AKP ភ្នំពេញ ថ្ងៃទី២៥ ខែកុម្ភៈ ឆ្នាំ២០២៥ -- យោងតាមសេចក្តីថ្លែងការណ៍របស់ក្រសួងការបរទេសរបស់ប្រទេសកាតា បានឱ្យដឹងថា នាយករដ្ឋមន្ត្រី និងជារដ្ឋមន្ត្រីការបរទេសកាតា លោក ម៉ូហាមមេដ ប៊ីន អាប់ឌុលរ៉ាហ៍ម៉ាន់ អាល់ ថានី (Mohammed bin Abdulrahman Al Thani) បានជួបជាមួយរដ្ឋមន្ត្រីការបរទេសបណ្តោះអាសន្នរបស់ប្រទេសស៊ីរី លោក អាសសាដ អាល់ សៃបានី (Asaad al-Shaibani) ដើម្បីពិភាក្សាអំពីកិច្ចសហប្រតិបត្តិការទ្វេភាគី និងការវិវត្តចុងក្រោយបង្អស់នៅក្នុងប្រទេសស៊ីរី។

កិច្ចពិភាក្សាបានផ្តោតលើការពង្រឹងកិច្ចសហប្រតិបត្តិការរវាងប្រទេសទាំងពីរ និងការដោះស្រាយការវិវឌ្ឍនាពេលបច្ចុប្បន្ននៅក្នុងប្រទេសស៊ីរី ក៏ដូចជាប្រធានបទផ្សេងទៀតដែលចាប់អារម្មណ៍គ្នាទៅវិញទៅមក។

លោក អាល់ ថានី បានរំលឹកឡើងវិញនូវការគាំទ្រយ៉ាងខ្ជាប់ខ្ជួនរបស់ប្រទេសកាតាចំពោះឯកភាព អធិបតេយ្យភាព និងឯករាជ្យរបស់ប្រទេសស៊ីរី ហើយលោកបានបញ្ជាក់ពីការប្តេជ្ញាចិត្តចំពោះសេចក្តីប្រាថ្នារបស់ប្រជាជនស៊ីរីសម្រាប់ជីវិតដ៏ថ្លៃថ្នូរ និងការបង្កើតរដ្ឋមួយដែលគ្រប់គ្រងដោយស្ថាប័ន និងនីតិរដ្ឋ។

លោកក៏បានអះអាងពីការគាំទ្ររបស់ប្រទេសកាតាចំពោះកិច្ចខិតខំប្រឹងប្រែងសំដៅលើការកសាងឡើងវិញ ការអភិវឌ្ឍ និងស្ថិរភាពនៅក្នុងប្រទេសស៊ីរីផងដែរ៕

ដោយ៖ មូល មិនា (ប្រភព៖ ភីបផលដេលី)