AKP ភ្នំពេញ ថ្ងៃទី០៧ ខែមីនា ឆ្នាំ២០២៥– នៅព្រឹកថ្ងៃទី៧ ខែមីនា ឆ្នាំ២០២៥ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន បានស្ងើចសរសើរអំពីសមិទ្ធផលសម្រេចបានរបស់ អ.វ.ត.ក. ក្នុងការស្វែងរកយុត្តិធម៌ដល់ជនរងគ្រោះ និងការផ្សះផ្សាជាតិ ក្រោយជម្លោះ និងការរួមចំណែកដល់ការថែរក្សាសន្ដិភាពយូរអង្វែង។ ការលើកឡើងរបស់ឯកឧត្តមបែបនេះក្នុងឱកាសអញ្ជើញដឹកនាំគណៈប្រតិភូ បំពេញទស្សនកិច្ចនៅមជ្ឈមណ្ឌលធនធាន អ.វ.ត.ក. ដើម្បីស្វែងយល់អំពីដំណើរការអនុវត្តមុខងារសេសសល់ និងសមិទ្ធផលសម្រេចបានរបស់ អ.វ.ត.ក. ក្នុងការស្វែងរកយុត្តិធម៌ដល់ជនរងគ្រោះ និងការផ្សះផ្សាជាតិ ក្រោយជម្លោះ និងការរួមចំណែកដល់ការថែរក្សាសន្ដិភាពយូរអង្វែង នាថ្ងៃទី០៧ ខែមីនា ឆ្នាំ២០២៥។

ឯកឧត្តម ក្រាញ់ តូនី រដ្ឋលេខាធិការទីស្ដីការគណៈរដ្ឋមន្ដ្រី  និងជាប្រធានរដ្ឋបាលស្ដីទី ព្រមទាំងថ្នាក់ដឹកនាំជាន់ខ្ពស់ អ.វ.ត.ក. បានទទួលស្វាមគមន៍យ៉ាងកក់ក្ដៅចំពោះការអញ្ជើញមកដល់របស់ឯកឧត្តមបណ្ឌិត កៅ គឹមហួន អគ្គលេ ខា ធិការអាស៊ាន និងគណៈប្រតិភូលេខាធិការដ្ឋានអាស៊ាននេះ។  ជាមួយគ្នានេះផងដែរ ប្រតិភូទាំងពីរក៏បានពិ ភាក្សាអំពីកិច្ចខិតខំប្រឹងប្រែងថ្នាក់ជាតិ និងថ្នាក់តំបន់ក្នុងកិច្ចការផ្សព្វផ្សាយព័ត៌មាន និងការចែករំលែកបទពិ សោធន៍របស់កម្ពុជាក្នុងការរួមចំណែកដល់ដំណើរការកសាងសន្ដិភាព ការផ្សះផ្សា និងការអភិវឌ្ឍន៍ប្រទេសក្រោយ ជម្លោះដែលកើត មានឡើងនៅក្នុងតំបន់អាស៊ាន។

ក្នុងឱកាសនោះ ឯកឧត្តម ក្រាញ់ តូនី បានមានប្រសាសន៍ថា៖ “ការធ្វើដំណើររបស់កម្ពុជាសម្រាប់យុត្តិធម៌អន្ដរកាល គឺជាមេរៀនដ៏សំខាន់សម្រាប់ប្រទេសនានាក្នុងតំបន់។ ជាការពិតណាស់ បទពិសោធន៍របស់យើងក្នុងការស្វែងរកយុត្តិធម៌ដល់ជនរងគ្រោះ និងដោះស្រាយបញ្ហាក្រោយជម្លោះកន្លងមក មិនត្រឹមតែរួមចំណែកក្នុងការផ្សះផ្សាតាមមូលដ្ឋានរបស់យើងប៉ុណ្ណោះទេ ប៉ុន្ដែថែមទាំងដើរតួនាទីយ៉ាងសំខាន់ក្នុងការជំរុញអាស៊ានឱ្យកាន់តែមានភាពរឹងមាំ និងស្អិតរមួតបន្ថែមទៀតនាពេលអនាគត។” បន្ទាប់ពីកិច្ចពិភាក្សា គណៈប្រតិភូអាស៊ាន ក៏បានអញ្ជើញទស្សនាសាលពហុបំណង បណ្ណាល័យ និងបណ្ណសារដ្ឋាន ដែល អ.វ.ត.ក. បានប្រើប្រាស់សម្រាប់រៀបចំទុកដាក់ និងផ្សព្វផ្សាយកេរដំណែលរបស់ អ.វ.ត.ក. ដល់សាធារណជន ផងដែរល។ជាមួយគ្នានេះ ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន បានស្ងើចសរសើរចំពោះសមិទ្ធផលរបស់អ.វ.ត.ក. ដែលកំ ពុង សម្រេចបាន។ ឯកឧត្តមបណ្ឌិតបានថ្លែងថា ដំណើរការកាត់សេចក្តីរបស់ អ.វ.ត.ក. បានបន្សល់ទុកនូវកេរ   ដំណែល ដ៏សំខាន់ និងមានគុណតម្លៃខ្ពស់ក្នុងការថែរក្សាសន្តិភាព ការបង្រួបបង្រួមជាតិ និងយុត្តិធម៌ទាំងក្នុងកម្រិតជាតិ និងអន្តរជាតិ។

