AKP ភ្នំពេញ ថ្ងៃទី០៦ ខែមីនា ឆ្នាំ២០២៥ -- សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជាបានវាយតម្លៃខ្ពស់ចំពោះបេសកកម្មការងាររបស់សាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍នៃក្រសួងព័ត៌មាន ដែលកន្លងមកបានចូលរួមយ៉ាងសកម្មនៅក្នុងការរួមចំណែកធ្វើសកម្មភាពមនុស្សធម៌ នៅក្នុងក្រសួង ក៏ដូចជាសង្គមខាងក្រៅ តាមរយៈការស្វែងយល់សុខទុក្ខ មន្រ្តីរាជការដែលជានិវត្តន៍ជននិងចាស់ជរា និងជនងាយរងគ្រោះនានា។ សកម្មភាពមនុស្សធម៌ទាំងនេះ ជាគំរូដ៏ល្អ ជាការផ្សារភ្ជាប់សុខទុក្ខរវាងអ្នកជំនាន់មុន និងអ្នកជំនាន់ក្រោយ។ ការលើកឡើងរបស់សម្ដេចប្រធានរដ្ឋសភាបែបនេះ ក្នុងឱកាសអបអរសាទរខួបអនុស្សាវរីយ៍លើកទី១១៤ ទិវាអន្តរជាតិនារី ៨មីនា ឆ្នាំ២០២៥ និងបានអនុញ្ញាតជូនប្រតិភូសាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍ក្រសួងព័ត៌មាន ដឹកនាំដោយ លោកជំទាវ ទុយ សិរីរតនៈ នេត្រ ភក្រ្តា ចូលជួបសម្តែងការគួរសម និងទទួលអនុសាសន៍ នាព្រឹកថ្ងៃទី០៦ ខែមីនា ឆ្នាំ២០២៥ នៅវិមានរដ្ឋសភា។

លោកជំទាវ ទុយ សិរីរតនៈ នេត្រ ភក្រ្តា បានគោរពថ្លែងអំណរគុណយ៉ាងជ្រាលជ្រៅ ជូនសម្តេចប្រធានរដ្ឋសភា ដែលបានឆ្លៀតពេលដ៏មមាញឹកអនុញ្ញាតដល់លោកជំទាវ និងសហការីទាំងអស់ បានចូលជួបសម្តែងការគួរសម ក៏ដូចជាគោរពជូនពរសម្តេចនៅក្នុងឱកាសទិវាអន្តរជាតិនារី៨មីនា និងទទួលអនុសាសន៍ណែនាំ ដើម្បីសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ក្រសួងព័ត៌មាន យកទៅអនុវត្តន៍កាន់តែមានប្រសិទ្ធភាព នៅក្នុងសកម្មភាពមនុស្សធម៌និងការជួយលើកកម្ពស់សមភាពយេនឌ័រ នៅសង្គមកាន់តែបានច្រើនឡើងបន្ថែមទៀត ស្របតាមចក្ខុវិស័យវែងឆ្ងាយ និងគោលនយោបាយច្បាស់លាស់ របស់រាជរដ្ឋាភិបាលក្រោមការដឹកនាំរបស់     សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនីតិកាលទី៧ នៃរដ្ឋសភា។

