AKP ភ្នំពេញ ថ្ងៃទី២៥ ខែកុម្ភៈ ឆ្នាំ២០២៥--អង្គការសម្ព័ន្ធពិភពឥស្លាម នឹងរៀបចំកិច្ចកិច្ចប្រជុំកំពូលឥស្លាមស្តីពី«ឥស្លាមនិងពុទ្ធសាសនា»ដែលជាកិច្ចប្រជុំដំបូងគេនៅប្រទេសកម្ពុជានៅថ្ងៃទី២៧ ខែកុម្ភៈ ឆ្នាំ២០២៥ នៅសណ្ឋាគារសុខាភ្នំពេញ ដែលពិធិបើកនឹងប្រព្រឹត្តឡើងក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ នេះបើយោងតាមការបញ្ជាក់របស់ឯកឧត្តម បណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាសមាជិកឧត្តមក្រុមប្រឹក្សានៃអង្គការសម្ព័ន្ធពិភពឥស្លាម។

ឯកឧត្តម បណ្ឌិត អូស្មាន ហាស្សាន់ បានមានប្រសាសន៍ថា  កិច្ចប្រជុំនេះរៀបចំឡើងក្នុងគោលបំណងចែករំលែកចំណេះដឹង និងបទពិសោធន៍ក្នុងការកសាងនូវសង្គមួយប្រកបដោយសន្តិភាព សហវិជ្ជមាន និងសុខដុមនីយកម្មជាតិសាសន៍ និងសាសនា។ ឯកឧត្តមបណ្ឌិតបន្តថា កម្ពុជាដោយត្រូវបានពិភពលោកទទួលស្គាល់ជាប្រទេសគំរូ ដែលមានសុខដុមនីយកម្មជាតិសាសន៍ និងសាសនា ហើយមិនធ្លាប់មានជម្លោះ ឬអំពើហិង្សាសាសនានោះទេ។ 

ជាមួយគ្នានេះ ឯកឧត្ដមបណ្ឌិតបានលើកឡើងថា ការរៀបចំកិច្ចប្រជុំកំពូលឥស្លាមក្រោមប្រធានបទឥស្លាមនិងពុទ្ធសាសនានេះ នឹងអនុញ្ញាតឱ្យប្រទេសនានាបានសិក្សារៀនសូត្រពីបទពិសោធន៍របស់កម្ពុជាក្នុងការ  កសាងនូវភាពសុខ   ដុម ការអត់ឱន និងការរស់នៅប្រកបដោយសន្តិសហវិជ្ជមានរវាងប្រជាជនចម្រុះជាតិសាសន៍និងសាសនា។ 

សូមជម្រាបជូនថា កិច្ចប្រជុំកំពូលឥស្លាមនេះ នឹងមានការអញ្ជើញចូលរួមពីសំណាក់ប្រតិភូបរទេសប្រមាណ២០០នាក់ មកពី៣៥ប្រទេស និងមានអ្នកចូលរួមសរុបប្រមាណ ១ ០០០អង្គ/នាក់៕

ដោយ៖ រិទ្ធី