AKP ភ្នំពេញ ថ្ងៃទី០២ ខែមីនា ឆ្នាំ២០២៥-- ឯកឧត្ដម ឃួង ស្រេង អភិបាលរាជធានីភ្នំពេញ បានណែនាំឱ្យមន្រ្ដីជំនាញពាក់ព័ន្ធរៀបចំបន្ថែមជាបន្តបន្ទាប់ទាំងការតាំងលក់វត្ថុអនុស្សាវរីយ៍ ការសម្តែងតន្ត្រីបុរាណ មហោរី និងរបាំប្រពៃណី រៀបចំបណ្ណាល័យចល័ត មានដាក់ស៊ីក្លូរត់ទៅមកម្ដង៥គ្រឿង ដើម្បីជួយអភិរក្សស៊ីក្លូផង ជួយសម្រួលដល់ចាស់ៗពិបាកដើរផង និងជនមានពិការភាព ជាមួយនឹងការកែសម្រួលតម្រាយខ្សែរត់ខ្សែទី១C  និងបន្ថែមម៉ោងប្រតិបត្តិការសេវាដឹកជញ្ជូនសាធារណៈរថយន្តក្រុងជាដើម។ ជាក់ស្តែងសម្រាប់សប្តាហ៍ទី៥ នារាត្រីថ្ងៃទី០១ ខែមីនា ឆ្នាំ២០២៥  រដ្ឋបាលរាជធានីភ្នំពេញបានរៀបចំឱ្យមានឈុតល្ខោនបាសាក់ របាំប្រពៃណី និង ចាប៉ីដងវែង (នាយ សាម សុវណ្ឌឿន) ផងដែរ។

បើតាម លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងនៅថ្ងៃទី០១ ខែមីនា ឆ្នាំ២០២៥ ថា ចុងសប្តាហ៍នេះ (ថ្ងៃសៅរ៍ ទី០១ ខែមីនា) នៅទីតាំងផ្លូវថ្មើរជើង (Walk Street) នឹងមានរៀបចំឈុតល្ខោនបាសាក់ របាំប្រពៃណី និងចាប៉ីដងវែង (នាយ សាម សុវណ្ឌឿន) ហើយនៅសប្តាហ៍ក្រោយនឹងមានកំប្លែង (នាយក្រឹម) ផងដែរ។ ដូច្នេះសូមប្រជាពលរដ្ឋអញ្ជើញមកចូលរួមសប្បាយរីករាយទាំងអស់គ្នា។

ថ្មើរជើង (Walk Street) ជាកន្លែងដែលភ្ញៀវជាតិ អន្តរជាតិ កំពុងពេញនិយម ដោយពីមួយសប្តាហ៍ទៅមួយសប្តាហ៍ កំណើនភ្ញៀវចេះកើនឡើងជាលំដាប់។ ដោយឡែក រដ្ឋបាលរាជធានីភ្នំពេញ ដើម្បីបំពេញនូវសំណូមពររបស់ប្រជាពលរដ្ឋក៏បានរៀបចំបន្ថែមជាបន្តបន្ទាប់ ជាមួយនឹងការកែសម្រួលតម្រាយខ្សែរត់ខ្សែទី១C និងបន្ថែមម៉ោងប្រតិបត្តិការសេវាដឹកជញ្ជូនសាធារណៈរថយន្តក្រុងបន្ថែម ដោយអនុវត្តនៅរៀងរាល់ថ្ងៃសៅរ៍ និងថ្ងៃអាទិត្យនៃសប្តាហ៍នីមួយៗ រហូតដល់ម៉ោង ១១៖០០នាទីយប់។

សូមបញ្ជាក់ថា ផ្លូវថ្មើរជើង (Walk Street) ត្រូវបានរដ្ឋបាលរាជធានីភ្នំពេញ ដាក់ឱ្យដំណើរការសាកល្បង២ថ្ងៃ ក្នុង១សប្ដាហ៍ គឺថ្ងៃសៅរ៍ និងថ្ងៃអាទិត្យ ចាប់ពីម៉ោង៦ល្ងាច ដល់ម៉ោង១១យប់ នៅតាមបណ្តោយតីរវិថីព្រះស៊ីសុវត្ថិ ចាប់ពីវិថីបក្សីចាំក្រុង (ផ្លូវលេខ៩៤) រហូតដល់មុខព្រះបរមរាជវាំង៕

ដោយ សួស សំរិត