលបន្លែផ្លែឈើទាំងអស់នេះចូលទីផ្សារក្នុងខេត្តព្រះសីហនុ និងបន្តធ្វើការចែកចាយទៅកាន់បណ្តាទីផ្សារនៅក្នុងរាជធានី ខេត្ត ក្នុងព្រះរាជាណាចក្រកម្ពុជា ជាពិសេសបានចូលរួមកាត់បន្ថយការនាំចូលបន្លែ ផ្លែឈើពីប្រទេសជិតខាង ដែលមានផលប៉ះពាល់ដល់សុខុមាលភាពអ្នកបរិភោគ។

ក្នុងឪកាសនោះឯកឧត្តម អភិបាលខេត្ត ក៏បានធ្វើការគាំទ្រដល់កសិដ្ឋានពង្រីកអាជីវកម្មរបស់ខ្លួនបន្ថែមទៀត ដើម្បីកំណើនការងារជូនប្រជាពលរដ្ឋខេត្តព្រះសីហនុ ហើយរដ្ឋបាលខេត្ត និងរង់ចាំជួយសម្របសម្រួលបញ្ហាប្រឈមនានានៅក្នុងកសិដ្ឋានគ្រប់ពេលវេលា និងសូមជូនពរឱ្យកសិដ្ឋានដំណើរការដាំដុះបន្លែផ្លែឈើធម្មជាតិប្រកបដោយផ្លែផ្កាល្អ និងទទួលបានផលល្អបន្ថែមទៀតនៅពេលខាងមុខ ៕ 

ដោយ៖ ងូ សុមុនី