AKP ភ្នំពេញ ថ្ងៃទី២៦ ខែសីហា ឆ្នាំ២០២៦---

សម្តេចរដ្ឋសភាធិបតី ឃួន សុដារីប្រធានរដ្ឋសភាបានបញ្ជាក់ថា វត្តមានឯកឧត្តមប្រធានរដ្ឋសភាអូស្ត្រាលី នៅកម្ពុជាបង្ហាញពីចំណងមិត្តភាព កិច្ចសហប្រតិ បត្តិការដ៏យូរអង្វែងនៃប្រទេសទាំងពីរ។

សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា បានជួបពិភាក្សាការងារជាមួយ ឯកឧត្តម មិលតុន ឌីក (Milton Dick) ប្រធានរដ្ឋសភាប្រទេសអូស្ត្រាលី នៅរសៀលថ្ងៃទី២៦ ខែសីហា ឆ្នាំ២០២៦ នៅវិមានរដ្ឋសភា ក្នុងពេលដែលឯកឧ ត្តម អញ្ជើញមកចូលរួមសន្និសីទប្រធានសភានៃអន្តរសភាលើកទី២ (2nd ISC) ដែលសភាកម្ពុជាធ្វើជាម្ចាស់ផ្ទះ។

សម្តេចប្រធានរដ្ឋសភា មានសេចក្តីសោមនស្សរីករាយក្រៃលែង និងបានស្វាគមន៍យ៉ាងកក់ក្តៅបំផុត ចំពោះវត្តមានរបស់ឯកឧត្តម មីលតុន ឌីក ប្រធានរដ្ឋសភានៃប្រទេសអូស្ត្រាលី ព្រមទាំងគណៈប្រតិភូនៅកម្ពុជា។ ការអញ្ជើញមកកាន់កម្ពុជារបស់គណៈប្រ តិភូជាន់ខ្ពស់រដ្ឋសភាអូស្ត្រាលីនៅក្នុងឱកាសនេះ នឹងធ្វើឱ្យចំណងមិត្តភាព កិច្ចសហប្រតិបត្តិការប្រទេសទាំងពីរ ទាំងស្ថាប័ននីតិប្បញ្ញត្តិនិងនីតិប្រតិបត្តិ កាន់តែមានការរីកចម្រើនឡើងទាំងក្នុងក្របខណ្ឌទ្វេភាគីនិងពហុភាគី។

សម្តេចបានសង្កត់ធ្ងន់ថា សន្និសីទប្រធានសភានៃអន្តរសភាលើកទី២ ដែលកម្ពុជាធ្វើជាម្ចាស់ផ្ទះនាពេលនេះ ដឹកនាំរៀបចំដោយផ្ទាល់របស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាស្ថាបនិកសន្និសីទប្រធានសភានៃអន្តរសភាមួយរូប ក្នុងគោល បំណងដើម្បីកសាងនូវទំនុកចិត្ត តាមរយៈកិច្ចសន្ទនានិងការការពារសន្តិភាព ដោយផ្អែកលើមូលដ្ឋាននៃច្បាប់អន្តរជាតិ។

ឯកឧត្តម មីលតុន ឌីក បានថ្លែងអំណ រគុណយ៉ាងជ្រាលជ្រៅ ដែលសម្តេចបានអនុញ្ញាតដល់ឯកឧត្តមនិងគណៈប្រតិភូ បានជួបសម្តែងការគួរសមនិងពិភាក្សាការងារនៅក្នុងឱកាសនេះ។

ឯកឧត្តមប្រធានរដ្ឋសភា បានថ្លែងការកោតសរ សើរចំពោះសមត្ថភាព និងទេពកោសល្យក្នុងការដឹកនាំរបស់សម្តេចប្រធានរដ្ឋសភា។

ឯកឧត្តមបានវាយតម្លៃខ្ពស់និងគាំទ្រពេញទំហឹង ចំពោះការរៀបចំសន្និសីទប្រធានសភានៃអន្តរសភាលើកទី២ នៅកម្ពុជាដែលនឹងនាំមកនូវផលប្រយោជន៍ដល់ប្រជាពលរដ្ឋ។

ឯកឧត្តមបានលើកឡើងពីការពង្រឹងកិច្ចសហប្រតិបត្តិការសភាប្រទេសទាំងពីរ បន្ថែមទៀតនៅក្នុងការបម្រើផលប្រ យោជន៍ប្រទេសទាំងសងខាង តាមរយៈក្រុមមិត្តភាព និងសភាវ័យក្មេងជាដើម។

