AKP ភ្នំពេញ ថ្ងៃទី២៧ ខែកុម្ភៈ ឆ្នាំ២០២៥ -- សភាពាណិជ្ជកម្ម និងឧស្សាហកម្មកូរ៉េខាងត្បូង (KCCI) បាននិយាយកាលពីថ្ងៃពុធថា កិច្ចប្រជុំលើកដំបូងនៃក្រុមប្រឹក្សាប្រឹក្សាពាណិជ្ជកម្មនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ដែលត្រូវបានគេស្គាល់ថាជាកិច្ចប្រជុំ ABAC បានផ្តោតសំខាន់ទៅលើកិច្ចសហប្រតិបត្តិការអាជីវកម្ម និងសមាហរណកម្មសេដ្ឋកិច្ចក្នុងតំបន់ ដែលជាផ្នែកសំខាន់នៃកិច្ចពិភាក្សាមុនពេលដែលប្រទេសកូរ៉េខាងត្បូងធ្វើជាម្ចាស់ផ្ទះនៃកិច្ចប្រជុំមេដឹកនាំសេដ្ឋកិច្ច APEC ឆ្នាំ២០២៥នៅក្នុងខែវិច្ឆិកា។

កិច្ចប្រជុំ ABAC ដែលសហការរៀបចំឡើងដោយ KCCI ដែលមានតួនាទីជាលេខាធិការដ្ឋាន ABAC កូរ៉េខាងត្បូង និងលេខាធិការដ្ឋានABAC របស់ប្រទេសអូស្ត្រាលី បានប្រព្រឹត្តទៅនៅទីក្រុងប្រ៊ីសប៊ែនរបស់ប្រទេសអូស្ត្រាលីចាប់ពីថ្ងៃអាទិត្យដល់ថ្ងៃអង្គារ ដោយបានប្រមូលផ្តុំមេដឹកនាំធុរកិច្ចលេចធ្លោជាង ២០០នាក់ និងមន្ត្រីជាន់ខ្ពស់ APEC ជាង២០នាក់។

តំណាងជនជាតិកូរ៉េខាងត្បូងដែលរួមមានលោក ចូ យុនសាង (Cho Hyun-sang) អនុប្រធានក្រុមហ៊ុន HS Hyosung ដែលទើបជាប់ឆ្នោតជាប្រធាន ABAC សម្រាប់ឆ្នាំ២០២៥ លោក លី យុហូ (Lee Kyu-ho)អនុប្រធានក្រុមហ៊ុន Kolon Group និងលោក លី ជូវ៉ាន (Lee Joo-wan)ស្ថាបនិក Megazone Cloud។

កិច្ចប្រជុំ ABAC ឆ្នាំ២០២៥ ត្រូវបានបែងចែកជាក្រុមការងារចំនួន៥ដែលរួមមានក្រុមការងារសមាហរណកម្មសេដ្ឋកិច្ចក្នុងតំបន់ក្រុមការងារនិរន្តរភាព ក្រុមការងារបញ្ញាសិប្បនិមិ្មត (AI) និងឌីជីថលក្រុមការងារហិរញ្ញវត្ថុ និងការវិនិយោគ និងក្រុមការងារថែទាំសុខភាព និងជីវសាស្រ្ត។

បញ្ហាសំខាន់មួយដែលត្រូវបានដោះស្រាយ គឺការប្រើប្រាស់ថាមពលកើនឡើងនៃមជ្ឈមណ្ឌលទិន្នន័យដែលជំរុញដោយកំណើន AI ។ សមាជិកABAC បានព្រមព្រៀងទៅលើតម្រូវការបន្ទាន់ក្នុងការសាងសង់មជ្ឈមណ្ឌលទិន្នន័យប្រកបដោយនិរន្តរភាព និងថាមពលដោយប្រើប្រាស់ថាមពលស្អាតដើម្បីកាត់បន្ថយភាពខុសគ្នាក្នុងតំបន់ឌីជីថល។ កិច្ចពិភាក្សានោះក៏បានលើកឡើងអំពីផលប៉ះពាល់ជាអវិជ្ជមានដែលអាចកើតមាននៃពន្ធឌីជីថលទៅលើកិច្ចសហការ AI ដោយជំរុញឱ្យមានការពិចារណាឡើងវិញនូវគោលនយោបាយបែបនេះនៅកម្រិត APEC ផងដែរ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)