AKP ភ្នំពេញ ថ្ងៃទី២៥ ខែកុម្ភៈ ឆ្នាំ២០២៥​ --ការិយាល័យកិច្ចការសាធារណៈនៃកងទ័ពជើងគោកអាម៉េរិកប្រចាំតំបន់ប៉ាស៊ីហ្វិកឯកឧត្ដម នាយឧត្តមសេនីយ៍ Ronald P. Clark មេបញ្ជាការកងទ័ពជើងគោកអាម៉េរិកប្រចាំតំបន់ប៉ាស៊ីហ្វិក បានជួបប្រជុំ ជាមួយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងថ្នាក់ដឹកនាំយោធាជាន់ខ្ពស់ ក្នុងពេលមកបំពេញទស្សនកិច្ច នៅរាជធានីភ្នំពេញ កាលពីថ្ងៃទី ២៤ ខែកុម្ភៈ ឆ្នាំ ២០២៥ ។

ក្រៅពីជំនួបជាមួយសម្ដេចធិបតីនាយករដ្ឋមន្ត្រី នាយឧត្តមសេនីយ៍ Ronald P. Clark ក៏បានជួបជាមួយឯកឧត្ដម នាយឧត្តមសេនីយ៍ ទៀ សីហា រដ្ឋមន្ត្រីក្រសួងការពារជាតិ, ឯកឧត្ដមនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ និងឯកឧត្ដម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក។ នេះបើយោងតាមសេចក្ដីប្រកាសព័ត៌មានរបស់ស្ថានទូតអាម៉េរិកប្រចាំនៅកម្ពុជា។

ក្នុងកិច្ចពិភាក្សានេះ មន្ត្រីជាន់ខ្ពស់ទាំងអស់ បានស្វែងរកវិធីផ្សេងៗ ក្នុងការពង្រឹងទំនាក់ទំនងទ្វេភាគីរវាងសហរដ្ឋអាមេរិក និងកម្ពុជា ដើម្បីលើកកម្ពស់សន្តិភាព និងសន្តិសុខនៅតំបន់ឥណ្ឌូ-ប៉ាស៊ីហ្វិក។ កិច្ចពិភាក្សា ក៏បានលើកឡើងពីការផ្លាស់ប្តូរការបណ្តុះបណ្តាលយោធាដែលផ្តោតលើការសង្គ្រោះគ្រោះមហន្តរាយ ការរក្សាសន្តិភាពរបស់អង្គការសហប្រជាជាតិ និងកិច្ចខិតខំប្រឹងប្រែងធ្វើឱ្យកម្ពុជាគ្មានគ្រាប់មីន។
ក្នុងជំនួបនោះ មន្ត្រីជាន់ខ្ពស់នៃប្រទេសទាំងពីរ បានបង្ហាញការគាំទ្ររបស់ពួកគេចំពោះការបន្តការសន្ទនា ទាក់ទងនឹងបញ្ហាដែលលើកឡើងទាំងនេះ៕

ដោយ៖ រិទ្ធី