AKP ភ្នំពេញ ថ្ងៃទី០៣ ខែមីនា ឆ្នាំ២០២៥-- ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនៅថ្ងៃទី០២ ខែមីនា ឆ្នាំ២០២៥ថា សហគមន៍កសិកម្ម «ស្រ្តីសាមគ្គីពានីរុងរឿង» នៅឃុំពានី ស្រុកកំពង់ត្រឡាច ខេត្តកំពង់ឆ្នាំង ទទួលបានថវិកាជំនួយឥតសំណង ៣៥ ០០០ ដុល្លារ ពីគម្រោងពិពិធកម្មកសិកម្មកម្ពុជា (CASDP) ស្មើនឹង៤០ភាពរយនៃផែនការវិនិយោគលើការធ្វើពិពិធកម្មមុខរបរចិញ្ចឹមជ្រូកជាសហគមន៍ ស្របពេលដែលសហគមន៍វិនិយោគបង្គ្រប់ដោយខ្លួនឯងផ្ទាល់៦០ភាគរយទៀត។ 

ឯកឧត្តមអនុរដ្ឋលេខាធិការបានបន្តទៀតថា “ក្នុងតួនាទីខ្ញុំជានាយកគម្រោងថ្មីនៃក្រសួងកសិកម្ម ពិតជាសប្បាយចិត្តដែលបានឃើញបងប្អូនកសិករយើងចាប់ផ្តើមធ្វើការរួមគ្នាដោយទំនុកចិត្ត និងភាពជឿជាក់ខ្ពស់តាមរយៈការដាក់ទុនវិនិយោគរួមគ្នា ហើយក៏សង្ឃឹមថាសហគមន៍ដ៏មានសក្តានុពលមួយនេះនឹងពិចារណាបង្កើនសមាហរណកម្មរបស់ខ្លួនបន្ថែមទៀត ជាពិសេសការធ្វើផលិតកម្មកសិកម្មតាមកិច្ចសន្យា ដើម្បីទៅប្រែក្លាយខ្លួនទៅ សហគមន៍កសិកម្មទំនើប ពេញលក្ខណៈសម្បត្តិតែម្តងក្នុងថ្ងៃណាមួយ”។

សហគមន៍នេះគ្រោងនឹងបោះទុនវិនិយោគរួមគ្នាជាមួយសមាជិករបស់ខ្លួនលើប្រតិបត្តិការ និងការធ្វើផលិតកម្មជ្រូកប្រមាណ១១ម៉ឺនដុល្លារ ដែលក្នុងនោះសហគមន៍នឹងដើរតួនាទីផ្គត់ផ្គង់ពូជកូនជ្រូក និងចំណីជ្រូកជូនដល់សមាជិក (មេជ្រូកពូជ២០ក្បាល កូន៣០០ក្បាលក្នុងមួយឆ្នាំ ចំណី៣០០តោនក្នុងមួយឆ្នាំ) ដើម្បីយកទៅចិញ្ចឹមបន្តរៀងៗខ្លួន និងផ្គត់ផ្គង់ជ្រូកសាច់ទៅកាន់ទីផ្សារក្នុងបរិមាណប្រហែល៥០តោនក្នុងមួយឆ្នាំ៕

ដោយ ណយ នឿន