ចាប់តាំងពីទសវត្សរ៍ឆ្នាំ ១៩៩០មក អូស្ត្រាលីបានផ្តល់ហិរញ្ញប្បទានឥតសំណង និងជំនួយអភិវឌ្ឍន៍ដល់កម្ពុជាសរុបប្រមាណ ១.៤ពាន់លានដុល្លារអាមេរិក។ កិច្ចសហប្រតិបត្តិការដ៏ល្អនៃប្រទេសទាំងពីរមានច្រើនវិស័យ មានជាអាទិ៍ ពាណិជ្ជកម្ម និងអប់រំជាដើម។ ពាណិជ្ជកម្មទ្វេភាគីរវាងកម្ពុជានិងអូស្ត្រាលីបានកើនឡើងដល់ប្រមាណជាង ៦០០លានដុល្លារអាមេរិកនៅឆ្នាំ២០២៥។ បច្ចុប្បន្ននេះ អូស្ត្រាលីគឺជាដៃគូអភិវឌ្ឍន៍ដ៏សំខាន់មួយរបស់កម្ពុជា ទាំងលើវិស័យសេដ្ឋកិច្ច កំណែទម្រង់អភិបាលកិច្ច និងការអភិវឌ្ឍមូលធនមនុស្ស។

សម្តេចប្រធានរដ្ឋសភា បានគាំទ្រប្រសាសន៍លើកឡើងរបស់ឯកឧត្តមប្រធានរដ្ឋសភា និងបានគូសបញ្ជាក់ថា ការលើកឡើងទាំងនោះស្របនឹងតថភាពជាក់ស្តែងនៅកម្ពុជា ដូចជាការកសាងធនធានមនុស្សជាដើម។ កម្ពុជាក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីវ័យក្មេង បានដាក់ចេញនូវយុទ្ធសាស្ត្របញ្ចកោណ-ដំណាក់កាលទី១ ដែលបានផ្តោតសំខាន់លើការកសាងធនធានមនុស្សជាអាទិភាព ដើម្បីសម្រេចបាននូវគោលដៅអភិវឌ្ឍន៍ឆ្នាំ២០៣០ កម្ពុជាក្លាយជាប្រទេសមានចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមានចំណូលខ្ពស់។

សម្តេចប្រធានរដ្ឋសភា បានអរគុណប្រទេសអូស្ត្រាលី ដែលបានចូលរួមស្វែងរកសុខសន្តិភាព និងការអភិវឌ្ឍនៅកម្ពុជាតាំងពីដើមរហូតមក។ ប្រជាជនកម្ពុជាបានចងចាំនូវឈ្មោះ ឧត្តមសេនីយ៍ឯក ចន សាន់ឌឺសុន (John Sanderson) ជាមេបញ្ជាការមួយរូបនៅក្នុងកងកម្លាំងថែរក្សាសន្តិភាពរបស់អង្គការសហប្រជាជាតិ ជនជាតិអូស្ត្រាលី ដែលបានបំពេញតួនាទីជាមេបញ្ជាការកងកម្លាំងយោធានៃអង្គការសហប្រជាជាតិ (UNTAC) ចាប់ពីឆ្នាំ១៩៩១ ដល់ឆ្នាំ១៩៩៣។

សម្តេចប្រធានរដ្ឋសភាក៏បានបង្ហាញការគាំទ្រចំពោះ លោកជំទាវ កាទ្រីណា ឃូបពឺ (Katrina Cooper) ដែលជាអ្នកការទូត និងជាអ្នកជំនាញច្បាប់អូស្ត្រាលីដ៏ល្បីឈ្មោះមួយរូប ដែលបានទទួលធ្វើជាប្រធានគណៈកម្មាធិការសម្របសម្រួល ស្តីពីព្រំដែនសមុទ្រ និងតំបន់ត្រួតស៊ីគ្នារវាងប្រទេសកម្ពុជា និងប្រទេសថៃ ក្រោយពីប្រទេសថៃបានលុបចោលជាឯកតោភាគី នូវកិច្ចព្រមព្រៀងឆ្នាំ២០០១ ជាមួយកម្ពុជាស្តីពីដែនសមុទ្រត្រួតស៊ីគ្នានោះ។

កម្ពុជាបានស្នើសុំឱ្យមាន «យន្តការផ្សះផ្សាដោយបង្ខំ» ក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) ដើម្បីដោះស្រាយជម្លោះព្រំដែនសមុទ្រ និងតំបន់ត្រួតស៊ីគ្នា។សម្តេចរដ្ឋសភាធិបតី បានលើកឡើងថា ក្នុងនាមកម្ពុជាជារដ្ឋតូចមួយ កម្ពុជាគ្មានបំណងប្រាថ្នារំលោភបំពានប្រទេសណានោះទេ។ កម្ពុជាចង់ការពារអ្វីដែលជាកម្មសិទ្ធិស្របច្បាប់របស់ប្រទេសខ្លួនតែប៉ុណ្ណោះ។ កម្ពុជាស្រលាញ់សន្តិភាព មានបំណងប្រាថ្នា និងឆន្ទៈក្នុងការដោះស្រាយវិវាទដោយសន្តិវិធី និងគោរពច្បាប់អន្តរជាតិ៕

ដោយ៖ ប៊ុនរិទ្ធ