AKP ភ្នំពេញ ថ្ងៃទី០៣ ខែមីនា ឆ្នាំ២០២៥-- ឯកឧត្ដម កិត្តិសង្គហបណ្ឌិត គន់ គីម ទេសរដ្ឋមន្រ្ដី អនុប្រធានទី១ គណៈកម្មាធីការជាតិគ្រប់គ្រងគ្រោះហន្ដរាយ អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានថ្លែងកោតសរសើរ និងវាយតម្លៃខ្ពស់ចំពោះគណៈកម្មាធិការជាតិគ្រប់គ្រងគ្រោះមហន្តរាយខេត្ត មន្ត្រីពាក់ព័ន្ធគ្រប់ថ្នាក់ មន្ត្រីបង្គោលក្រុង ស្រុក និងសមាគមអតីតយុទ្ធជនខេត្ត ដែលបានបំពេញមុខនាទីរបស់ខ្លួនបានល្អប្រសើរ ដោយពេលមានហេតុការណ៍កើតឡើងខេត្តម្ចាស់ការចុះទៅដោះស្រាយបានភ្លាមៗ។

ការកោតសរសើររបស់ឯកឧត្ដមទេសរដ្ឋមន្រ្ដីបានធ្វើឡើងក្នុងកិច្ចប្រជុំបូកសរុបលទ្ធផលការងារគ្រប់គ្រងគ្រោះមហន្តរាយឆ្នាំ២០២៤ និងទិសដៅការងារឆ្នាំ២០២៥ របស់គណៈកម្មាធិការគ្រប់គ្រងគ្រោះមហន្តរាយ ខេត្តប៉ៃលិន កិច្ចប្រជុំបូកសរុបលទ្ធផលការងារឆ្នាំ២០២៤ និងទិសដៅអនុវត្តបន្តឆ្នាំ២០២៥ របស់សមាគមអតីតយុទ្ធជនកម្ពុជា ខេត្តប៉ៃលិន ព្រមទាំងពិធីបញ្ចុះបឋមសិលាសាងសង់អគារស្នាក់ការសមាគមអតីតយុទ្ធជនកម្ពុជា ខេត្តប៉ៃលិន កាលពីថ្ងៃទី០២ ខែមីនា ឆ្នាំ២០២៥។

ឯកឧត្តម ទេសរដ្ឋមន្ត្រី គន់ គីម បានលើកឡើងថា រាជរដ្ឋាភិបាលក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជានិច្ចកាលបានយកចិត្តទុកដាក់យ៉ាងខ្លាំងអំពីកត្តានានាដែលបង្កឡើងដោយសារគ្រោះមហន្តរាយ ដោយមិនបណ្តែតបណ្តោយឱ្យប្រជាពលរដ្ឋណាម្នាក់រងគ្រោះដោយសារតែកត្តាធម្មជាតិ ដោយគ្មានការយកចិត្តទុកដាក់ពីសំណាក់អាជ្ញាធរនោះឡើយ ជាពិសេសសម្តេចនាយករដ្ឋមន្ត្រីតែងតែចាត់ឱ្យថ្នាក់ដឹកនាំនៅតាមបណ្តាក្រសួង ស្ថាប័នពាក់ព័ន្ធទាំងអស់ចុះត្រួតពិនិត្យដោយផ្ទាល់ ដើម្បីរកវិធីដោះស្រាយ។

ក្នុងឱកាសនេះ ឯកឧត្តមទេសរដ្ឋមន្រ្តីបានផ្តល់នូវអនុសាសន៍ណែនាំឱ្យថ្នាក់ខេត្តបន្តតាមដានព័ត៌មាននៅតាមតំបន់ងាយរងគ្រោះ ជាពិសេសតំបន់ប្រឈមការខ្វះទឹក ខិតខំស្តារទំនប់ទឹក និងអាងទឹក ដើម្បីរក្សាទឹកទុកប្រើក្នុងរដូវប្រាំង ថ្នាក់ខេត្តត្រូវធ្វើការពង្រឹងទីទួលសុវត្ថិភាព ការកសាងភាពធន់ទៅនឹងគ្រោះមហន្តរាយ សំដៅកាត់បន្ថយបានហានិភ័យនានា។

ចំពោះសមាគមអតីតយុទ្ធជនខេត្ត ឯកឧត្តម គន់ គីម បានផ្តាំផ្ញើឱ្យមន្ទីរ អង្គភាព ចងសម្ព័ន្ធមេត្រីជាមួយគ្រួសារអតីតយុទ្ធជនតាមខ្នងផ្ទះក្នុងភូមិនីមួយៗ ដើម្បីរៀបចំឈូសឆាយដីបង្កបង្កើនផល ជួយពួកគាត់លើការដាំដុះដំណាំផ្សេងៗ។ ជាមួយគ្នានេះដែរ មេឃុំ ចៅសង្កាត់ ដែលជាប្រធានកិត្តិយស និងប្រធានប៉ុស្តិ៍រដ្ឋបាលជាប្រធានសាខា ឃុំ សង្កាត់ ត្រូវបន្តធ្វើអំពើល្អ ហើយខិតខំសហការ និងបង្កគ្រប់លទ្ធភាពឱ្យបងប្អូនអតីតយុទ្ធជនយើងបានទទួលនូវសេវាសាធារណៈផ្សេងៗ ដើម្បីឆ្លើយតបទៅនឹងការគិតគូរ និងការយកចិត្តទុកដាក់ខ្ពស់បំផុតពីប្រមុខរាជរដ្ឋាភិបាលមកលើគ្រួសារអតីតយុទ្ធជនរបស់យើង៕

ដោយ៖ ចាន់ សុភឿន