សម្តេចរដ្ឋសភាធិបតី ឃួន សុដារី បានគូសបញ្ជាក់ថា ការផ្សារភ្ជាប់សុខទុក្ខអ្នកជំនាន់មុននិងអ្នកជំនាន់ក្រោយនេះ មិនត្រឹមជាការគោរពដឹងគុណដល់រាមច្បងដែលបានលះបង់កម្លំាងកាយចិត្តបម្រើសង្គម និងប្រទេសជាតិប៉ុណ្ណោះទេ តែជាឱកាសដែលអ្នកជំនាន់ក្រោយបានសិក្សារៀនសូត្រ ដកស្រង់បទពិសោធន៍ការងារពីអ្នកជំនាន់មុនផងដែរ។ សម្តេចប្រធានរដ្ឋសភាបានគោរពថ្លែងអំណរគុណជូន សម្តេចកិត្តិសង្គហបណ្ឌិត ម៉ែន សំអន ប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍ ដែលបានរៀបចំបង្កើតរចនាសម្ព័ន្ធសមាគមនៅតាមក្រសួង ស្ថាប័ននិងខេត្តរាជធានី ទូទំាងប្រទេស ក្នុងការចូលរួមចំណែកដល់ការងារមនុស្សធម៌ សង្គម និងការលើកកម្ពស់សមភាពយេនឌ័រ នៅកម្ពុជា។ សម្តេចរដ្ឋសភាធិបតីបានបន្ដថា ការបង្កើតរចនាសម្ព័ន្ធសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ នៅតាមក្រសួងស្ថាប័ននានា ជារបត់ថ្មីមួយក្នុងការលុបបំបាត់ចោលនូវ​   ទស្សនៈ ដែលថា ប្តីស័ក្កិ៤ប្រពន្ធស័ក្តិ៥ មកជាការចូលរួមចំណែកនិងការបំពេញបន្ថែមឱ្យគ្នាទៅវិញទៅមក ពីព្រោះថាបុរសនិងស្រ្តីជាដៃទំាងពីរត្រូវជួយគ្នាទៅវិញទៅមកដោយមិនអាចខ្វះដៃណាមួយបាននោះឡើយ។ 

ក្នុងឱកាសនោះសម្តេចរដ្ឋសភាធិបតីបានរម្លឹកថា នៅកម្ពុជាការលើកកម្ពស់សិទ្ធិនារី ការផ្តល់ភាពអង់អាចជូនដល់ស្រ្តីនិងកុមារី ត្រូវបានអនុវត្តន៍តំាងពីក្រោយថ្ងៃរំដោះ៧មករាឆ្នាំ១៩៧៩មក។ សម្តេចតេជោ ហ៊ុន សែន ដែលជាអគ្គមគ្គទេសក៍សន្តិភាពនិងការអភិវឌ្ឍបានចាត់ទុកស្រ្តីជាឆ្អឹងខ្នងសេដ្ឋកិច្ច ជួយស្រ្តីគឺជួយខ្លួនឯង។ ចំណែករដ្ឋាភិបាលនីតិកាលទី៧នៃរដ្ឋសភា សម្តេចមហាបវរធិបតី ហ៊ុន ម៉ាណែត ដែលមានឆន្ទៈមោះមុត និងស្វាហាប់ប្រកបដោយគតិបណ្ឌិត ក្នុងការដឹកនាំកម្ពុជាសម្រេចបាននូវគោលដៅអភិវឌ្ឍន៍ឆ្នាំ២០៣០និងឆ្នាំ២០៥០ បានផ្តល់អាទិភាពខ្ពស់ដល់ការលើកកម្ពស់សិទ្ធិ និងសមភាពស្រ្តី ដូចបានកំណត់ក្នុងយុទ្ធសាស្រ្តបញ្ចកោណដំណាក់កាលទី១។ សម្តេចធិបតីក៏បានមានប្រសាសន៍ផងដែរថា «ពិភពលោកនឹងកាន់តែសុវត្ថិភាព ស្រស់បំព្រង និងកក់ក្តៅជាងមុន ប្រសិនបើមានស្រ្តីក្លាយជាអ្នកដឹកនាំកាន់តែច្រើន និងថាស្រ្តីជាបេះដូងរបស់គ្រួសារ»។

