AKP បន្ទាយមានជ័យ ថ្ងៃទី០២ ខែមីនា ឆ្នាំ២០២៥-- ឯកឧត្ដម អ៊ុ រាត្រី អភិបាលខេត្តបន្ទាយមានជ័យ បានធ្វើជាម្ចាស់ផ្ទះរៀបចំជំនួបសម្តែងការគួរសម និងពិភាក្សាការងារជាមួយឯកឧត្ដម LIU Zhongyi ឧបការីរដ្ឋមន្ត្រីក្រសួងសន្តិសុខសាធារណៈចិន និងគណៈប្រតិភូជាន់ខ្ពស់របស់ចិន ដោយមានការចូលរួមថ្នាក់ដឹកនាំរដ្ឋបាលខេត្តមេបញ្ជាការ កងកម្លាំងទាំងបីប្រភេទ និងមន្ទីរពាក់ព័ន្ធជាច្រើនរូប បានធ្វើឡើងនៅសាលប្រជុំ"ខ" សាលាខេត្តបន្ទាយមានជ័យ នៅថ្ងៃទី០២ ខែមីនា ឆ្នាំ២០២៥។

ក្នុងឱកាសនោះ ឯកឧត្ដមអភិបាលខេត្តបានសម្តែងការគួរសម និងស្វាគមន៍ការមកដល់របស់ឯកឧត្ដម LIU Zhongyi និងគណៈប្រតិភូជាន់ខ្ពស់របស់ចិន និងបានរំលឹកពីទំនាក់ទំនងមិត្តភាព និងកិច្ចសហប្រតិបត្តិការយ៉ាងជិតស្និទ្ធរវាងប្រទេសកម្ពុជា និងប្រទេសចិន ជាពិសេសក្នុងវិស័យសន្តិសុខ និងការអភិវឌ្ឍន៍សេដ្ឋកិច្ចសង្គម។

ទន្ទឹមនឹងនេះ ឯកឧត្ដមក៏បានរំលឹកពីសារៈសំខាន់នៃកិច្ចសហប្រតិបត្តិការទ្វេភាគី ក្នុងការជំរុញការអភិវឌ្ឍខេត្តបន្ទាយមានជ័យ ជាពិសេសក្នុងវិស័យសន្តិសុខសាធារណៈ ការពារព្រំដែន និងការលើកកម្ពស់ជីវភាពរស់នៅរបស់ប្រជាពលរដ្ឋ និងបានសង្កត់ធ្ងន់ថា កិច្ចសហការគ្នារវាងខេត្តបន្ទាយមានជ័យ និងក្រសួងសន្តិសុខសាធារណៈចិន នឹងជួយពង្រឹងសន្តិសុខ និងស្ថិរភាពក្នុងតំបន់។

ជាមួយគ្នានេះដែរ ឯកឧត្ដម LIU Zhongyi បានថ្លែងអំណរគុណចំពោះការស្វាគមន៍ដ៏កក់ក្តៅរបស់ឯកឧត្ដម អ៊ុ រាត្រី និងថ្នាក់ដឹកនាំខេត្តបន្ទាយមានជ័យ និងបានរំលឹកពីសារៈសំខាន់នៃទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរ ជាពិសេសក្នុងវិស័យសន្តិសុខ និងការអភិវឌ្ឍ ព្រមទាំងបានសន្យាថា ប្រទេសចិននឹងបន្តគាំទ្រ និងជួយឧបត្ថម្ភដល់ខេត្តបន្ទាយមានជ័យ ក្នុងការអភិវឌ្ឍន៍សន្តិសុខ និងសេដ្ឋកិច្ចសង្គម។

ក្នុងជំនួបនោះ ភាគីទាំងពីរបានពិភាក្សាអំពីផែនការសហប្រតិបត្តិការជាក់លាក់ ដើម្បីពង្រឹងសន្តិសុខ និងស្ថិរភាពក្នុងតំបន់ ក៏ដូចជាការលើកកម្ពស់កិច្ចសហប្រតិបត្តិការក្នុងវិស័យពាណិជ្ជកម្ម វិស័យកសិកម្ម និងវិស័យអប់រំ។ ភាគីទាំងពីរបានព្រមព្រៀងគ្នាបន្តពង្រឹងកិច្ចសហប្រតិបត្តិការទ្វេភាគី ដើម្បីជំរុញការអភិវឌ្ឍន៍ដែលប្រកបដោយចីរភាព និងសុខដុមរមនាក្នុងតំបន់។ ជំនួបនេះបានបញ្ចប់ដោយជោគជ័យ និងបានបន្សល់ទុកនូវក្តីសង្ឃឹមថ្មីៗសម្រាប់កិច្ចសហប្រតិបត្តិការរវាងខេត្តបន្ទាយមានជ័យ និងក្រសួងសន្តិសុខសាធារណៈចិន ក្នុងគោលបំណងជំរុញសន្តិសុខ ស្ថិរភាព និងការអភិវឌ្ឍរួមគ្នា៕

ដោយ ឈុន សារ៉ាត