ឯកឧត្តមបណ្ឌិត កៅ គឹម ហួន បានថ្លែងបញ្ជាក់ថា៖ “វាពិតជាមានកិត្ដិយសណាស់សម្រាប់ខ្ញុំមកកាន់មជ្ឈមណ្ឌលធនធានអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ក្នុងទីក្រុងភ្នំពេញ នៅថ្ងៃនេះ។ អ.វ.ត.ក. ឈរជាសក្ខីភាពនៃយុត្តិធម៌ គណនេយ្យភាព និងការស្វែងរកការពិត និងការផ្សះផ្សាជាតិ ដែលទាំងអស់នេះគឺជាគោលការណ៍ទាំងអស់ ឆ្លើយតបនឹងការប្តេជ្ញាចិត្តរបស់អាស៊ានចំពោះសន្តិភាព សិទ្ធិមនុស្ស និងវិធាននៃច្បាប់។ សូម ឱ្យកេរដំណែលនេះ បន្តបំផុសគំនិតមនុស្សជំនាន់ ក្រោយ ក្នុងការជំរុញការផ្សះផ្សា និងយុត្តិធម៌ នៅទូទាំងតំបន់ អាស៊ានរបស់យើង។”

ក្នុងដំណើរទស្សនកិច្ចនៅមជ្ឈមណ្ឌលធនធាននេះផងដែរ ឯកឧត្តមបណ្ឌិត ក៏បានជួបប្រជុំជាមួយលោក Jo Scheuer អ្នកសម្របសម្រួលអង្គការសហប្រជាជាតិប្រចាំនៅកម្ពុជា និងបានផ្លាស់ប្តូរបទពិសោធន៍នៃការងារទាក់ទងនឹងយុត្តិធម៌អន្តរកាលរបស់កម្ពុជា។

អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ត្រូវបានបង្កើតឡើងក្រោមកិច្ចព្រមព្រៀងរវាងរាជរដ្ឋាភិបាលកម្ពុជា និងអង្គការសហប្រជាជាតិ។ ដោយមានការគាំទ្រពីសហគមន៍អន្តរជាតិ អ.វ.ត.ក. បានស៊ើបអង្កេតឧក្រិដ្ឋកម្មនានាដែលបានកើតឡើងចន្លោះថ្ងៃទី១៧ ខែមេសា ឆ្នាំ១៩៧៥ និង ថ្ងៃទី០៦ ខែមករា ឆ្នាំ១៩៧៩ និងបានជួយប្រជាជនកម្ពុជាស្វែងរកយុត្តិធម៌ ការផ្សះផ្សាជាតិ និងសន្តិភាព។ ការជំនុំជម្រះក្ដីបានប្រព្រឹត្តទៅពីឆ្នាំ២០០៦ ដល់ឆ្នាំ២០២២។

សូមជម្រាបជូនថា ចាប់ពីខែមករា ឆ្នាំ២០២៣ អ.វ.ត.ក. បានចាប់ផ្តើមអនុវត្តលើមុខងារសេសសល់សម្រាប់រយៈពេលបីឆ្នាំដំបូង ស្របតាមកិច្ចព្រមព្រៀងបន្ថែមរវាងរាជរដ្ឋាភិបាលកម្ពុជានិងអង្គការសហប្រជាជាតិ។ ផ្នែកសំខាន់មួយនៃមុខងារសេសសល់ទាំងនេះ គឺការរៀបចំថែទាំ រក្សាទុកនិងគ្រប់គ្រងបណ្ណសាររបស់ខ្លួនរួមទាំងការធ្វើចំណាត់ថ្នាក់ឯកសារឡើងវិញនៃឯកសារសំណុំរឿងទាំងអស់ និងការផ្សព្វផ្សាយព័ត៌មានដល់សាធារណជនពាក់ព័ន្ធនឹងអង្គជំនុំជម្រះវិសាមញ្ញ៕

ដោយ៖ រិទ្ធី ប្រភព៖ អ.វ.ត.ក.