សម្តេចប្រធានរដ្ឋសភាក៏បានគូសបញ្ជាក់ទៀតថា ការទទួលបានសុខសន្តិភាពពេញផ្ទៃប្រទេសនោះហើយ ទើបស្រ្តីនៅកម្ពុជាទទួលបានការគោរព ការផ្តល់ជូនឋានៈតួនាទីនៅក្នុងសង្គម ដូចពេលបច្ចុប្បន្ននេះ ហើយតួនាទីនិងឋានៈរបស់ស្រ្តីនៅក្នុងសង្គមផ្សារភ្ជាប់ជាមួយស្ថានភាពនយោបាយរបស់សង្គមជាតិនីមួយៗ។ សម្ដេចប្រធានរដ្ឋសភាក៏បានអះអាងដែរថា សង្គមជាតិមានសន្តិភាព ស្រ្តីមានសិទ្ធិ មានសេរីភាពនិងទទួលបានឋានៈនៅក្នុងសង្គម ហើយ បើសង្គមជាតិជួបសង្រ្គាមគឺបាត់បង់សិទ្ធិទំាងអស់ សូម្បីសិទ្ធិជាមូលដ្ឋាននៃការរស់រានមានជីវិតក៏គ្មានដែរ។

សម្តេចរដ្ឋសភាធិបតី ឃួន សុដារី  ក៏បានរម្លឹកពីអនុស្សាវរីយ៍នៅក្នុងការបម្រើការងារជាអ្នកសារព័ត៌មាន ដែល  សម្តេចបានឆ្លងកាត់ កាលពីអតីតកាលជាមួយសហការីមួយចំនួនដែលបច្ចុប្បន្ននេះ បានក្លាយជាថ្នាក់ដឹកនាំសំខាន់ៗនៅក្រសួងព័ត៌មាន។ សម្តេចប្រធានរដ្ឋសភាបានបញ្ជាក់បន្ថែមថា សម្តេចតែងតែផ្តើមកសាងស្នាដៃពីការងារតូចៗមក មុននឹងក្លាយជាប្រធានរដ្ឋសភាពិសេសជាថ្នាក់ដឹកនាំសភាជាស្រ្តីមួយរូប ដែលបានចូលរួមនៅក្នុងវេទិកាអន្តរសភានានាក្នុងការការពារផលប្រយោជន៍ជូនស្រ្តីផងដែរ។ សម្តេចរដ្ឋសភាធិបតីបានសង្កត់ធ្ងន់ថា៖ «ស្រ្តីមានចរិតធ្វើការហ្មត់ចត់ យកចិត្តទុកដាក់ ព្យាយាមដើម្បីសម្រេចបានជាលទ្ធផល»។

ជាមួយគ្នានេះផងដែរ សម្តេចប្រធានរដ្ឋសភាបានផ្តល់អនុសាសន៍មួយចំនួនជូនដល់ សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ក្រសួងព័ត៌មានដោយក្រៅពីការបន្តបេសកកម្មដ៏ល្អ ដែលបានបំពេញនាពេលកន្លងមកហើយ ត្រូវបង្កើតឱ្យមានការជួបជុំជាប្រចាំក្នុងរង្វង់សមាគមដើម្បីបានស្តាប់មតិស្តាប់យោបល់ពីសមាជិកក្នុងប្រយោជន៍ស្វែងយល់ពីបញ្ហាប្រឈម និងផលលំបាកនានា រួមគ្នាដោះស្រាយ ក៏ដូចជាការពង្រឹង កសាងសមត្ថភាព របស់ស្រ្តីផងដែរ។ សម្ដេចរដ្ឋសភាធិបតីក៏បានលើកឡើងបន្ថែមថា ដោយសារក្រសួងព័ត៌មានមានតួនាទីដ៏សំខាន់មួយនៅក្នុងការអប់រំពលរដ្ឋ ដូច្នេះសូមប្រើប្រព័ន្ធប្រព័ន្ធផ្សព្វផ្សាយ នៅក្នុងការចូលរួមដល់ការបញ្រ្ជាបយេនឌ័រនៅក្នុងសង្គម ដែលផ្តល់ការបណ្តុះបណ្តាលនិងលើកចិត្តដល់ស្រ្តីក្នុងការទទួលបានការអប់រំ ផ្នែកបច្ចេកវិទ្យា និងតួនាទីនានាស្របតាមសមត្ថភាព៕ដោយ៖ រិទ្ធី រូបថត៖ ឡុង ដេវីត