AKP ភ្នំពេញ ថ្ងៃទី២៥ ខែកុម្ភៈ ឆ្នាំ២០២៥ -- ប្រធានាធិបតីតួកគី លោក រេសេប តាយយីប អឺដូហ្គែន (Recep Tayyip Erdogan) កាលពីថ្ងៃច័ន្ទបានសង្កត់ធ្ងន់ទៅលើសារៈសំខាន់នៃវិធីសាស្រ្តប្រកបដោយយុត្តិធម៌ និងមានតុល្យភាព ដើម្បីទទួលបាននូវសន្តិភាព ខណៈដែលសង្រ្គាមរវាងរុស្ស៊ី និងអ៊ុយក្រែនបានឈានចូលដល់ឆ្នាំទីបួនហើយ។

លោក អឺដូហ្គែន បាននិយាយនៅក្នុងសារជាវីដេអូមួយទៅកាន់កិច្ចប្រជុំកំពូលមេដឹកនាំវេទិកា Crimean ដែលធ្វើឡើងដើម្បីប្រារព្ធខួបឆ្នាំទី៣ នៃសង្រ្គាមរុស្ស៊ី និងអ៊ុយក្រែនដែលកំពុងបន្តថា «ផ្លូវទៅកាន់សន្តិភាពដ៏ត្រឹមត្រូវ និងយូរអង្វែងអាចត្រូវបានបើកជាមួយនឹងសមីការមួយដែលភាគីទាំងពីរនៃសង្រ្គាមត្រូវបានតំណាងដោយស្មើភាព និងយុត្តិធម៌»។

ចាប់តាំងពីការបញ្ចូលឧបទ្វីបគ្រីមៀនៅក្នុងឆ្នាំ២០១៤ ប្រទេសតួកគីបានផ្តល់ការគាំទ្រចាំបាច់ដល់បុព្វហេតុតែមួយគត់របស់អ៊ុយក្រែន ស្របតាមគោលការណ៍ជាមូលដ្ឋាននៃច្បាប់អន្តរជាតិ។

លោកបាននិយាយថា «ដូចដែលយើងបានប្រកាសពីការប្រឆាំងរបស់យើងចំពោះសង្រ្គាម នៅពេលដែលជម្លោះបានចាប់ផ្តើមកាលពី ៣ឆ្នាំមុន យើងនៅតែតាំងចិត្តថានឹងខិតខំប្រឹងប្រែងដើម្បីបញ្ចប់សង្រ្គាមតាមរយៈកិច្ចចរចា ហើយខណៈដែលយើងកំពុងធ្វើដូច្នេះ យើងនៅតែបន្តគាំទ្រយ៉ាងខ្លាំងចំពោះបូរណភាពទឹកដី អធិបតេយ្យភាព និងឯករាជ្យភាពរបស់អ៊ុយក្រែន»។

លោកក៏បានគូសបញ្ជាក់ផងដែរថា សន្តិភាពយូរអង្វែងទាមទារឱ្យមានការចូលរួមពីគ្រប់ភាគីពាក់ព័ន្ធនៅក្នុងជម្លោះ ដោយលោកបាននិយាយថា ពួកគេបានឃើញពីការយកចិត្តទុកដាក់កាន់តែខ្លាំងឡើងចំពោះវិធីសាស្រ្តដោយផ្អែកលើការងារការទូត កិច្ចសន្ទនា និងកិច្ចចរចា។

លោកប្រធានាធិបតីតួកគីបាននិយាយថា «យើងសង្ឃឹមថាដំណើរការនេះនឹងជាការកត់សម្គាល់នៃការចាប់ផ្តើមបញ្ចប់ជម្លោះ និងការបង្កើតសន្តិភាពយូរអង្វែង។ នៅឆ្នាំក្រោយ វាគឺជាការទទួលខុសត្រូវរួមគ្នារបស់យើងក្នុងការរំលឹកខួបនៃសន្តិភាព មិនមែនសង្រ្គាមនោះទេ»។

លោក អឺដូហ្គែន បាននិយាយថា លោកបានជួបជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskyy) នៅទីក្រុងអង់ការ៉ាកាលពីសប្តាហ៍មុន ហើយបានពិភាក្សាគ្នាអំពីការរួមចំណែករបស់តួកគីនៅក្នុងចំណុចសំខាន់នេះ និងបំណងប្រាថ្នារបស់ប្រទេសលោកក្នុងការធ្វើជាម្ចាស់ផ្ទះនៃកិច្ចចរចា៕

ដោយ៖ យា ចិន្ដាខន្ដី (ប្រភព៖ AA-AKP)