AKP សៀមរាប ថ្ងៃទី០៦ ខែមីនា ឆ្នាំ២០២៥-- លោកឧត្ដមសេនីយ៍ទោ ហួត សុធី ស្នងការនៃស្នងការដ្ឋាននគរបាលខេត្ដសៀមរាប នាព្រឹកថ្ងៃទី០៦ ខែមីនា ឆ្នាំ២០២៥ បានដឹកនាំកិច្ចប្រជុំការដកបទពិសោធន៍ការងាររឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក និងទិសដៅអនុវត្តបន្តនៃស្នងការដ្ឋាននគរបាលខេត្តសៀមរាប ដោយមានការអញ្ជើញចូលរួមពីលោកស្នងការរង លោកនាយ-នាយរងការិយាល័យ ចំណុះឱ្យផែនការងារនគរបាលសណ្តាប់ធ្នាប់ និងលោកអធិការ-អធិការរងនគរបាលក្រុង-ស្រុកទាំង១៣ ដែលពាក់ព័ន្ធផងដែរ។

លោកឧត្តមសេនីយ៍ទោស្នងការ បានលើកឡើងថា ដើម្បីសម្រេចបានជោគជ័យស្របតាមទិសដៅរបស់រាជរដ្ឋាភិបាល និងក្រសួងមហាផ្ទៃ ការងារនេះទាមទារឱ្យមានការចូលរួមពីគ្រប់អង្គភាពពាក់ព័ន្ធចូលរួមបំពេញភារកិច្ចប្រកបដោយវិជ្ជាជីវៈ ប្រើប្រាស់ជំនាញ និងការប្រើប្រាស់ពាក្យសំដីប្រកបដោយវិជ្ជាជីវៈ ក្រមសីលធម៌ មានការអត់ធ្មត់ឱ្យបានខ្ពស់រាល់ពេលចុះបំពេញភារកិច្ចចៀសវាងការធ្វើអត្តនោម័តដោយខ្លួនឯង។

ជាមួយគ្នានេះដែរ លោកឧត្តមសេនីយ៍ទោស្នងការបានសំណូមពរឱ្យមានការពង្រឹង និងពង្រីកផែនការដែលមានស្រាប់របស់ អធិការដ្ឋាននគរបាលក្រុង/ស្រុក ប្រធានវេនប្រចាំបញ្ជាត្រូវទទួលខុសត្រូវលើបទល្មើលដែលកើតមានឡើងក្នុងតំបន់ដែលខ្លួនទទួលខុសត្រូវ និងពង្រឹងបន្ថែមលើមន្រ្តីជំនាញទៅលើការធ្វើរបាយការណ៍ឱ្យបានឆាប់រហ័ស និងរៀបចំរចនាសម្ព័ន្ធឱ្យបានច្បាស់លាស់ និងធ្វើយន្តការដឹកនាំបញ្ជាស្របតាមអនុក្រឹត្យលេខ៣៩ អនុវត្តរឹតបន្តឹងគោលដៅបន្តទៀតឱ្យបានល្អប្រសើរ៕

ដោយ ឃុត សៅ