AKP ភ្នំពេញ ថ្ងៃទី២៦ ខែកុម្ភៈ ឆ្នាំ២០២៥ -- ការិយាល័យបាននិយាយកាលពីថ្ងៃអង្គារថា រដ្ឋមន្ត្រីក្រសួងពាណិជ្ជកម្ម ឧស្សាហកម្ម និងថាមពលកូរ៉េខាងត្បូង លោក អាន ដុកហ្គន់ (Ahn Duk-geun) នឹងធ្វើទស្សនកិច្ចនៅទីក្រុងវ៉ាស៊ីនតោនក្នុងសប្តាហ៍នេះ ដើម្បីពិភាក្សាអំពីផែនការពន្ធថ្មីរបស់សហរដ្ឋអាមេរិក ចំពេលមានការព្រួយបារម្ភកាន់តែខ្លាំងឡើងថា គម្រោងពន្ធថ្មីរបស់សហរដ្ឋអាមេរិកអាចនឹងប៉ះពាល់យ៉ាងធ្ងន់ធ្ងរដល់ឧស្សាហកម្មសំខាន់ៗរបស់ប្រទេសកូរ៉េខាងត្បូង និងសេដ្ឋកិច្ចដែលពឹងផ្អែកលើការនាំចេញ។

យោងតាមក្រសួងពាណិជ្ជកម្ម ឧស្សាហកម្ម និងថាមពល បានឱ្យដឹងថា លោក អាន នឹងចាប់ផ្តើមដំណើរទស្សនកិច្ចរយៈពេល ៣ថ្ងៃទៅកាន់ទីក្រុងវ៉ាស៊ីនតោននៅថ្ងៃពុធនេះ ដើម្បីជួបជាមួយលេខាធិការពាណិជ្ជកម្ម លោក ហូវ៉ាដ លូតនីក (Howard Lutnick) និងមន្ត្រីរដ្ឋាភិបាលសហរដ្ឋអាមេរិកដទៃទៀត។

យោងតាមក្រសួងបានឱ្យដឹងថា លោក អាន នឹងអំពាវនាវឱ្យរដ្ឋបាលសហរដ្ឋអាមេរិក លើកលែងចំពោះប្រទេសកូរ៉េខាងត្បូងពីពន្ធ ២៥% ដែលបានគ្រោងទុកលើការនាំចូលដែកថែប និងអាលុយមីញ៉ូម ក៏ដូចជាផែនការដើម្បីដាក់ពន្ធ «ទៅវិញទៅមក» លើប្រទេសដទៃទៀត។

ក្រសួងបាននិយាយថា លោក អាន ក៏នឹងជួបជាមួយសមាជិកសភាសហរដ្ឋអាមេរិក ដើម្បីអំពាវនាវឱ្យមានការខិតខំប្រឹងប្រែងរបស់សហរដ្ឋអាមេរិក ដើម្បីបង្កើតបរិយាកាស «សមស្រប» សម្រាប់ការវិនិយោគរបស់ក្រុមហ៊ុនកូរ៉េខាងត្បូងនៅទីនោះ។

យោងតាមរបាយការណ៍មុននេះបានឱ្យដឹងថា អាជីវកម្មកូរ៉េខាងត្បូងត្រូវបានគេនិយាយថាបានធ្វើការវិនិយោគរួមគ្នាចំនួន ១៥០ប៊ីលានដុល្លារអាម៉េរិកនៅក្នុងសហរដ្ឋអាមេរិក ចាប់តាំងពីការចាប់ផ្តើមនៃរដ្ឋបាលលោក ត្រាំ ជាលើកដំបូង។

លោកបានបន្ថែមថា «ប្រទេសកូរ៉េខាងត្បូង និងសហរដ្ឋអាមេរិក គឺជាដៃគូដ៏ល្អដែលពួកគេមានសក្តានុពលគ្មានដែនកំណត់ក្នុងកិច្ចសហប្រតិបត្តិការក្នុងវិស័យផ្សេងៗ រួមទាំងការកសាងនាវា រោងចក្រនុយក្លេអ៊ែរ និងថាមពល»៕

ដោយ៖ មូល មិនា (ប្រភព៖ យ៉ុនហាប់)