AKP ភ្នំពេញ ថ្ងៃទី០៦ ខែមីនា ឆ្នាំ២០២៥ -- បន្ទាប់ពីដំណើរការប្រកួតយ៉ាងស្វិតស្វាញ នៅក្នុងវគ្គសន្សំពិន្ទុពូលនីមួយៗជាច្រើនសប្តាហ៍មកនេះ ការប្រកួតកីឡាបាល់ទាត់ ពានរង្វាន់ក្រសួងមហាផ្ទៃ បានឈានដល់វគ្គពាក់កណ្ដាលផ្ដាច់ព្រ័ត្រ នាថ្ងៃសុក្រ ទី០៧ ខែមីនា ឆ្នាំ២០២៥ ដោយគ្រោងនឹងដំណើរការពីម៉ោង ៤ល្ងាចតទៅនៅទីលានវិទ្យាល័យបឹងត្របែក។

ក្រោយពីដំណើរការប្រកួតវគ្គសន្សំពិន្ទុ ចាប់តាំងពីប្រកួតដំបូងថ្ងៃទី១៦ ខែមករា ឆ្នាំ២០២៥ រហូតមកដល់ពេលនេះសរុបមាន ១៩ប្រកួតមកហើយ ដោយរកឃើញក្រុមខ្លាំងចំនួន ៤ក្រុមដែលអាចឡើងដល់វគ្គពាក់កណ្ដាលផ្ដាច់ព្រ័ត្រនៅថ្ងៃសុក្រ ទី០៧ ខែមីនាស្អែកនេះ។ ក្រុមខ្លាំងៗទាំង៤នេះ មានដូចជា ក្រុមប្រឹក្សាកីឡាក្រសួងមហាផ្ទៃ ក្រុមអន្តោប្រវេសន៍មានជ័យ ក្រុមខុទ្ទកាល័យឯកឧត្ដមអភិសន្តិបណ្ឌិត និងក្រុមអគ្គស្នងការនគរបាលជាតិ។

ចំពោះការប្រកួតវគ្គពាក់កណ្ដាលផ្ដាច់ព្រ័ត្រនេះ គឺក្រុមប្រឹក្សាកីឡាក្រសួងមហាផ្ទៃ នឹងត្រូវប្រកួតប្រជែងជាមួយ ក្រុមអគ្គស្នងការនគរបាលជាតិ ស្របពេលដែល ក្រុមអន្តោប្រវេសន៍មានជ័យ ប៉ះ ក្រុមខុទ្ទកាល័យឯកឧត្ដមអភិសន្តិបណ្ឌិត។ ២ក្រុមឈ្នះៗ ដែលឈ្នះក្នុងការប្រកួតនៅវគ្គពាក់កណ្តាលផ្តាច់ព្រ័ត្រ ស្អែកនេះ នឹងត្រូវកក់កៅអីនៅវគ្គផ្តាច់ព្រ័ត្រ ដណ្តើមម្ចាស់ដំណែងជើងឯក ប្រចាំរដូវកាលទី២ ឆ្នាំ២០២៥នេះ ដែលគ្រោងនឹងធ្វើឡើង នៅថ្ងៃទី១១ ខែមីនា ឆ្នាំ២០២៥ នៅពហុកីឡដ្ឋានជាតិអូឡាំពិកជាមួយនឹងពិធីបិទជាផ្លូវការផងដែរ។ តាមការគ្រោងទុក ពិធីបិទការប្រកួតនឹងទទួលការអញ្ជើញជាអធិបតីដ៏ខ្ពស់ខ្ពស់ពីឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។

គួរបញ្ជាក់ថា ព្រឹត្តិការណ៍កីឡាបាល់ទាត់ ពានរង្វាន់ក្រសួងមហាផ្ទៃត្រូវបានប្រារព្ធធ្វើឡើងក្រោមគំនិតផ្ដួចផ្ដើមឡើងដោយឯកឧត្ដមអភិសន្តិបណ្ឌិត ស សុខា ក្នុងគោលបំណងរឹតចំណងមិត្តភាព បង្កើនសាមគ្គីភាព និងលើកកម្ពស់សុខមាភាពដល់មន្ត្រីនគរបាលផងដែរ៕

ដោយ ហេង ណាលីន